Britaniya mediası Azərbaycan səfirliyi barədə niyə susdu?

Avqustun 4-də Azərbaycanın Böyük Britaniya və Şimali İrlandiya Birləşmiş Krallığındakı səfirliyi bir qrup radikal dini dəstənin hücumuna məruz qalıb. Səfirliyin binasına daxil olaraq vandalizm aktı törədən qrup üzvləri binanın eyvanında dini bayraqlar qaldıraraq, radikal dini şüarlar səsləndiriblər.

 Britaniyanın aparıcı media orqanları Azərbaycanın Londondakı əsas diplomatik nümayəndəliyinə qarşı hücumun təqdimatına, demək olar, yer vermədilər.  "BBC”, “ITV”, “Sky news” kimi nüfuzlu telekanallar, “The Times”, “Daily Mail”, “The Telegraph”, “The Spectator”, “Private Eye”, “The Guardian” kimi populyar nəşrlər Azərbaycan səfirliyinə qarşı hücumu, təxribatı susaraq qarşıladılar.

"Böyük Britaniya mediasının Azərbaycanla bağlı mövqeyi hər zaman neqativ olub"

Media eksperti Azər Həsrət  bildirdi ki, Böyük Britaniya mediasının Azərbaycanla bağlı mövqeyi hər zaman negativ olub: "Bu ölkə ancaq problem axtarır, Azərbaycanı haqsız yerə tənqid etmək üçün fürsət axtarır. Xatırladım ki, 2015-ci ildə Azərbaycanda Avropa Oyunları keçirilən zaman bu ölkə ancaq Azərbaycanda xoşagəlməz hadisənin baş verməsini gözləyirdi ki, onu yaysın. Belə ki, Bakı kəndlərinin birində it ölmüşdü, Britaniya mətbuatı da itin ölümünü xəbər eləmişdi, ancaq idman oyunu ilə bağlı heç nə yaymadılar. Bu gün Britaniya mətbuatının səfirliyə edilən hücuma yer verməməsi o deməkdir ki, Qərb mediasının azadlığı haqqında deyilənlər cəfəngiyatdır. Onlar tərəfsiz media olsaydı, bu cür hadisəni görməzdən gəlməzdi".

A.Həsrət hesab edir ki, özünü azad media hesab edən Qərb mediası kimlərinsə diqtəsi ilə hərəkət edir. Dindirəndə müstəqillikdən, azadlıqdan danışırlar. Ancaq Londonun ortasında barbar hücum baş verir, mətbuatın səsi çıxmır. Qərb mediasının azadlığı, sərbəstliyi haqqında deyilənlər illüziyadan başqa bir şey deyil. Ancaq Azərbaycan mediası Britaniya mediasından qat-qat üstündür: "Çünki bizim ölkəmizdə nə baş verirsə media dərhal həmin məsələni işıqlandırır".

Günel CƏLİLOVA