2022-ci ildə Azərbaycana gələn hər 7 turistdən biri ölkədən narazı gedib. Ən çox narazılar arasında ərəb turistləri, avropalılar, hətta Rusiya və britaniyalılar da var. Bu barədə Dövlət Statistika Komitəsi məlumat yayıb. Komitənin açıqladığı hesabata görə, 2022-ci ilin ilk 4 ayında xaricdən Azərbaycana 220 min turist gəlib. Turistlərin 187 min nəfəri onlara göstərilən xidmətlərdən razı qalıb, 32,5 min nəfəri isə göstərilmiş xidmətləri qənaətbəxş hesab etməyib. Ümumilikdə narazı turistlərin sayı ümumi turist axınında orta hesabla 14,8% təşkil edir. Narazı qaldıqları sahələr isə nəqliyyat (sərnişin daşıma: metro, taksi, avtobus), yerləşmə, restoranlardakı xidmət və bələdçi xidməti olub.
Araşdırmalara görə, avtobus xidmətindən ümumilikdə 4 800 nəfər narazı qalıb. Bunların arasında ən çox narazılar Rusiyadan gələn turistlərdir (1 467 nəfər). Avtobuslardan narazı qalanların 954-ü Türkiyə, 491 nəfəri isə İran vətəndaşları olub. Səudiyyə Ərəbistanı (188 nəfər), Gürcüstan (124) və Ukrayna (126 nəfər) turistləri də avtobusların işindən narazılar siyasındadır. Taksi xidmətindən ən çox Türkiyə turistləri narazı qalıb. Belə ki, 7400 narazı turistin 914 nəfəri taksi xidmətini qənaətbəxş hesab etmir. Bu xidmət üzrə ikinci sırada Rusiya (8 min narazı turistdən 882 nəfəri taksi xidmətindən narazıdır), üçüncü sırada isə İran turistləri (423 nəfər) gəlir.
Qeyd edək ki, turistlərin ən çox narazı qaldığı sahələr restoran biznesi olub – ölkədən narazı gedən 32,5 min turistin 8,4 mininin keyfini restoranlar korlayıb. Bu sahədə sayca ən çox narazı olan Rusiya (2000), Türkiyə (1800) və İran (1 142) turistləridir. Restoranlar Ukraynalı turistlərə də rəhm eləməyiblər (239 narazı turist), Səudiyyə Ərəbistanı, Gürcüstan, BƏƏ, Küveyt turistləri də restoranlardan ən çox narazı qalanlar sırasındadır.
“Turistlərin Azərbaycanda bəyənmədiyi başlıca məqam restoranlarda ikili menyu olmağıdır, yəni yerli insanlara daha ucuz, turistlərə bahalı xidmət təklif edildikdə, bu onları…”
Azərbaycana gələn turistlərin ölkəmizdən nə səbəbdən narazı qalması barədə fikir bildirən turizm sahəsi üzrə ekspert Elçin Rüstəm qeyd etdi ki, turistlərin ölkəmizdə bəyənmədiyi məqamlar çoxdur: “Ölkəmizə gələnlər ən çox ikili menyu qaydasından narazı qalırlar. Turistlərin Azərbaycanda bəyənmədiyi başlıca məqam restoranlarda ikili menyu olmağıdır. Yəni yerli insanlara daha ucuz, turistlərə bahalı xidmət təklif edildikdə, bu onları incik salır. Həmçinin, yerli əhalinin ingilis dilini zəif bilməsi turistlər üçün problem yaradır. İkinci əsas narazılıq nəqliyyat, xüsusən taksi sürücülərinin yalanları və fırıldaqçılığıdır. Taksilər qısa məsafə üçün normadan artıq məbləğ alır. Turistlərin narazı qaldığı məqamlardan biri də bələdçilərin azlığı və keyfiyyəti məsələsidir. Eləcə də, "rent a car", yəni turistlərin avtomobillərin icarəyə götürməsi ilə bağlı problem var. Turistləri narahat edən digər məsələlərdən biri isə ictimai tualetlərin, ayaqyoluların az olması, bəzi yerlərdə isə ümumiyyətlə olmamasıdır”.
Günel CƏLİLOVA
