İlan ulduz görməsə ölməz. Xalqımızın bu deyimi Rusiyanın “RİA Novosti” agentliyinin davranışlarına çox uyğun gəlir. Uzun müddətdir “qılıncını qınına” qoymaq istəməyən agentlik Azərbaycanda rəsmən bloklandıqdan sonra geriyə addım atıb. Xeyli müddətdir Qarabağdakı separatçıları cani-dildən təbliğ edən “RİA Novosti” agentliyi indi özünü Azərbaycanın ərazilərində qanunsuz təşkilatın “naziri” adlandıran separatçı Artak Beqlaryanla qalmaqallı müsahibəni silib.
Qeyd edək ki, məhz həmin müsahibədən sonra Azərbaycanda “RİA Novosti” agentliyinin internet informasiya resursuna giriş məhdudlaşdırılıb.
“Sərt mövqe göstəriləndə, məsələnin üzərinə bu şəkildə gediləndə nəticə də olur”
Siyasi şərhçi Azər Həsrət baki-xeber.com-a şərhində bilirdi ki, agentliyin separatçı ilə müsahibəni silməsi təsadüfi deyil, o, Azərbaycanın gücü, dirənişi qarşısında bu addımı atıb, biz bu media resursuna yumşaq davransaydıq bu hal baş verməyəcəkdi. “İllərdir bu cür sərt addımlara gedilməli olduğunu deyirdim. Həm Azərbaycanın Rusiyadakı səfirliyi bu məsələlərə sərt reaksiya verməlidir, həm də Azərbaycan ictimai rəyi bu məsələlərin üzərinə məhz bu cür də getməlidir. Gördünüz ki, sərt mövqe göstəriləndə, məsələnin üzərinə bu şəkildə gediləndə nəticə də olur. Azərbaycan dövləti, Azərbaycan xalqı özünə qarşı bu hörmətsizliyə heç zaman dözməməlidir. “RİA Novosti”nin separatçı ilə müsahibəni silməsi, eyni zamanda da “Sputnik Azərbaycan”ın buradakı şef redaktorunun iş icazəsinin vaxtının uzadılmaması üst-üstə düşdü. Bu faktı da nəzərə alaq. Bilirsiz ki, uzun müddətdir Azərbaycan ictimaiyyəti “Sputnik Azərbaycan”dan narazılıq ifadə edir, onun ölkədən çıxarılmasını tələb edir və bu atılan addım artıq ona doğru atılan addım kimi qiymətləndirilə bilər. Biz iyunun 10-da eşitdik ki, “Sputnik Azərbaycan”ın şef redaktorununiş, oturum icazəsi uzadılmayıb və 10 gün ərzində Azərbaycanı tərk etməlidir. Bilirsiz ki, həmin qadın da Marqarita Simonyanın ailə dostdur”.
A.Həsrət qeyd etdi ki, istər “Sputnik” ailəsi, istər “RİA Novosti”, istərsə də başqa Rusiya media subyektləri olsun, onlar Azərbaycanın dövlət maraqlarına zidd addımlar atdığlarının, bununla da bizə nə qədər zərərlər vurduqlarının fərqinə varmalıdırlar: “Onlar Azərbaycanla əməkdaşlıq etmək, burada yayımlanmaq, fəaliyyət göstərmək istəyirlərsə Azərbaycanın cızdığı çərçivədən kənara çıxmamalıdırlar. “RİA Novosti”nin o müsahibəni silməsi bu cür nəticənin əldə edilə biləcəyinin göstəricisidir”.
İradə SARIYEVA
