Gürcüstan Azərbaycanlıları Konqresinin sədri Hüseyn Yusubov C.Cabbarlı adına İrəvan Dövlət Azərbaycan Dram Teatrının 140 illiyi münasibətilə teatr kollektivinin Gürcüstanda yaşayan azərbaycanlılarla növbəti görüşünün təşkil olunmasına köməklik göstərməsi ilə bağlı mədəniyyət naziri Anar Kərimova müraciət edib.
Baki-xeber-com-un xəbərinə görə, müraciətdə deyilir: “Azərbaycan Respublikasının Mədənniyyət Naziri cənab Anar Kərimova Hörmətli Anar müəllim! C.Cabbarlı adına İrəvan Dövlət Azərbaycan Dram Teatrının bu il 140 yaşının tamam olması Gürcüstanda yaşayan azərbaycanlıların sevincinə səbəb oldu və bu hadisəni ruh yüksəkliyi ilə qarşıladıq. Çünki neçə illərdir ki, bizləri unutmayan və vaxtaşırı müxtəlif mövzulu, yüksək bədii keyfiyyətli tamaşaları ilə könlümüzü fərəhləndirən sevimli teatrın dəyərli kollektivi bizim üçün əzizdir. Bu qocaman sənət ocağı 2005-cildən üzü bəri dəfələrlə Respublikamıza genişmiqyaslı və çox layiqli qastrol səfərləri həyata keçirmişdir. 2005-ci ildə Kvemo-Kartli – Borçalı qubernatorunun dəvətinə əsaasən, İrəvan Azərbaycan Teatrı görkəmli şair, dramaturq Hidayətin “Məhəbbət yaşayır hələ...” tamaşası ilə respublikamızın qonağı olmuşdur. Tamaşa bölgə tamaşaçıları tərəfindən böyük rəğbətlə qarşılandı. Həmin səfərin unudulmaz xatirələri, aktyorların yüksək peşəkarlığı, səhnə əsərinin heyranedici təsiri indi də həmvətənlərimizin yaddaşında yaşayır və hörmətlə xatırlanır. Teatrın ikinci maraqla qarşılanan qastrol səfəri Gürcüstan Respublikasının paytaxtı Tiflis şəhərində 22-24 fevral 2009-cu ildə baş tutdu. Kollektiv Marcanaşvili adına Dövlət Akademik Dram Teatrının səhnəsində tanınmış teatr xadimi İftixarın “Körpü” tamaşası ilə çıxış etdi və yüksək sənət nümunəsi göstərdi. “Qafqazda sülh və barış!” adlı aktual və öz dövrü üçün çox önəmli olan layihə çərçivəsində oynanılan tamaşaya nüfuzlu gürcü ziyalıları və sənət adamları, Tiflisdə və bölgələrdə yaşayan azərbaycanlılar təşrif buyurmuşdular. Yadımdadır ki, anşlaqla keçən və böyük rəğbətlə qarşılanan tamaşa paytaxt elitası tərəfindən yüksək qiymətləndirildi. İlk dəfə idi ki, şəhərin teatr ictimaiyyəti Azərbaycan sənətçilərinin, koloritli aktyor ansamblının orijinal məzmunda təqdim etdiyi unikal layihə ilə tanış olurdu. Bu layihə ilə kollektiv Azərbaycan teatr sənətinin özünəməxsus keyfiyyətini elə səviyyədə təqdim etdi ki, gürcü teatr ictimaiyətinin heyranlığına səbəb oldu. Bu isə, bizə qürur hissləri yaşatdı. 2009-cu ilin sonunda İrəvan Azərbaycan Teatrının afişaları yenidən Tiflis şəhərinin küçələrini bəzədi. Noyabrın 25-dən, dekabrın 4-dək baş tutan qastrol səfərində Aqşin Babayevin “Xilaskar” əsəri və İsi Məlikzadənin “Subaylarınızdan görəsiniz” komediyası göstərilirdi. Heydər Əliyevin anadan olmasının 86-cı ildönümünə və hakimiyyətə gəlişinin 40 illiyinə həsr edilən “Xilaskar” tamaşasına Azərbaycan Respublikasının Gürcüstandakı səfiri Namiq Əliyev, səfirliyin əməkdaşları, Gürcüstanın prezident administrasiyasının rəsmi nümayəndələri, ulu öndər Heydər Əliyevin siyasi silahdaşı və dostu, eks-prezident mərhum Eduard Şevardnadze, Ukraynanın səlahiyyətli səfiri, Rusiyanın səlahiyyətli nümayəndəsi, Gürcüstanın diasporla iş üzrə dövlət naziri və Reinteqrasiya nazirliyinin nümayəndələri, Teatr Xadimləri İttifaqının sədri SSRİ Xalq artisti Qiqa Lorqkipanidze, Gürcüstanın Xalq artistlərindən millət vəkili cənab Georgi Kaftaradze, Suxumi teatrının direktoru, xalq artisti, Ukraynanın “Şərəf” ordeninə layiq görülmüş mərhum Dmitri Caiani və Suxumi Teatrının aktyorları, Tiflis Dövlət Peşəkar Azərbaycan Dram Teatrının o dövrdə bədii rəhbəri olan Qoça Kapanadze və teatrın kollektivi, o cümlədən gürcü teatr ictimaiyyəti və Gürcüstanda yaşayan ziyalıların böyük bir hissəsi baxırdı. Xatirimdədir, tamaşadan təsirlənən Eduard Şevardnadze səhnə arxasına gələrək, İrəvan Teatrının kollektivini şəxsən təbrik etdi, tamaşa haqqında yüksək fikirlər söylədi. Təəssüratlarını geniş şəkildə bölüşmək üçün kollektivi öz iqamətgahına dəvət etdi. Kolektiv Eduard Şevardnadzenin iqamətgahında o böyük siyasətçi ilə görüşdü, onun tamaşa barədə yüksək dəyərli fikirlərini dinlədi, ulu öndər Heydər Əliyev haqqında dərin hörmətlə yad etdiyi xatirələrinə diqqət kəsildi. Tarixin səhifələrinə keçən bu görüşdən hər iki tərəf xoş təəssüratla ayrıldı. Daha sonra, səfir Namiq Əliyevin təşəbbüsü ilə İrəvan Teatrının kollektivi Tiflis Dövlət Universitetində yaradılmış Heydər Əliyev guşəsində kollektivlə gürcüstan sənət xadimlərinin və azərbaycanlı ziyalıların görüşünü həyata keçirdi. Tədbirdə görüş iştirakçıları tərəfindən teatrın kollektivinin Gürcüstandakı sənət fəaliyyətinin ecazkarlığı barədə ağızdolusu danışıldı. Kollektiv ali xidmətə görə səfirliyin fəxri fərmanı ilə mükafatlandırıldı. İrəvan Teatrının kollektivinin sənətkarıq bacarığı, əməyi Gürcüstan Teatr Xadimləri İttifaqının sədri, SSRİ xalq artisti Qiqa Lordkipanidzenin diqqətindən də kənarda qalmadı. O böyük sənətkar kollektivi İttifaqda qonaq etdi, Gürcüstanın mötəbər sənətkarları ilə kollektivi bir araya gətirdi. Hər iki respublikanın teatr xadimlərinin görüşünü təşkil etdi. Geniş sənət söhbətləri zamanı İrəvan Azərbaycan Teatrının didərginlik taleyinin təəssüfedici vəziyyəti barədə söhbətlər aparıldı. Suxumi Tearı ilə İrəvan Teatrının tale qohumluğu vurğulandı. Bu günlərin ömrünün az olacağı inamla dilə gətirildi. Sonda ö böyük sənətkar Q.Lordkipanidze tərəfindən İrəvan Teatrının kollektivi Gürcüstan Teatr Cəmiyyyətinin Fəxri Fərmanı ilə təltif edildi. Böyük bir bölgəni əhatə edən bu qastrol səfərində İrəvan Azərbaycan Teatrı Tiflis və Rustavi şəhərləri ilə yanaşı Marneuli rayon mərkəzində və onun iki kəndində (Kəpənəkçi, Sadaxlı), Bolnisi, Qardabani rayon mərkəzlərində və Kaspi rayonunun Cələ kəndində həm tamaşalar oynadı, həm də rəsmi görüşlər həyata keçirdi. Bu səfər təkcə Gürcüstanda yaşayan azərbaycanlılara mədəni xidmətlə kifayətlənmədi, eyni zamanda İrəvan Teatrının və onun simasında ümumən Azərbaycan teatr sənətinin Gürcüstan Respublikasında geniş təbliğinə çevrilən dolğun mənzərə yaratdı. Həmin qastrol səfərində İrəvan Azərbaycan Teatrının kollektivini, Kvemo-Kartli – Borçalı bölgəsinin qubernator müavini və həmin bölgədə Prezidentin səlahiyyətli nümayəndəsi olaraq mən müşayiət edirdim. Teatrın uğurlu çıxışlarının yekununda kollektivin əməyi və yüksək sənət nümayişi quberniyanın təmsilçisi olaraq tərəfimdən fəxri fərmanla təltif edildi. Şahidi olduğum bütün uğurlar bu gün də dillərdə danışılır. İrəvan Azərbaycan Teatrının kollektivi daha sonra, 2014-cü ilin 8-12 may tarixlərində, Gürcüstan Teatr Xadimləri İttifaqı və “Günəş” Assosiasiyasının dəvəti ilə Gürcüstanın Tiflis, Rustavi, Qardabani, Marneuli, Bolnisi rayonlarında Azərbaycanın dövlətçilik tarixini əks etdirən, şair-dramaturq, istedadlı aktyor və rejissor, həmyerlimiz İftixar Piriyevin müəllifi olduğu, ulu öndər Heydər Əliyevin həyat və fəaliyyətinə həsr olunmuş, o dahi şəxsiyyətin ideyalarını təbliğ edən “Nurlu ömrün anları” mənzum tamaşası ilə qastrol səfərinə gəldi. Bu səfər də əvvəlki səfərlər kimi uğurla keçdi. 2015-ci ildən başlayaraq isə, İrəvan Azərbaycan Teatrı Heydər Əliyev Fondunun vitseprezidenti Leyla xanım Əliyevanın “Xocalıya ədalət!” Beynəlxalq təbliğat və təşviqat kompaniyası kontekstində Gürcüstanda müxtəlif əsərlərlə sanballı, geniş təbliğat və təşviqat işləri aparır. Bu işlər sırasında 26 fevral 2015-ci ildə, gürcü yazıçısı Nodar Dumbadzenin əsərlərinin motivləri əsasında hazırlanan “Didro” tamaşasını xatırlamaq istəyirəm. Tamaşa İrəvan Teatrının, Gürcüstan Mədəniyyət və Abidələrin Qorunması Nazirliyi və Heydər Əliyev adına Tbilisi Dövlət Peşəkar Azərbaycan Dram Teatrının birgə layihəsi olaraq təqdim olunurdu. Tamaşanın ilk premyerası Bakı şəhərində gerçəkləşmişdi, ikinci tamaşası isə N.Dumbadze adına Tiflis Dövlət Gənc Tamaşaçılar Teatrının səhnəsində oynanıldı. Layihənin məzmunu və yüksək peşəkarlıqla təqdim olunan tamaşa İrəvan Azərbaycan Teatrının kollektivi ilə birgə, Tiflis Azərbaycan Teatrının kollektivinə də, gürcü sənət xadimlərinin, eləcə də həm gürcü, həm də azərbaycanlı ziyalı təbəqəsinin rəğbətini qazandırdı. İrəvan Azərbaycan Teatrı bütün qastrol səfərlərində: Yüksək bədii keyfiyyətli tamaşaları ilə Tiflis teatr ictimaiyyətinin diqqətini cəlb edir; Gürcüstanda yaşayan azərbaycanlılara mədəni xidmət göstərməklə yanaşı, maarifləndirmə işini təmin edir; Tiflis Azərbaycan Dram Teatrının inkişafına kömək göstərir; Gürcü mühitində Azərbaycanın milli-mənəvi dəyərlərini geniş miqyasda təbliğ edir; Azərbaycançılıq məfkurəsinin təbliğini təlqin edir; İrəvan Azərbaycan Teatrının simasında İrəvan həqiqətlərini dünyaya aydınladır və s. Hesab edirik ki, bu cür fəaliyyət prinsipi bir sənət ocağı olaraq İrəvan Azərbaycan Teatrının misilsiz xidmətidir.
Belə yüksk səmərəli xidmətlərini və 140 yaşının tamam olmasını nəzərə alaraq, unudulmaz C.Cabbarlı adına İrəvan Dövlət Azərbaycan Dram Teatrının dəyərli kollektivini Gürcüstanda yaşayan azərbaycanlılar adından ürəkdən təbrik edirik! Onları Gürcüstanda hər zaman gözləyirik! Hörmətli Anar müəllim! Teatrın 140 illiyi münasibəti ilə, bu doğma kollektivin Gürcüstanda yaşayan azərbaycanlılarla növbəti görüşünün təşkil olunmasına köməklik göstərmənizi Sizdən xahiş edirik!”
