Azərbaycan Respublikası Vəkillər Kollegiyası 2017-ci ilin dekabr ayından islahatlar və inteqrasiya yönümlü strategiya ilə fəaliyyət göstərməyə başlamışdır. Belə ki, kollegiyaya qəbulun sürətləndirilməsi, qəbul zamanı şəffaflıq, dürüstlük və ədalətlilik, maddi-texniki bazanın yenidən formalaşdırılması, yeni vəkil qurumlarının yaradılması, regionlarda olan vəkil çatışmamazlığı probleminin həlli, vəkillərə dəstək üçün fondun yaradılması və həmin fonddan səmərəli istifadə, cəmiyyətə açıqlıq, müasir innovasiyaların tətbiqi, elektron xidmətlərdən, o cümlədən vəkil fəaliyyəti ilə bağlı bir çox qanunlara, həmçinin prosessual məcəllələrə və digər qanunvericilik aktlarına əlavə və dəyişiklərin edilməsinə nail olunması və digər çoxsaylı islahatlar aparılmışdır. Kollegiya əsas fəaliyyət istiqaməti kimi insan hüquqlarının və azadlıqlarının qorunması istiqamətində çox aktiv olmuş, xüsusən əhalinin aztəminatlı və sosial həssas təbəqələrinə münasibətdə böyük həcmli işlər görmüşdür.
Kollegiyanın sədri cənab Anar Bağırovun təşəbbüsü və dəstəyi ilə son illərdə 25 000-dən çox aztəminatlı vətəndaşa göstərilən pulsuz hüquq yardım buna misal ola bilər.
Eyni zamanda dövlət hesabına göstərilən pulsuz yardımın kefiyyəti artırılmış, formal vəkilliklə mübarizə gücləndirilmişdir.
Bundan əlavə Kollegiya sosial və idman sahələrində də aktiv fəaliyyət göstərən bir quruma çevrilmişdir.
Lakin bütün bu islahatlardan bəlkə də ən vaciblərindən biri beynəlxalq sahədə aparılan işlər və fəaliyyətdir. Qeyd etmək lazımdır ki, son illərdə aparılan məqsədyönlü və davamlı fəaliyyət nəticəsində Azərbaycan Respublikası Vəkillər Kollegiyasının beynəlxalq əlaqələri genişlənib, kollegiya çoxsaylı istər regional, istərsə də qlobal miqyaslı beynəlxalq təşkilatlara üzv olub, demək olar çox cidd tədbirlərdə fəal iştirak edir, hətta bir sıra hallarda mötəbər beynəlxalq tədbirlərə ev sahibliyi edir. Keçirilən bütün tədbirlər və bu sahədə Kollegiyanın fəaəliyyəti haqqında ictimaiyyətə daimi olaraq geniş məlumat təqdim edilir. 13 may 2022-ci il tarixdə isə Azərbaycan Respublikasının sədri Anar Bağırovun rəhbərliyi ilə aparılan uzun müddətli mübarizə nəticəsində olduqca ciddi bir uğur qazanıldı. Doğrusu bu o qədər mürəkkəb məsələ idi ki, proses tam sonlanmayanadək inanmaq da bir az çətin idi. Söhbət Azərbaycan Respublikası Vəkillər Kollegiyasının CCBE-yə (Avropa Vəkillər Kollegiyaları Assosiyası) üzvlüyə qəbul edilməsindən gedir. Belə ki, bu il mayın 13-də İrlandiyanın paytaxtı Dublin şəhərində keçirilən plenar iclasda uzunmüddətli sual-cavab prosesindən sonra Vəkillər Kollegiyası böyük səs çoxluğu ilə CCBE təşkilatına üzv olub.
Qeyd olunmalıdır ki, “CCBE” Avropa Şurası və Avropa İttifaqına üzv olan ölkələrin vəkillər kollegiyalarını və 1 milyondan çox vəkili birləşdirən nüfuzlu təşkilatdır. Təşkilatın fəaliyyətinin əsas məqsədini vəkil peşəsini tənzimləyən normativ qaydaların qəbulu vasitəsilə qanunun aliliyi, insan haqları və demokratik dəyərlərin müdafiəsi təşkil edir. Hesab edirik ki, bu, son dörd ilin ən böyük uğurlarından biridir. Bu uğur ölkəmizin imicinə də müsbət təsir göstərir. İllər ərzində həmin təşkilatla gərginlik yaşanıb və tənqidi fikirlər səsləndirilib. Amma dövlətimizin uğurlu xarici siyasəti nəticəsində bizə qarşı münasibətlər artıq dəyişir, beynəlxalq sahədə aktiv fəaliyyət, bu kimi uğurlar və üzvlüklərlə əsassız fikirlərə qarşı mövqe sərgiləmək və ölkəmizin maraqlarını dəstəkləmək imkanı daha çox yaranmış olur.
Bu üzvlüklə Azərbaycan vəkillərinin avropalı vəkillər, kollegiyalar, o cümlədən hüquq cəmiyyətləri ilə əməkdaşlıq imkanları genişlənəcək. Avropada təcrübə keçmək imkanları mümkün olacaq, vəkillərin peşə hazırlığı artırılmaqla, onların fəaliyyətinin Avropa standartlarına uyğun həyata keçirilməsində müstəsna əhəmiyyət kəsb edəcəkdir. Bu, eyni zamanda, Vəkillər Kollegiyasının işinin daha da təkmilləşdirilməsi üçün böyük imkanlar yaradır. Təbii ki, bu uğura aparan yol Azərbaycanda həyata keçirilən ardıcıl hüquqi islahatlar, vəkillik institutunun təkmilləşdirilməsi istiqamətində dövlət səviyyəsində atılan ciddi addımlar və mütərəqqi təcrübəyə söykənən səmərəli fəaliyyətlə müşaiyət olunur. Ötən dövr ərzində “CCBE” ilə əməkdaşlıq çərçivəsində Azərbaycan vəkillərinin peşə davranış qaydalarını tənzimləyən əsasnamə CCBE-nin Avropa vəkillərinin etik davranış kodeksinə uyğunlaşdırılıb, kodeksin mütərəqqi normaları əsasnaməyə inkorporasiya olunub. Bundan əlavə, Avropa İnsan Haqları Məhkəməsinin presedent praktikası, habelə deontolgiya mövzularında keçirilən təlimlər Azərbaycan vəkillərinin peşə hazırlığının yüksəlməsinə mühüm töhfə verib. Bu, eyni zamanda Vəkillər Kollegiyasının işinin mütərəqqi metodların tətbiqi ilə daha da təkmilləşdirilməsinə təsir göstərən mühüm amildir. Böyük siyasi əhəmiyyət kəsb edən bu nailiyyət həm də Azərbaycan vəkilləri üçün artıq beynəlxalq tribuna vasitəsilə Ermənistanın Azərbaycana qarşı törətdiyi müharibə cinayətlərini digər beynəlxalq təşkilatlara və dünya ictimaiyyətinə çatdırmaq imkanı yaradır. İkili standartların hələ də mövcud olduğu bir şəraitdə Azərbaycan Vəkillər Kollegiyasının Avropanın nüfuzlu CCBE təşkilatına böyük səs çoxluğu ilə üzv seçilməsi həm də ölkəmizin bugünkü reallıqlarının etirafı və son illər demokratiyanın, insan hüquqlarının daha vüsətlə inkişaf etdiyi Azərbaycanın hüquq institutlarının fəaliyyətinə verilən yüksək qiymətdir. Vüqar BABAYEV Azərbaycan Vəkillər Kollegiyasının Rəyasət Heyətinin üzvü
