Azərbaycan dövləti gücləndikcə və beynəlxalq aləmdə nüfuzu daha da artıqca bəzi qüvvələr bunu həzm edə bilmirlər. Öz çirkin niyyətlərini müxtəlif təxribatlarla, saxta məlumatlar yaymaqla, feyk xəbərləri ictimai rəyə yeritməklə həyata keçirmək istəyirlər. İndi saxta gündəm yaratmaq və bunun ətrafında süni ajiotaj düzüb-qoşmaq dəbə düşüb. Son həftələr Azərbaycanda Konstitusiyaya dəyişikliklərinin edilməsi ilə bağlı referendumun keçiriləcəyi barədə yayılan söz-söhbət, dedi-qodu da bu qəbildəndir ki, bununla da saxta gündəm yaratmaq istədilər.
Onu da vurğulayaq ki, bu yalan məlumat ilk olaraq “BBC Azərbaycan” tərəfindən ortaya atıldı və hətta bu saxta iddianın daha geniş oxucu kütləsinə çatdırılması üçün xəbər sosial şəbəkələrdə reklama da qoyulub. Onu da bilirik ki, Azərbaycandakı müəyyən qrupların informasiya dəstəyi ilə şaiyələr daha da geniş yayılıb. Təəssüflər olsun ki, sonradan bir sıra xəbər portalları da bu “feyk”i tirajlamağa başladı və söz-söhbətlər ictimai-siyasi sferada da müzakirə predmetlərindən birinə çevrildi.
Ekspertlər deyir ki, onların məqsədi “Teknofest”, “Formula-1 və s. kimi vacib tədbirlər ərəfəsində ölkədə siyasi gündəmi süni şəkildə gərginləşdirməkdir. Ekspertlərin sözlərinə görə, referendum dedi-qoduları ilə Azərbaycanda saxta gündəm yaratmaq istəyənlərin ucu xaricə uzanır. Ümumiyyətlə, həmin qüvvələr saxta gündəm yaratmaqla nə əldə etmək istəyirlər?
“Hansısa qüvvələrin saxta referendum xəbəri ilə süni gündəm yaratmaq cəhdləri əlbəttə nəticə vermədi, verməsi gözlənilmirdi də”
Siyasi şərhçi Azər Həsrət baki-xeber.com-a açıqlamasında bildirdi ki, bəzi qüvvələr Azərbaycanın həqiqətən də çox vacib günlərində ortaya dəxli olmayan və ictimaiyyətin diqqətini yayındıracaq məsələlər atırlar. “Bu da, təbiidir ki, planlıdır, məqsədlidir. İstər referendumla bağlı saxta məlumatların ortaya atılması, istərsə də Azərbaycanın ən ümdə məsələlərini arxa plana keçirmə cəhdləri illərdir müşahidə edilir. Biz də bunları başa düşürük. Fikir verirsinizsə, Azərbaycan ictimai rəyi istər “Teknofest”, istərsə də digər vacib tədbirlərdən heç də yayınmır. Niyə yayınmır? Çünki Azərbaycan dövlətinin bəyan etmədiyi məsələlər ətrafında kimlərinsə uydurma fikirləri ictimaiyyətimizi məşğul etmir. Bizim cəmiyyətimiz kifayət qədər ayıq-sayıqdır, bu cür məsələlərdə diqqətlidir. Ona görə də kimlərinsə süni gündəm yaratmaq cəhdləri Azərbaycanda alınmır. Azərbaycan ictimai rəyi kifayət qədər sağlamdır. Yəni bizim ölkəmizdə hadisələrə, informasiyalara çox ehtiyatla yanaşılır. Vətəndaşlarımız yetərincə savadlıdır, bu cür məsələlərdə diqqətlidir. O baxımdan hansısa qüvvələrin saxta referendum xəbəri ilə süni gündəm yaratmaq cəhdləri əlbəttə nəticə vermədi, verməsi gözlənilmirdi də”.
A.Həsrətin sözlərinə görə, həmin feyk xəbərləri yazanlar sadəcə olaraq bir cəhd etdilər ki, bunun alınıb-alınmadığını müəyyən etsinlər, amma alınmadı. O hesab edir ki, bu saxta məlumatları yayanlar, xüsusən də “Teknofest”dən əndişələnənlərdir: “Bilirsiz ki, “Teknofest” Türkiyə-Azərbaycan qardaşlığının yeni mərhələyə yüksəlməsinin göstəricisidir ki, məqsədləri bu tədbirdən diqqəti yayındırmaq idi. Müşahidə edirəm ki, əsla və əsla əsas gündəmdən diqqət yayınmayıb. İnsanlarımız “Teknofest”ə, 28 May - Müstəqillik Gününə, cənab Prezidentin Şərqi Zəngəzur və Qarabağ İqtisadi Rayonlarına səfərlərinə köklənib. Yəni insanlarımızı düşündürən, maraqlandıran məsələlər bunlardır. Kimlərsə siyasi gündəmi dəyişməyə cəhd edirsə bunlar da nəticə vermir, nəticə verməsi də gözlənilmir”.
İradə SARIYEVA
