Mayın 13-də Azərbaycan Respublikasının Baş nazirinin imzaladığı qərara əsasən Azərbaycanda kütləvi informasiya məhsullarının, kitabların və dərslik komponentlərinin, həmçinin həmin məhsulların istehsalı və nəşri ilə bağlı kağızın idxalı və satışı Əlavə dəyər vergisindən (ƏDV) azad edilib. Bundan sonra kitab, qəzet, jurnal və onların istehsalı ilə bağlı kağız məhsullarının idxal və satışına görə 18 faiz ƏDV tutulmayacaq.
Maraqlıdır, bu qərar çap mediasının iqtisadi müstəqilliyinin möhkəmlənməsində, iqtisadi durumunun inkişaf etməsində nə kimi rol oynayacaq?
"Novoye vremya" qəzetinin baş redaktoru Şakir Ağayev bildirdi ki, Baş nazirin məlum qərarını müsbət dəyərləndirir: “Məlumdur ki, dünyada qiymətlərin yüksəlməsi kağız məmulatlarına da təsirsiz ötüşməyib. Qiymət artımının media subyektləri üzərində xərclərin minimallaşdırmasına dəstək məqsədilə dövlət bu tip məhsulların idxalını 18 faiz ƏDV-dən azad edib. Bu qərar həmin məhsulların qiymətlərinin əlavə dəyər vergisi qədər ucuzlaşmasını, qiymətlərin aşağı olmasını stimullaşdıracaq, bununla da çap mediası məhsullarının inkişafına təkan verəcək. Bu məsələ dəfələrlə MEDİA-da müzakirə olunub, ayrı-ayrı qəzet-jurnal rəhbərləri, mətbuat yayımçılarının iştirakı ilə qaldırılıb. MEDİA-nın bu məsələyə həssas yanaşmasının, təklifləri yuxarı instansiyalara çatdırmasının nəticəsidir ki, Baş nazir tərəfindən məlum qərar qəbil edilib".
Ş.Ağayev hesab edir ki, qəzet kağızının da ƏDV-dən azad olunması həm də mətbəələrin işinə müsbət təsirini göstərəcək, eyni zamanda, çap mətbuatının inkişafına səbəb olacaq.
“Bu qərar çap mediası subyektlərinin və çap məhsullarının yayımını həyata keçirən şirkətlərin iqtisadi dayanıqlılığının artmasına əhəmiyyətli dərəcədə təsir göstərəcək”
“Demokrat.az” xəbər portalının baş redaktoru Vasif Həsənli bildirdi ki, Baş nazirin verdiyi müvafiq qərarla bundan sonra bundan sonra kitab, qəzet, jurnal və onların istehsalı ilə bağlı kağız məhsullarının idxal və satışına görə 18 faiz ƏDV tutulmayacaq: “Bu qərarla çap mediasının inkişafında yeni mərhələyə başlayır. Çünki ƏDV-nin ləğvi çap mediası məhsullarının maya dəyərini və onların istehsal xərclərini əsaslı azaltmaqla inkişafına təkan verəcək. Məsələ ilə bağlı ölkənin çap mediası subyektləri rəhbərləri ilə Azərbaycan Respublikasının Medianın İnkişafı Agentliyində aparılan müzakirələr və yayım şirkətləri ilə görüşlərdə səsləndirilən fikirlər bu yanaşmanı dəstəkləyir. Xüsusilə ƏDV-nin ləğvi qəzetlərin çap olunmasında maliyyə yükünü azaldacaq ki, bu da redaksiyaların imkanlarını artıracaq. Maliyyə imkanının artması həm çap mediasının inkişafına, həm də peşəkarlığın artmasına gətirib çıxaracaq. Çünki daha yaxşı əmək haqqı əməkdaşların da peşəkarlığına və işin keyfiyyətinə müsbət təsir edən amildir. ƏDV-nin ləğvinə ümumilikdə media sahəsində islahatların tərkib hissəsi hesab etmək olar. Son illər aparılan islahatların hədəfi həm çap, həm onlayn medianın inkişafına hesablanıb. İstər ayrılan maliyyənin ədalətli bölünməsi, istər redaksiyaların texniki bazasının yaxşılaşdırılması, istərsə peşəkarlığın artması ilə bağlı görülən işlər göz önündədir və təbii ki, nəticələri də olur. Beləliklə, Vergi Məcəlləsinə edilmiş müvafiq dəyişiklik və ƏDV-nin ləğvi qərarı media sahəsində aparılan əsaslı islahatların ardıcıllığının və vahidliyinin təmin edilməsinin, eləcə də bu sahədə görülən tədbirlərə kompleks yanaşmanın təzahürü olmaqla, çap mediası subyektlərinin və çap məhsullarının yayımını həyata keçirən şirkətlərin səmərəli fəaliyyətinə və iqtisadi dayanıqlılığının artmasına əhəmiyyətli dərəcədə təsir göstərəcək”.
Günel CƏLİLOVA
