"Xankəndi şəhəri və işğaldan azad edilmiş digər ərazilər Azərbaycanın suveren ərazisidir və əzəli Azərbaycan torpaqlarıdır. Həmin ərazilərdə qaz infrasturkturunda və yaxud digər infrastrukturlarda işlər yalnız Azərbaycan dövləti tərəfindən görülə bilər”. Bunu Azərbaycan Dövlət Neft Şirkətinin (SOCAR) ”Azəriqaz” İstehsalat Birliyinin Yeni qazlaşma və inkişaf şöbəsinin rəisi Teymur Cəfərov media və QHT nümayəndələri üçün keçirilən “Açıq qapı” aksiyasında bildirib. Qeyd edilib ki, Xankəndi şəhəri də daxil olmaqla, Qarabağ iqtisadi zonası 1980-cı illərdə Azərbaycan dövləti tərəfindən qazlaşdırılıb: “Orada qaz infrastrukturu yaradılıb. Sonrakı işğal dövründə kommunikasiyaların böyük bir qismi ermənilər tərəfindən dağıdılıb, viran edilibdir. Hazırda Xankəndi şəhəri təbii qazla təmin olunur".
Maraqlıdır, Xankəndiyə Azərbaycanın verdiyi qazın müqabilində ermənilərdən pul necə toplanacaq?
"Qeyd olunan ərazilərin qazla təmininin Azərbaycan tərəfindən reallaşması yalnız bizim ölkənin nüfuzunun artmasına səbəb olacaq"
İqtisadçı Akif Nəsirli bildirdi ki, Xankəndi və sülhməramlıların olduğu ərazinin qaz təminatı Azərbaycan tərəfindən tam şəkildə icra edilmir: "Azəriqaz” İstehsalat Birliyi o ərazilərin qazla təminatı ilə məşğul deyil. Sadəcə olaraq, Ermənistandan gələn kəmər Azərbaycanın ərazisindən keçir".
Həmsöhbətimiz onu da əlavə etdi ki, qeyd olunan ərazilərin qaz təminatının Azərbaycan tərəfindən reallaşması yalnız bizim ölkənin nüfuzunun artmasına səbəb olacaq. Bu hadisə o anlama gəlir ki, Azərbaycan öz ərazilərini qazla təmin edir.
Xankəndi ermənilərindən qaza görə ödənişin necə toplanılmasına gəlincə, ekspert bildirdi ki,bu heç də problemli məsələ deyil: "Adıçəkilən qurumun həmin bölgədə işçiləri olacaq, onlar qaza görə ödənişi adi qaydada toplayacaqlar. Bu texniki məsələdir. Onu da qeyd edim ki, Xankəndidə pul vahidi kimi Ermənistan dramından istifadə olunur. Dramı məzənnəyə uyğun olaraq dəyişə bilərik".
Günel CƏLİLOVA
