Xəbər verildiyi kimi, Prezident İlham Əliyevin imzaladığı sərəncama əsasən, gələn il yanvarın 1-dən təhsil işçilərinin əmək haqları artırılacaq. Sərəncam ümumilikdə 165 min təhsil işçisini əhatə edəcək. Sözügedən artımı təmin etmək üçün büdcədən 273 milyon manat vəsaitin ayrılması nəzərdə tutulub. Təhsil işçilərinin məvaciblərinin nə qədər artacağı da bəlli olub. Belə ki, ümumi təhsil müəssisələrində çalışan, bilik və bacarıqlarının diaqnostik qiymətləndirilməsi aparılan müəllimlərin maaşları orta hesabla 20 faiz artacaq.
Gənclərin çağırışaqədərki hazırlığı rəhbərlərinin maaşları isə orta hesabla 40 faiz artırılır. O cümlədən, peşə təhsili müəssisələrində çalışan müəllimlərin və işçilərin maaşları da eyni qaydada artacaq. Bircə bu sahədə çalışan fiziki tərbiyə rəhbərlərinin maaşları orta hesabla 30 faiz artırılır. Bütün bunlar, təbii ki, ölkədə təhsil işçilərinin sosial müdafiəsinə diqqət və qayğı göstərilməsinin göstəricisidir. Çünki təhsilin inkişafı son dərəcə vacibdir. Ona görə ki, bu sahədə olan nailiyyətlər digər sahələrin də inkişafına təkan verir. Bütün bu deyilənlərin fonunda, artım müəllimlərin sosial rifahının yaxşılaşdırılması baxımından nə deməkdir? Konkret olaraq təhsil işçilərinin maaşı neçə manat artacaq?
“Pedaqoji stajı çox olan müəllimlər daha çox maaş alacaq”
Məsələyə münasibət bildirən AVCİYA-nın vitse-prezidenti, professor Məhərrəm Zülfüqarlı buna bir neçə aspektdən yanaşdı: “Əvvəla, belə bir qərarın verilməsini çox müsbət dəyərləndirirəm. Çünki sözügedən sərəncam bütün hallarda müsbət qarşılanmalıdır. Müəllim peşəsi çox çətin və məsuliyyətli bir işdir. Bu səbəbdən qiymətlərin bahalaşdığı indiki vaxtda təhsil işçilərinin məvaciblərinin artırılmasını müsbət dəyərləndirirəm. Konkret rəqəmlərə gəldikdə isə, maaşlar təhsil işçilərinin iş stajına, dərs saatına görə artacaq. Məsələn, dövlət peşə təhsili müəssisələrində çalışanların maaşı orta hesabla 690-700 manat olacaq. Lisey və gimnaziyalarda çalışan müəllimlərin orta maaşı təxminən 950-1000 manat, xüsusi təhsil müəssisələrində çalışan müəllimlərin orta aylıq maaşı 1200-1250 manat arasında olacaq. Pedaqoji stajı 3 ilə qədər olan müəllim 460 manat alırsa, yanvarın 1-dən sonra bu, 552 manat olacaq. Pedaqoji stajı 3 ildən 8 ilə qədər olan müəllimin maaşı 495 manatdırsa, artımdan sonra bu 594 manat olacaq. Pedaqoji stajı çox olan müəllimlər daha çox maaş alacaq. Yəni deməyim odur ki, bu kateqoriya üzrə maaşların məbləği dəyişəcək”.
Professor onu da qeyd etdi ki, təhsil sahəsi daim diqqət mərkəzində saxlanılmalıdır.
Vidadi ORDAHALLI
