Oktyabrın 22-də İstanbulda Türkdilli Dövlətlərin Əməkdaşlıq Şurasının (Türk Şurası) mediaforumu öz işinə başlayıb. Türkiyə Prezidenti Administrasiyasının Kommunikasiya İdarəsi tərəfindən “Köklü keçmiş, güclü gələcək" şüarı ilə keçirilən tədbirdə türk dünyasında media, serial və film sektorlarında əməkdaşlığın inkişafı və sair məsələlər müzakirə edilib.
Heç şübhəsiz, ortaq tariximiz, mədəniyyətimiz olan türk xalqları, türk dövlətləri ilə müştərək filmlərin, serialların çəkilməsi çox önəmlidir və bu bizim aramızdakı bağları daha da möhkəmləndirir.
“Serial və film sektorlarında əməkdaşlıqların inkişafı məsələləri dünən müzakirə edildi”
İstanbul platformasının bütün cəhətlərdən, o cümlədən də kino və serial sahəsinin inkişafında mühüm rol oynaya biləcəyi qənaətində olan İstanbul mediaforumunun iştirakçılarından biri, siyasi şərhçi Azər Həsrət baki-xeber.com-a bildirdi ki, kino və seriallarla bağlı paneldə iştirak edib. “Serial və film sektorlarında əməkdaşlıqların inkişafı məsələləri dünən müzakirə edildi. Mən özüm də həmin müzakirələrdə iştirak etdim. Azərbaycandan, Türkiyədən, Qazaxıstandan kino sektorunun təmsilçiləri bir araya gəldilər. Eyni zamanda da televiziya təmsilçilərinin, özəlliklə də Türkiyənin TRT 1 kanalının baş direktorunun iştirakı ilə bu müzakirələr keçirildi. Ümimi fikir ondan ibarət oldu ki, ilk olaraq türk xalqları film və serialların çəkilməsi üçün bir araya gəlməlidir. İkincisi, türk ölkələrində çəkilmiş filmlərin bütün türk dünyasında, coğrafiyasında yayılması üçün vahid mərkəz yaradılmalıdır, ona bənzər bir qurum formalaşdırılmalıdır. Üçüncü tərəfdən isə, ümumiyyətlə kino sahəsində çalışan rejissorlar, operatorlar, aktyorlar və sair sahəsində də mübadilələrin olması önə çəkildi. Yəni belə olacağı təqdirdə türk xalqlarının inteqrasiyasına film, serial sektoru vasitəsilə də əlavə bir yardım edilmiş olacaq.
Əlbəttə, bu müzakirələrdə TRT 1-dən tanınan və Azərbaycanda da sevilən film və serialların təmsilçiləri iştirak etdilər. Qazaxıstanın bu yaxınlarda çəkib tamaşaçılara təqdim etdiyi “Tomris” filminin rejissoru və baş rolun ifaçısı orada iştirak edir. Azərbaycandan isə Elçin Musaoğlu təqdimatla çıxış etdi. Yeri gəlmişkən, ən maraqlı ideyaları verənlərdən biri də o oldu. Filmlərin türk coğrafiyasında yayımlanması təklifini verdi və bu təklif də digər iştirakçılar tərəfindən təqdir edildi.
Şübhəsiz, bütün bunlar ona xidmət edir ki, türk dövlətləri və türk xalqları arasında inteqrasiya prosesi sürətlənsin və film sektoru da bu proseslərə əlavə imkanlar açsın. Düşünürəm ki, bu müzakirələr doğrudan da türk dövlətləri arasında inteqrasiyaya əlavə stimul verəcək”.
A.Həsrət hesab edir ki, müştərək filmlərin, serialların çəkilməsi, filmlərin bütün türk coğrafiyasında yayılması, təbliğatı çox mühümdür. Bu ciddi məsələnin də İstanbul mediaformunda müzakirəyə çıxarılmasının xüsusi anlamı olduğunu deyən A.Həsrətin sözlərinə görə, türk xalqlarının ortaq tarixləri ilə bağlı film və seriallar yaradılmalı, müştərək filmlər çəkilməlidir. O qeyd etdi ki, bu sahədə əməkdaşlığın inkişafında İstanbul platformasının xüsusi yeri var.
İradə SARIYEVA
