Sentyabr ayının 1-dən Azərbaycanda restoranlar, iri ticarət mərkəzləri, mehmanxalar və s. yerlərə giriş üçün 18 yaşdan yuxarı şəxslərdən COVID-19 pasportu tələb ediləcək. Bu barədə Nazirlər Kabinetinin “Xüsusi karantin rejiminin müddətinin uzadılması və bəzi məhdudiyyətlərin aradan qaldırılması ilə bağlı tədbirlər barədə” qərarında etdiyi dəyişiklikdə bildirilir. Sentyabrın 1-nə sayılı günlər qalıb. Vaksin olunmaq üçün xəstəxana və poliklinikalara üz tutan şəxslərin sayı günü-gündən artır. Əksər poliklinikaların qarşısında vaksin üçün növbə gözləyən insanların izdihamını müşahidə etmək olar.
Qeyd etdiyimiz kimi, iaşə obyektlərindən istifadə etmək istəyənlər və ən əsası sağlamlığı üçün vaksin vurdurmaq istəyən şəxslərin sayı günü-gündən artır. Ancaq bu vəziyyətdən heç də hər kəs istifadə edə bilmir. Belə ki, ölkə ərazisində yaşayan əcnəbilər vaksinasiya prosesindən kənarda saxlanılır. Qaydaya əsasən, Azərbaycanda yalnız müvəqqəti və ya daimi yaşama icazəsi olan şəxslər vaksin vurdura bilər. Digər miqrantlar üçün isə belə bir qayda nəzərdə tutulmayıb. Bununla bağlı narazılıqlarını ifadə edən əcnəbilər bildirirlər ki, hansı tibb məntəqəsinə yaxınlaşsalar da, peyvənd vurdura bilmirlər. Bu baxımdan özlərini təhlükədə hiss edirlər və növbəti mərhələdə tətbiq olunacaq qadağaları necə dəf edəcəklərini düşünürlər.
Yoluxmanın sürətlə artdığı bu günlərdə isə bu, həm əcnəbilərin özü, həm də ətrafdakı insanlar üçün ciddi təhlükə mənbəyidir.
“Rəsmi qeydiyyatda olan əcnəbilər Azərbaycanda Vaksinasiya Strategiyasında nəzərdə tutulan kateqoriyaya aid olduqları halda onların peyvənd olunmasında heç bir problem yoxdur”
Məsələ ilə bağlı Səhiyyə Nazirliyindən bildirildi ki, bu gün ölkəmizdə rəsmi qeydiyyatda olan əcnəbilər Azərbaycanda “COVID-19 xəstəliyi əleyhinə 2021-2022-ci illər üçün Vaksinasiya Strategiyası”nda nəzərdə tutulan kateqoriyaya aid olduqları halda onların peyvənd olunmasında heç bir problem yoxdur: “Azərbaycanda iş icazəsi əsasında, eləcə də müvəqqəti və daimi yaşama əsasında icazəsi olanlar ərazi üzrə qeydiyyatda olduqları poliklinikalara müraciət edərək vaksin edilə bilərlər. Bunun üçün xarici ölkə vətəndaşı kimliyini təsdiq edən və Azərbaycanda müvəqqəti yaşama icazəsi olan sənədi poliklinikaya təqdim etməklə COVID-19 əleyhinə peyvənd edilə bilər”.
Günel CƏLİLOVA
