Ölkəmizdə koronavirusa yoluxanların sayının sürətlə artmasının şahidi oluruq. Bildiyimiz kimi, bir qayda olaraq hər həftənin şənbə və bazar günləri ictimai nəqliyyatın fəaliyyəti dayandırılır. Avqustun 14-dən 16-na qədər ölkə üzrə ictimai nəqliyyat işləməyəcək, metro və avtobuslar sərnişinlərə xidmət göstərməyəcək.
Daha hansı məhdudlaşdırıcı tədbirlər görülməli, nələr edilməlidir ki, yoluxmanın qarşısı alınsın?
“...O müəssisələrdə xidmətlərin məhdudlaşdırılması zəruridir”
Milli Qeyri Hökumət Təşkilatları Forumunun prezidenti Rauf Zeyni baki-xeber.com-a açıqlamasında bildirdi ki, koronavirusla mübarizədən uğurla çıxmağımız olduqca vacibdir. “Biz bu gün bütün dünyanı imtahana çəkən pandemiyaya qarşı mübarizəni davam etdiririk. Bu pandemiyanın sonunu gözləyirik, amma sonu görünmür. İndiyə qədər bir sıra mərhələlər keçmişik, indi də vacib mərhələlərdən birinə yaxınlaşırıq. Koronavirusa yoluxanların sayında artım müşahidə edilir. Ona görə də Bakı Şəhər İcra Hakimiyyəti, eləcə də Bakının 12 rayonunun icra hakimiyyətləri müxtəlif tədbirlər haqqında göstərişlər, sərəncamlar verirlər. Əlbəttə, bu istiqamətdə geniş maarifçilik tədbirləri aparılır. Amma maarifçilik işinin daha da genişləndirilməsinə, vərəndaşların məsuliyyətinin artırılmasına ciddi ehtiyac var. Vətəndaşların beynindən “pandemiya bizə heç nə edə bilməz” fikirləri birdəfəlik çıxmalıdır. Yumşalmaların davam etməsindən sui-istifadə edilməməlidir, vətəndaşlar imkan verməməlidir ki, pandemiyaya yoluxanların sayı daha da artsın. Buna qətiyyən yol vermək olmaz. Bütün qoruyuculuq tədbirlərinə ciddi yanaşılmalıdır, vətəndaş məsuliyyəti artırılmalıdır. Əlbəttə ki, qeyd edilən icra orqanlarında çalışan məmurların hər biri də bu tədbirlərin həyata keçirilməsinə çalışmalıdır. Çünki bəzi hallarda görürsüz ki, verilən tapşırıqlara, qarşıya qoyulan məqsədlərə müəyyən mənada məmurlar tərəfindən etinasız yanaşılır, məmur öz vəzifəsini lazımı səviyyədə icra etmir. Bu məsələlərdə də boşluq yaranır, bu da cəmiyyətdə pandemiyanın daha geniş yayılmasına gətirib çıxara bilir”.
R.Zeyni qeyd etdi ki, indiyə qədər maarifçilk sahəsində də xeyli işlər görülüb, ümumiyyətlə, problemin qabarıq görsənməsi, yoluxmanın artması bir tərəfdən də vətəndaş məsuliyyətsizliyi ilə bağlıdır. Vətəndaşlar məsuliyyətlə bütün qaydalara əməl edərdisə, heç bir məhdudlaşdırmaya, sərtləşdirilməyə ehtiyac olmazdı, amma bəzi vətəndaşlar qaydalara əməl etmək istəmir. “Pandemiyanın artmasına, virusun geniş yayılmasına təkan verən bütün sahələrdə məhdudiyyətlər tətbiq edilməsinin tərəfdarıyam. Bütün lazımı məhdudiyyət tədbirləri həyata keçirilməlidir. Çünki ictimai nəqliyyatda olduğu kimi, kütləvi tədbirlərdə də, ictimai iaşə müəssisələrdə də insanların kütləvi toplanması virusun yayılmasına səbəb olursa, o müəssisələrdə xidmətlərin məhdudlaşdırılması zəruridir. Pandemiyaya yoluxanların sayının azalmasına gətirib çıxaran bütün məhdudlaşdırıcı tədbirlərin həyata keçirilməsi qaçılmazdır. Amma vətəndaşlar öz məsuliyyətlərini dərk edib bütün qaydalara əməl etməlidir ki, yoluxanların sayı aşağı düşsün, sərt karantin rejimi tətbiq edilməsin. Bütün hallarda yoluxmaların tempinin aşağı düşməsi üçün əlimizdən gələni etməliyik Operativ Qərargah sərtləşdirməyə getməsin. Amma insanlar məsuliyyətsiz olarlarsa və qaydalara əməl etməzlərsə, bütün sərt tədbirlərin görülməsi zərurudir və gözləniləndir. Hər şey vətəndaş məsuliyyətinə bağlıdır”-deyə R.Zeyni qeyd etdi.
İradə SARIYEVA
