Qonşu Gürcüstanda koronavirusla bağlı yaranmış vəziyyət Azərbaycanın Çində istehsal edilən vaksilərdən istifadə ilə bağlı atdığı addımların nə dərəcədə düzgün olduğunu bir daha təsdiq edir. Gürcüstanın Çin vaksinindən imtina etməsi isə indi bunun tam yanlış addım olduğunu üzə çıxarır. Üstəlik, Çin vaksinin virusa qarşı yüksək effektivliyi də, Gürcüstandan fərqli olaraq, Azərbaycanın seçiminin düzgün olduğunu göstərir.
Qeyd edək ki, ölkəmizdə vaksinasiya məqsədilə Çinin “Sinovac Biotech” şirkətinin istehsalı olan “Coronavac” peyvəndindən istifadə olunur. Hazırda “Sinovac Biotech” şirkətinin COVID-19 virusuna qarşı peyvəndinə dünyada maraq böyükdür. “CoronaVac” peyvəndinin Çin, Türkiyə, İndoneziya, Braziliya, Çili, Kolumbiya, Meksika, Filippin və bir neçə başqa ölkədə tətbiqinə icazə verilib. Bu ilin yanvar ayından Azərbaycanda başlayan koronavirusa qarşı vaksinasiya prosesində də məhz “Sinovac”ın peyvəndindən istifadə olunur. Təsirsiz hala gətirilmiş bu peyvəndin hazırlanmasında orqanizmdə ciddi xəstəliyə və ya əks-təsirə səbəb olmadan bədənin immun sistemini virusa məruz qoymaq üçün öldürülmüş virus hissəciklərindən istifadə olunub. Şirkət peyvəndə olan yerli və xarici tələbatı nəzərə alaraq illik istehsal gücünü 1 milyard dozaya çatdırmaq üçün istehsalı genişləndirir. İndi Gürcüstanda etiraf edirlər ki, Azərbaycan Çindən vaksin almaqla düzgün addım atıb.
Gürcüstanın baş infeksionisti, Tiflis Yoluxucu Xəstəliklər Xəstəxanasının direktoru Tengiz Tsertsvadze ölkədə vaksinasiyanın gecikməsi ilə bağlı tənqidlərə münasibət bildirərkən bu xüsusda qeyd edib: “Türkiyə, Azərbaycan və digər ölkələrə həsəd aparırıqsa, o zaman Çin vaksinindən imtina etməyə dəyməz”. Onun sözlərinə görə, ölkə rəhbərliyi Çin peyvəndini çoxdan tətbiq edə bilərdi: “Lakin hökumət ekspertlərin tövsiyə və rəylərini nəzərə alaraq bunu etmədi”. Qeyd edək ki, Gürcüstanda koronavirusa qarşı vaksinasiya ilə bağlı qalmaqal səngimir. Qonşu ölkəyə peyvəndin bugünə qədər çatdırılmamasına görə səhiyyə ekspertləri, siyasi partiyalar və ictimai fəallar hökuməti tənqid edir. Gürcüstanın Xəstəliklərə Nəzarət və İctimai Səhiyyə Milli Mərkəzinin rəhbər müavini Paata İmnadze ümidin Hindistan vaksininə qaldığını bildirir: “Böyük ehtimal ki, Gürcüstan yaxın zamanlarda Hindistan vaksini əldə edəcək”. İnfeksionistin sözlərinə görə, peyvəndlə bağlı danışıqlar Çin və Qərblə davam etdirilir: “Vaksinin ən iri istehsalçılarından biri Hindistandır və preparatı bu ölkədən almaq üçün böyük şans var. Təəssüflər olsun ki, Avropa ölkələri bizimlə bölüşmək üçün kifayət qədər vaksin əldə edə bilmir”. İmnadze qeyd edib ki, dünya bazarında vaksin defisiti yaranıb və istehsalçılar tələbatı ödəmək üçün istehsalı genişləndirə bilməyib. Qeyd edək ki, Gürcüstan ABŞ-ın “Novavax” vaksinini idxal etməklə də bağlı danışıqlar aparır. Lakin nəticə yoxdur. Azərbaycan isə bu fonda vaksinasiya prosesini uğurla davam etdirir. Artıq Azərbaycanda koronavirus infeksiyasına qarşı 400 min nəfərə yaxın insan vaksinasiya olunub. Vaksinasiya ölkənin bütün rayonlarında uğurla davam etdirilir. Bu arada isə Səhiyyə Nazirliyi bəzi insanların vaksindən imtina etməsilə bağlı məsələyə münasibət bildirib. Nazirliyin COVID-19-la mübarizə işçi qrupunun üzvü Səbinə Babazadə peyvəndin infeksion xəstəliklərə qarşı ən effektiv müdafiə üsulu olduğunu vurğulayıb. O qeyd edib ki, hazırda vaksinasiya prosesi strategiyaya uyğun olaraq uğurlu şəkildə davam edir: “Sağlamlıq şərtləri uyğun olan, strategiyada yer almış hər bir vətəndaş vaksinasiya prosesində iştirak etməlidir. Vaksinasiya ilk növbədə həmin şəxsin özünü və yaxınlarını yoluxmadan qoruyur. Kütləvi yoluxma halları və ölüm saylarını unutmamalıyıq. Vaksinlər bizi ağırlaşma hallarından və ölüm hadisələrindən qoruyaraq səhiyyənin də yükünü azaltmış olacaq. Vətəndaşları etibarlı mənbələrə - rəsmi qurum və nümayəndələrin fikirlərinə əsaslanmağa çağırıram. Bəzən sosial şəbəkələrdə paylaşılan yanlış informasiyalar insanlarda narahatlıq və çaşqınlığa səbəb olur. Bəzi səhifələrin izlənmə saylarını artırma məqsədilə paylaşdıqları həqiqəti əks etdirməyən yazılar ajiotaja səbəb olur. Bu tip paylaşımlar bəzən ciddi şəkildə psixoloji gərginliyə gətirib çıxarır ki, bu da cəmiyyət tərəfindən birmənalı qarşılanmır. Həssas mövzuda hər bir vətəndaş yalnız rəsmi məlumatlara inanmalıdır. Yalnız qısa zamanda edilən peyvəndlərlə kütləvi immun sistemi qazanaraq COVID-19-a qalib gəlmək mümkündür”.
Qeyd edək ki, yanvar ayının 18-dən başlanan peyvəndləmə dövlət hesabına və könüllü həyata keçirilir. "Sinovac Biotech" şirkətinin baş meneceri Quan Yan bildirib ki, "Coronavac" peyvəndi təhlükəsizdir. İndiyədək 10-dan çox ölkədə "Coronavac" peyvəndinin təcili istifadəsinə icazə verildiyini deyən "Sinovac" rəsmisi bu peyvəndin Azərbaycanda vaksinasiya prosesində də istifadə olunmasından məmnunluğunu ifadə edib: "Biz ümid edirik ki, şirkətimizin vaksinlərinin effektivliyi və təhlükəsizliyi sayəsində əməkdaşlıq etdiyimiz ölkələrdə pandemiyaya ən qısa zamanda qalib gəlmək və həyatı əvvəlki axarına qaytarmaq mümkün olacaq".
Samirə SƏFƏROVA
