Fransa polisi «Charlie Hebdo» dərgisinə hücum edən silahlıların sığındığı mətbəə və girovların saxlandığı yəhudi marketinə əməliyyat keçirdi. «Charlie Hebdo» jurnalına silahlı hücumda şübhəli bilinən Səid və Şərif Kuaşi qardaşları və marketdəki silahlı(lar) öldürülüb.
Marketdəki girovlardan 4-nün öldüyü xəbər verilir. 4 girovun isə ağır yaralı olduğu bildirilir...
Baki-xeber.com xəbər verir ki, Fransız polisi əvvəl «Charlie Hebdo»ya hücumdan şübhəli bilinənlərin olduğu mətbəəyə, sonra da bir çox adamın girov götürüldüyü yəhudi marketinə əməliyyat təşkil edib.
Yəhudi marketində ən azı beş nəfəri girov götürən təcavüzkar, polis mühasirəsindən olan «Charlie Hebdo» şübhəlilərinə basqın ediləcəyi halda girovları öldürəcəyini bildirirdi. «Charlie Hebdo» hücumunda şübhəli Kuaşi qardaşları bir nəfəri girov götürərək sığındığı mətbəəyə əməliyyat başladılandan bir müddət sonra marketə də basqın edilib.
«Charlie Hebdo» jurnalına edilən hücumda 12 adamı öldürdüyü bildirilən Kuaşi qardaşları öldürülüb. Əllərindəki girov də qurtarılıb.
AFP görə, Kuaşi qardaşları əməliyyat zamanı atəş açaraq polisə hücum edib. Əməliyyat zamanı bir polis məmuru yaralanıb.
Yəhudi marketinə edilən əməliyyatda da onlarla adamın marketdən qaçdığı müşahidə edilib. Fransız rəsmilər buradakı təcavüzkarın da öldürüldüyünü açıqlayıb. Reuters, marketdə 20-yə yaxın girov olduğunu və bunlardan ən az 4-nün öldürüldüyünü xəbər verir. Əməliyyatdan əvvəl marketdə təxminən 5 girovun olduğu məlumatı verilirdi.
Öldürülən şəxs polis cinayətində şübhəlidir
Polis, marketdəki təcavüzkarın dünən bir qadın polisi öldürən şəxs olmasından şübhələnir. Fransız polisi hadisə ilə əlaqədar şübhələndikləri iki nəfərin şəkilini yayıb. Rəsmi məlumatda 1988-ci il təvəllüdlü qız Hayat Bumeddyen (Hayat Boumeddiene) və qara dərili kişi Amedi Kulibalinin (Amedy Coulibaly) «silahlı və təhlükəli» olduğu bildirilib.
Fransanın Le Monde qəzeti marketdə öldürülən təcavüzkarın Amedi Kulibali olduğunu açıqlayıb.
«Charlie Hebdo» əlaqəsi
Polisə görə çərşənbə günü «Charlie Hebdo»ya edilən hücum, dünən qadın polisin öldürülməsi və bugünkü girov əməliyyatı bir-biri ilə bağlı ola bilər.
AFP görə Amedi Kulibalinin adı «Charlie Hebdo»ya edilən hücumda şübhəli bilinən Şərif Kuaşi ilə birlikdə 2010-ci ildə həbsxanadan adam qaçırmaqla bağlı istintaqda keçir.
Hər iki şəxsin 1995-ci ildə Parisdə bir metro stansiyasında 30 adamın yaralanmasına səbəb olan əlcəzairli Smain Ait Ali Belkacemi həbsxanadan qaçırmağa çalışdığı iddia edilir. Kulibali və Kuaşi müvəffəqiyyətsiz qaçırma cəhdini planlaşdıran Cemal Beghalin yanında görülüb.
O vaxt Kulibali buna görə həbs olunub. Kuaşi isə heç bir cəza almayıb.
Həbs edilənlər var
Fransa daxili işlər naziri Bernard Cazeneuve paytaxt Parisdə dünən səhər saatlarında polislərə edilən silahlı hücumu təşkil edən şəxsin kimliyinin müəyyənləşdirildiyini bu gün açıqlamışdı.
BFM televiziya kanalı isə onun kimliyinin müəyyənləşdirildiyini və polisin keçirdiyi əməliyyatla şübhəlinin yaxını olduğu təxmin edilən iki nəfərin həbs edildiyini bildirib.
