Eyyub Hüseynov: “Gələcəyin qorunması üçün polietilen torbalara qadağa qoyulması mütləqdir”
Polietilen paketlərin və plastik qabların istehsalı təxminən 40 il əvvəl başlanıb, lakin biz onlarla SSRİ-nin dağılmasından sonra tanış olduq. O vaxtlar ekoloji və maddi baxımdan daha sərfəli olan kağız, parça torbalar, şüşə qablar istifadə olunurdu. İndi isə tərəvəzdən tutmuş, kitaba, paltara qədər hər şeyi polietilen torbalarda və plastik qablarda alırıq.
Mağazalarda təklif edilən məhsulların, demək olar ki, 99 faizi polietilen və plastik qablaşdırmadadır. Bu səbəbdən də indi bir çoxumuz sellofan torbaların olmadığı bir həyat düşünə bilmirik.
Alış-verişlərin ən başlıca yardımçısı hesab edilən bu torbaların təbiətə vurduğu zərərin sayı hesaba gəlməyəcək qədər çoxdur. Polietilen paketlər tək təbiətə deyil, eyni zamanda, insan sağlamlığına da zərər yetirir. Bu səbəbdən də artıq bir sıra xarici ölkələrdə qeyd olunan məhsulun istifadəsi tam şəkildə qadağan olunub.
Azərbaycanda plastik qablar və polietilen torbaların istifadəsinin məhdudlaşdırılması ilə bağlı müəyyən işlər görülür. Ekologiya və Təbii Sərvətlər Nazirliyi plastik qablar və polietilen torbalardan tədricən imtina edilməsi istiqamətində işlər aparır. Polietilen torbalardan istifadənin məhdudlaşdırılması üçün mağazalarda müştərilərə pulsuz verilən sellofan torbaların da gələcəkdə ödənişli olması ilə bağlı məsələ gözlənir.
Səbəb kimi göstərilir ki, həmin sellofan torbalar pullu olarsa, müştərilər ondan az istifadə edərlər. Nəticədə ekoloji mühit çirklənmədən xilas olar. Nazirliyin apardığı bu işlə bağlı müxtəlif mövqelər var. Lakin, ümumilikdə, ekspertlər hesab edirlər ki, atılan addımlar ekoloji mühitin qorunması baxımından müsbətdir.
Polietilen torbaların istifadəsinin məhdudlaşdırılması vacibdir. Ancaq həmin məhsulun nə ilə əvəz olunacağı bəlli deyil.
Azad İstehlakçılar Birliyinin sədri Eyyub Hüseynov bizimlə söhbətində bildirdi ki, plastik qablardan və polietilen məhsullardan istifadə minimuma endirilməlidir: “Polietilen torbaların zərəri təkcə orqanizmimizdə açdığı fəsadlarla bitmir, bizə daha böyük ziyan onların ekologiyaya vurduğu zərərdir. Hər gün milyonlarla paket ekologiyanı çirkləndirir. Polietilen torbaların təkrar istifadəsi qadağan olunsa da, bəzi şirkətlər istifadə olunan paketləri toplayaraq onlardan təkrar istifadə edirlər. Gələcəyin qorunması üçün bu torbalara qadağa qoyulması mütləqdir. Bu paketlərin tərkibi çox qarışıqdır, yüzlərlə kimyəvi birləşmə nəticəsində əldə edilir. Sellofan torbalar insan orqanizmində müxtəlif xəstəliklərin yaranmasına şərait yaradır. Onlardan imtina edə bilmirsinizsə, o zaman onlardan yararlanarkən öncə etiketinə baxın - yeyinti, yoxsa sənaye məhsulları üçün nəzərdə tutulması barədə qeydə fikir verin. Ola bilər ki, istifadə etdiyiniz polietilen torbadan hər hansı qoxu gəlir, rəngi əlinizə çıxır, o zaman torbadan birdəfəlik imtina edilməlidir. Kağız və parça torbalara geri dönməliyik”.
Həmsöhbətimiz hesab edir ki, plastik və polietilendən tədricən imtina olunmalıdır. Bu məsələnin həlli üçün inzibati metodlarla yanaşı, maarifləndirmə tədbirləri də həyata keçirilməlidir: "İnsanlar artıq rahatlığa öyrəşiblər. Ona görə də təkcə inzibati metodlar tətbiq etmək düzgün deyil. Əhali ciddi qaydada maarifləndirilməlidir. Bizdə də tədricən plastiki əvəz edə biləcək məhsullardan istifadəyə keçid olmalıdır. Bununla biz ekoloji təmizliyə öz töhfəmizi verə bilərik. Hesab edirəm ki, aidiyyəti qurumlar bu məsələ ilə bağlı ciddi tədbirlər planı hazırlamalıdırlar. Azad bazar iqtisadiyyatında dövlət bu məsələlərə müdaxilə etmir. Ona görə də yalnız və yalnız maarifləndirmə işlərinin faydalı ola biləcəyini düşünürəm”.
Günel CƏLİLOVA
