Aydın Xan Əbilov: “Dünyanın digər qitələrində multikultural dəyərlərin, tolerant baxışların iflasa uğradığı, yaxud uğradıldığı bir vaxtda Azərbaycanın multikultural dəyərlərinin təbliğinə və dünyada yayılmasına böyük ehtiyac var”
Bəşəriyyətdə sülhə nail olmaq üçün multikulturalizm və tolerantlıq kimi dəyərlər bərqərar edilməlidir. Bu gün dünyada multikulturalizm ənənələrinin ən geniş yayıldığı və intişar tapdığı məkan Azərbaycandır. Məlumdur ki, qədim dövrlərdən multikulturalizmin Azərbaycanda geniş yayılması, onun xalqımızın həyat tərzinə çevrilməsi və müasir dövrdə dövlət siyasətinin əsas istiqamətlərindən biri olması ölkəmizin multikultural təhlükəsizliyinin yüksək səviyyədə olmasını təmin edib.
Azərbaycanda mövcud olan multikulturalizm ənənələri artıq bir nümunə kimi dünya dövlətlərinə təlqin edilir. Azərbaycan multikulturalizminin dünyanın müxtəlif ölkələrində təqdimatları keçirilir.
Ölkəmizdə müxtəlif xalqların sülh və əminamanlıq şəraitində yaşaması, əlbəttə, başqa ölkələr üçün də örnəkdir.
Azərbaycanın İsveçrədəki Səfirliyinin təşkilatçılığı ilə bu ölkənin yeganə ikidilli ali təhsil müəssisəsi olan Friburq Universitetinin Sosial Elmlər fakültəsində Azərbaycan Respublikası Prezidentinin Administrasiyasının Millətlərarası münasibətlər, multikulturalizm və dini məsələlər şöbəsinin müdiri Etibar Nəcəfovun “Azərbaycanda dövlət-din münasibətləri və dini siyasət” mövzusunda mühazirəsi keçirilib. Qeyd edilənə görə, təqdimatda Azərbaycanın multikulturalizm ənənələri və bu fenomenin səbəbləri barədə tədbir iştirakçıları məlumatlandırılıb, ölkəmizdə mövcud olan müxtəlif dini icmalar, dövlət-din münasibətlərini tənzimləyən qanunvericilik bazası və bu sahədə dövlət siyasəti barədə ətraflı danışılıb.
Bundan əvvəl də digər ölkələrdə Azərbaycandakı multikulturalizm ənənəsinin təqdimatları baş tutub və bu təqdimatlar xarici ölkələrin ictimaiyyəti tərəfindən müsbət qarşılanıb.
“Yeni Yazarlar və Sənətçilər” ictimai qurumunun rəhbəri, yazıçı-kulturoloq Aydın Xan Əbilov “Bakı-Xəbər”ə bildirdi ki, Azərbaycan multikulturalizmi bütün dünyada bizim kulturoloji, tarixi, ideoloji bir silahımız olaraq təbliğ edilməyə layiqdir. “Çox sevinirəm ki, ölkəmizdə həm də Bakı Beynəlxalq Multikulturalizm Mərkəzi fəaliyyət göstərir. Bu mərkəz beyin mərkəzi olaraq bütün dünyada Qafqazın ən qədim xalqları yaşayan Azərbaycanda 70-ə yaxın xalqın nümayəndəsinin birgəyaşayış modelini təbliğ edir. Belə bir sivilizasiya məkanı olan ölkəmizi və burada mövcud olan dəyərləri beynəlxalq dəyərə çevirmək üçün mütləq onu öyrənmək, tədqiq etmək, yaymaq lazımdır. Bilirik ki, ölkəmizdə ənənəvi olaraq humanitar forumlar, dinlərarası və mədəniyyətlərarası, sivilizasiyalararası dialoqa çevrilən bir sıra beynəlxalq tədbirlər keçirilir. Bu tədbirlərin iştirakçıları da xüsusi olaraq vurğulayırlar ki, sözün həqiqi mənasında, Azərbaycan multikulturalizm mərkəzinə çevrilib. Avropada, eləcə də dünyanın digər qitələrində multikultural dəyərlərin, tolerant baxışların iflasa uğradığı, yaxud iflasa uğradıldığı bir vaxtda Azərbaycanın multikultural dəyərlərinin təbliğinə və dünyada yayılmasına böyük ehtiyac var. Burada müxtəlif dinlilik, müxtəlif millətlilik, müxtəlif mədəniyyətlilik var. Eyni zamanda da ölkəmizdə ayrı-ayrı sivilizasiyaların sərhədi qovuşur. Azərbaycanda müxtəlif dinlərin, konfessiyaların nümayəndələrinin birgəyaşayışa könül verməsi, eləcə də onların birgə dualar etməsi çox təqdirəlayiqdir”. A.X.Əbilov qeyd etdi ki, bu gün Azərbaycanda məscidlə yanaşı, kilsə və sinaqoqlar da fəaliyyət göstərir, burada heç bir dini ayrıseçkiliyə yol verilmir. Bütün millətlərin nümayəndələrinə eyni gözlə baxıldığını deyən A.X.Əbilov hesab edir ki, bu, bütün dövlətlər üçün örnəkdir. “Azərbaycandakı multikulturalizm və tolerantlıq ənənəsi, mühiti humanitar bir sivilizasiya dəyəri kimi təbliğ edilməlidir. Ona görə də Avropanın mərkəzində Azərbaycanın multikulturalizm dəyərlərinin təbliği və onun yayılması, eyni zamanda, dünyada bu ənənələrdən istifadə edilməsi çox vacib bir məsələdir” - deyə ekspert bildirdi.
İradə SARIYEVA
