Əli Mahmud: “Bu həm də Rusiya və Azərbaycan arasında isti münasibətlərin göstəricisidir”
Adını nəinki Azərbaycan, eləcə də dünya tarixinə yazan nəhəng azərbaycanlılar çox olub. Onlar yaşayıb fəaliyyət göstərdikləri ölkələrin ictimai-siyasi, elmi, iqtisadi həyatında mühüm rol oynayıblar. Müsbət haldır ki, bu böyük şəxsiyyətlərin adlarının əbədiləşdirilməsi üçün həyatlarını, fəaliyyətlərini həsr etdikləri ölkələrdə də işlər görülür.
Bir müddət əvvəl Rusiya hava limanlarına dahi rusiyalıların adlarının verilməsinə dair əhali arasında sorğu keçirilib. Sözügedən sorğuda adları yer alan görkəmli şəxsiyyətlər arasında iki azərbaycanlının da adı vardı. Onlardan biri keçmiş SSRİ-nin qaz sənayesi naziri Sabit Orucov, o biri isə Rusiya geoloqu, Sibir neft və qaz yataqlarını kəşf etmiş Fərman Salmanov idi. KİV-lərin yaydığı məlumata görə, “Rusiyanın böyük adları” müsabiqəsində Surqut və Nijnevartovsk bölgəsində Azərbaycan və Rusiya geoloqu, Sibir neft və qaz yataqlarını kəşf etmiş Fərman Salmanov liderlik edib. Mətbuat yazır ki, Rusiyanın Surqut hava limanına görkəmli azərbaycanlı geoloq F.Salmanovun adı verilib.
Bu hadisəni soydaşımıza və Azərbaycan xalqına verilən böyük dəyər kimi qiymətləndirən “Qarabağa aparan yol” qəzetinin baş redaktoru, Azərbaycan Yazıçılar Birliyinin üzvü, şair-jurnalist Əli Mahmud hesab edir ki, F.Salmanovun adı fəaliyyətinə, Rusiyanın elmi, iqtisadi həyatında oynadığı rola görə Surqut hava limanına verilib. “Bu həqiqətən də mühüm bir hadisədir. Fikrimcə, dahi rusiyalılar sırasında F.Salmanovun adının xüsusi fərqlənməsi qürurvericidir. Rəy sorğusunda iştirak edən insanların onun adını seçməsi doğrudan da müsbət haldır. Bu həm siyasi, həm də tarixi baxımdan yüksək qiymətləndirilməlidir. Onu da deyim ki, bu həm də Rusiya və Azərbaycan arasında isti münasibətlərin göstəricisidir. F.Salmanov keçmiş SSRİ-də çox məşhur şəxsiyyətlərdən biri olub və o, Rusiya iqtisadiyyatının çiçəklənməsinə mühüm töhfələr verib. Rəy sorğusunda iştirak edən Rusiya vətəndaşlarının F.Salmanovun adını dəyərləndirməsi yaxşı haldır.
Rusiyalıların doğru seçimi o deməkdir ki, F.Salmanovun əməyi, zəhməti onlar tərəfindən qiymətləndirilir və bu da sevindirici haldır. Həmin hava limanından istifadə edən soydaşlarımız fəxr edəcəklər ki, biz F.Salmanov adına hava limanında təyyarəyə minirik. Azərbaycan xalqının adını ucaldan böyük geoloqun xatirəsinin bu şəkildə əbədiləşdirilməsini təqdir edirəm” - deyə bildirən Ə.Mahmudun sözlərinə görə, heç şübhəsiz ki, bu məsələ ermənilərin bizə qarşı apardıqları mənfur siyasətə vurulan zərbədir.
İradə SARIYEVA
