Azər Ələkbərov: “… təhsildə çoxsaylı problem olsa da, ancaq dinamik inkişaf da var” “Təhsildə cənab Prezidentin müəyyən etdiyi yeni təhsil komandası tərəfindən islahatlar aparılır”
Azərbaycan Müəllimlərinin XV Qurultayı keçirilib. Bildirək ki, bu qurultaydan respublikanın təhsil işçilərinin böyük gözləntiləri var. Onlar ümid edirlər ki, məhz bu qurultaydan sonra Azərbaycan müəllimlərinin əksər problemlərinin aradan qaldırılması istiqamətində əsaslı addımlar atılacaq.
Qurultayda Azərbaycan müəllimlərinin hansı köklü problemləri gündəmə gətirilib?
22 saylı tam orta məktəbin direktoru, hüquq üzrə fəlsəfə doktoru, qurultay iştirakçısı Azər Ələkbərov “Bakı-Xəbər”ə bildirdi ki, burada müəllimlərlə bağlı bir sıra məsələlər müzakirə edilib və onların həlli yolları haqqında fikirlər bildirilib.
Azərbaycan təhsilinə Prezident İlham Əliyev tərəfindən böyük diqqət və qayğının olduğunu deyən A.Ələkbərovun bildirdiyinə görə, son 10 ildə 3000 yaxın məktəb binası inşa edilib, təmirə ehtiyacı olanlar isə əsaslı təmir olunub. “Dünya səviyyəsində bu kimi rəqəmlərə malik olan 2-ci dövlət yoxdur. Bir müəllim kimi bu qurultayın keçirilməsini yüksək dəyərləndirirəm. Qurultayın bütün məruzəçiləri - təhsil naziri Ceyhun Bayramov, Baş nazirin müavini Əli Əhmədov, vitse-spiker Bahar Muradova və digərləri öz çıxışlarında müəllimlərin əməyinə yüksək dəyər verdilər və müəllimləri dəstəklədikləri barədə fikirlərini səsləndirdilər. Çıxışı zamanı Əli Əhmədov müəllimlərin əməkhaqlarının bir daha qaldırılmasının məqsədəmüvafiq olduğunu dedi. Amma bildirdi ki, bunun üçün iqtisadiyyatın adambaşına gəlirliyi artırılmalıdır. Qurultayda müəllimlərlə bağlı bütün məsələlərə, bütün problemlərə toxunuldu. Burada həm müəllimlərin işə qəbulu, həm müəllim ixtisasını seçənlərin sayının artırılması, həm peşə təhsilinin canlandırılması, həm ali təhsildə aparılan islahatlar, həm də DİM-in yeni qaydalarının tətbiq olunması barədə danışıldı.
Məktəb direktoru olduğum üçün, təbii ki, məktəblərdəki mövcud problemlərin daha çox müzakirə edilməsinə və həll olunmasına tərəfdaram. Amma bir qlobalist təhsil işçisi kimi məni bütövlükdə təhsil sisteminin bütün problemləri narahat edir.
Hesab edirəm ki, 1 qurultay günü daxilində bütün problemləri müzakirə etmək fiziki cəhətdən mümkün deyil.
22 illik təcrübəsi olan təhsil işçisi kimi həm ali, həm ümumtəhsil pillələrində, həm elmi sahədə təcrübəsi olan, bir çox təhsil müəssisəsində pedaqoji fəaliyyətlə məşğul olan bir müəllim kimi tam məsuliyyətimlə deyirəm ki, təhsildə çoxsaylı problem olsa da, ancaq dinamik inkişaf da var. Təhsildə cənab Prezidentin müəyyən etdiyi yeni təhsil komandası tərəfindən islahatlar aparılır. Cənab Prezident və 1-ci Vitse-prezident yeni inşa edilmiş, əsaslı təmir olunmuş məktəb binalarının açılışına şəxsən gedirlər. Dünyada bu kimi ikinci dövlət başçısı tanımıram” - deyə A.Ələkbərov bildirdi.
O vurğuladı ki, Prezident təhsilə göstərdiyi qayğı ilə bütün cəmiyyətə və bütün dövlət qurumlarına, aidiyyəti vəzifəli şəxslərə mesaj verir ki, təhsilə diqqət edin, təhsilə dövlətin ən strateji sahəsi kimi qayğı göstərin: “Bu baxımdan özümü xöşbəxt və nikbin hiss edirəm ki, Azərbaycan təhsili vaxtilə müəllim kimi çalışmış Prezidentimiz tərəfindən dəstəklənir və inkişaf etdirilir. Bir məqamı xatırlatmaq istəyirəm. Qaradağda 228 saylı məktəbdə çalışarkən, məktəbin qonağı olmuş Moldova Ombudsmanı Aureliya Qriqoriu Sahil qəsəbəsinin, bir əyalətin məktəbini görərək etiraf etdi ki, Moldovada və bir çox onun olduğu MDB dövlətlərində məktəblər dağılır, tənəzzül edir, amma Azərbaycanda əksinə, hətta əyalətlərdə belə məktəblər inkişaf etdirilir.
Necə deyərlər, şərhə ehtiyac yoxdur”.
İradə SARIYEVA
