Ənvər Çingizoğlu: “Bu bayramın Qaxda keçirilməsi təqdirəlayiqdir”
Mədəni müxtəlifliyin mövcud olduğu Azərbaycan bənzərsiz mətbəx mədəniyyətinə malikdir. Elə bölgələrimiz var ki, orada ayrı-ayrı xalqların mətbəxi çuğlaşıb və bunun nəticəsində də çoxçeşidli bişmişlər meydana gəlib. Bu gün milli mətbəximizin yalnız xaricdə deyil, ölkəmizin özündə də təbliğinə böyük ehtiyac duyulur. Nəzərə alsaq ki, Azərbaycan turuzm potensialı olan ölkədir və bura il ərzində minlərlə turist üz tutur, onda mətbəximizi daha geniş səviyyədə təqdim etməyi bacarmalıyıq.
Azərbaycanda milli mətbəxin təbliği ilə bağlı davamlı festivallar, bayramlar keçirilir. Belə bayramlardan biri də bu günlərdə Qaxda keçirilən Milli Mətbəx Bayramıdır ki, bu tədbir həmin bölgənin unikal mətbəxinin təqdim edilməsində müstəsna rola malikdir.
Ümumiyyətlə, belə festivallar həm də ona görə əhəmiyyətli və maraqlıdır ki, burada mətbəx mədəniyyətilə yanaşı, xalq sənətkarlıq nümunələri, yerli sənətkarların əl işləri də təqdim edilir.
Qaxda Milli Mətbəx Bayramının keçirilməsini müsbət qiymətləndirən etnoqraf Ənvər Çingizoğlunun sözlərinə görə, ümumiyyətlə, milli müxtəlifliyin mövcud olduğu bölgələrdə belə festivalların təşkil edilməsi bütün cəhətlərinə görə maraq doğurur. Sözügedən bölgənin özünəxas mətbəxinin olduğunu vurğulayan etnoqraf qeyd etdi ki, bayram çərçivəsində milli mətbəx sərgiləri keçirilib. O burada Qax mətbəxinə aid xəmir xörəklərinin, müxtəlif növ plovların, dolmaların, digər milli yeməklərin, qaxac olunmuş ətdən hazırlanan xörəklərin, gürcü, ləzgi mətbəxinə aid nümunələrin həmin bölgədə istirahət edən turistlərə müsbət təsir etdiyini və onların bundan zövq aldığını qeyd edən Ə.Çingizoğlunun fikrincə, bu festival Azərbaycan mətbəxinin gözəlliyini təqdim edir. “Milli Mətbəx Festivalının keçirilməsi həqiqətən də çox maraq doğurur. Bu bayramın Qaxda keçirilməsi təqdirəlayiqdir. Qaxda keçirilən Milli Mətbəx Bayramında Balakən, Zaqatala, Oğuz, Şəki mətbəxi də təqdim edilib. Burada Şəki mətbəxinə aid piti, ətli, noxudlu dovğa, ballı xəşil, dobuda tənək dolması və bozbaş, qənnadı məmulatları, müxtəlif növ şirniyyatlar, Zaqatala mətbəxinə aid sacda bişirilən maxara, fəsəli, yuxa, qutab və digər nemətlər, Oğuz mətbəxinə aid döşəməli və əvəlikli plov bənzərsizdir. Hesab edirəm ki, ölkəmizin unikal mətbəx mədəniyyətinin tanıdılmasında, turistlərə təqdim olunmasında belə bayramların keçirilməsinin əhəmiyyəti böyükdür” - deyə bildirən Ə.Çingizoğlu vurğuladı ki, Qax mətbəxinin özünəməxsusluğu xarici turistləri cəlb edir. O qeyd etdi ki, Qax, Zaqatala, Balakən, Oğuz, Şəki xarici turistlərin ən çox maraq göstərdiyi rayonlardır. “Düşünürəm ki, belə bayramların proqramı müxtəlif dillərdə əvvəlcədən hazırlanıb internet saytlarında yerləşdirilməlidir ki, bura daha çox turist axınına nail olaq. Çünki turistlərin bura qatılmasına çox böyük ehtiyac var. Ən azından, bu həm ölkəmizə pul axını, həm də mətbəx mədəniyyətimizi təbliğ etməyimiz deməkdir”. Ə.Çingizoğlunun sözlərinə görə, Azərbaycanda keçirilən ən müxtəlif festival və bayramlar haqqında xarici ölkələrdə çox müsbət fikirlər formalaşıb.
Qeyd edək ki, Mədəniyyət Nazirliyinin “Xalq Yaradıcılığı Paytaxtları” Proqramına əsasən, Qax şəhəri 2015-ci ildə “Azərbaycanın Milli Mətbəx Paytaxtı” elan edilib. Həmin ildən etibarən ənənəvi olaraq Qaxda hər il Milli Mətbəx Bayramı keçirilir.
İradə SARIYEVA
