Eyyub Hüseynov: “Ekologiyaya zərər yetirən, havanı çirkləndirən şadlıq evləri bağlanmalıdır, çünki o şadlıq evləri ətrafda yaşayan sakinlərin sağlamlığına təsir edir”
Havanı çirkləndirən restoranlar və şadlıq evləri bağlana bilər. Ekologiya və Təbii Sərvətlər Nazirliyi son dəfə restoran sahiblərinə xəbərdarlıq edib.
Bakıda bəzi restoranların bağlanmasının səbəbi onların standartlara cavab verməməsi ilə bağlıdır. Standartlara cavab verməyən restoranlar əsasən təmizləyici qurğulara malik olmadığı üçün havanı çirkləndirməkdə davam edirlər.
Məlumat üçün bildirək ki, bu günə qədər yalnız 90 obyektdə təmizləyici qurğu quraşdırılıb. Ekologiya və Təbii Sərvətlər Nazirliyinin əməkdaşı Faiq Mütəllimov media nümayəndələrinə açıqlamasında qeyd etdi ki, “Yeddi gözəl”, “Sonalar sonası”, “Şahzadə”, “Şəlalə”, “Çanaqqala”, “Meqa Palas”, “Oazis”, “Kəndimiz”, “Çıraq”, “Qabırğa” restoranları ilə bağlı artıq məhkəməyə müraciət edilib.
Hazırda 15 iaşa obyektinin fəaliyyətinin dayandırılması üçün sənədlər məhkəməyə hazırlanır. Bunların arasında “Topqapı”, “Ankara”, “Mübarək”, “Eliza”, “Qızıl balıq”, “Şır-şır”, “Meşəbəyi” və digərlərinin adları var.
Nazirlik əməkdaşı qeyd edib ki, məhkəmənin qərarı əsasında fəaliyyətləri dayandırılacaq obyektlərin yenidən fəaliyyət göstərməsi müvafiq prosedurlar baxımından heç də asan olmayacaq.
Xatırladaq ki, hələ oktyabr ayının əvvəlində Nazirlər Kabinetinin 2018-ci ilin doqquz ayının sosial-iqtisadi inkişafının yekunlarına və qarşıda duran vəzifələrə həsr olunan iclasında Prezident İlham Əliyev bu məsələyə toxunmuşdu. Prezident standartlara cavab verməyən iaşə obyetləri ilə bağlı sərt çıxış etmişdi: “Havanı çirkləndirən məişət obyektlərinə ciddi xəbərdarlıq edilib. Axsam saatlarında Bakı şəhərini tüstü bürüyür. Şadlıq evlərində tüstü təmizlənmədən havaya sovrulur. Ona görə çox ciddi xəbərdarlıq edilib, kim əməl etməyəcəksə, o şadlıq evinin, məişət obyektinin qapısı bağlanacaq. Mən tapşırmışam ki, bunun üçün hüquqi əsaslar hazırlansın. Bildiyimə görə, birinci xəbərdarlıqdan sonra bir çox məişət obyektləri təmizləyici qurğuları quraşdırmağa başlayıblar. Onların hamısına məsləhətim ondan ibarətdir ki, bu işi tezləşdirsinlər. Çünki ikinci xəbərdarlıq olmayacaq, bir də görəcəklər ki, əldən çıxdı. Ona görə tezliklə bütün böyük-kiçik məişət obyektlərində havanı çirkləndirən, havaya tüstü, kanserogen buraxan obyektlərdə təmizləyici qurğular quraşdırılmalıdır, müvafiq qurumlar monitorinq aparmalıdır. Mən Bakı Şəhər İcra Hakimiyyətinə, Ekologiya və Təbii Sərvətlər Nazirliyinə göstəriş verdim ki, mənə dərhal məlumat verilsin və dərhal ölçü götürüləcək”.
Prezidentin məlum göstərişindən sonra ETSN tərəfindən Bakıda yerləşən iaşə obyektlərinə hava təmizləyici qurğuların quraşdırılması tövsiyə edilib. Və məlum məsələ ilə bağlı aidiyyəti qurum lazımi işləri görür. Xəbərdarlığa əməl etməyən restoran və şadlıq evləri ilə bağlı məlumat artıq məhkəməyə göndərilib. Qaydalara riayət etməyən şadlıq evlərinin bağlanılması gözlənir.
Azad İstehlakçılar Birliyinin sədri Eyyub Hüseynov qeyd etdi ki, havanı çirkləndirən restoran və şadlıq evlərinin cərimələnməsi və cəzalandırılması əhəmiyyətlidir: “Havanı çirkləndirən şadlıq evləri ilə bağlı əhalinin böyük narazılığı var. Əsasən yeni tikilən binaların və yaşayış evlərinin yaxınlığında olan şadlıq evləri ilə bağlı problem yaşanır. Danılmaz faktdır ki, iaşə obyektlərinin ətrafı çirkləndirməsi geniş yayılıb. İaşə obyektləri ilə bələdiyyələr məşğul olmalı idi. Bu məsələyə ictimaiyyət böyük dəstək verməli idi”.
E.Hüseynov hesab edir ki, restoranların cərimələnməsi zamanı müəyyən problemlər yaşana bilər: “Havanı çirkləndirən iaşə obyektlərinə qarşı maliyyə sanksiyası tətbiq oluna bilər. Yaxşı olar ki, atmosferi çirkləndirən restoran və ya şadlıq evlərinin adı tam şəkildə ictimaiyyətə açıqlansın. Əhali həmin məkanlarda hər hansı bir məclis təşkil etməsin. İctimai qınaq olarsa, bu sahədə vəziyyət müsbətə doğru dəyişər”.
Həmsöhbətimiz onu da vurğuladı ki, ekologiyaya zərər yetirən, havanı çirkləndirən şadlıq evləri bağlanmalıdır. Çünki o şadlıq evləri ətrafda yaşayan sakinlərin sağlamlığına təsir edir. Aidiyyəti qurumlar xüsusi hava təmizləyən qurğusu olmayan şadlıq evlərini araşdırır və onlarla mübarizə aparır. Müasir standartlara cavab verməyən, təmizləyici qurğuları olmayan ictimai iaşə obyektləri bağlanmalıdır: “Çünki o obyektlərə dəfələrlə qeyd olunan qurğunun quraşdırılması ilə bağlı xəbərdarlıq olunub. Ancaq onlar xəbərdarlığa əhəmiyyət verməyiblər. O üzdən, bu tip məkanların fəaliyyəti dayandırılmalıdır”.
Günel CƏLİLOVA
