Ruslan Quliyev: “Turizm polisi yalnız turistlərin təhlükəsizliyinə deyil, eyni zamanda, qeyd olunan sahədə fəaliyyət göstərən şirkətlərə nəzarət edir”
Azərbaycan Turizm Assosiasiyası (AzTA) turizm polisinin yaradılmasını təklif edir. Bu təşəbbüslə AzTA sədri Nahid Bağırov çıxış edib.
O, media nümayəndələrinə açıqlamasında qeyd edib ki, Azərbaycana qonşu olan Türkiyədə, eləcə də bir çox ölkələrdə turizm polisi fəaliyyət göstərir: “Turizm polisi turistlərlə bağlı problemləri aradan qaldıra bilər. Sosial şəbəkələrdə yazırlar ki, hansısa turist özünü yaxşı aparmır, yaxud hansısa turistin başına bir iş gəlir. Məncə, turizm polisi bunların hamısına nəzarət edə bilər. Hesab edirəm ki, dövlət tərəfindən belə bir mexanizm tətbiq olunsa, daha yaxşı olar".
Qeyd edək ki, turzim polisləri kurort şəhərlərində cinayətlərin aradan qaldırılması, bu şəhərlərin turistlər üçün cəlbediciliyinin artırılması, turizm sənayesinə investisiyaların cəlbi və digər bu kimi məsələlərə kömək edəcək.
Turizm polisinin yaradılmasının zəruriliyi haqqında danışan Sağlamlıq və Termal Turizmə Dəstək Assosiasiyasının sədri Ruslan Quliyev “Bakı-Xəbər”ə açıqlamasında qeyd etdi ki, əksər xarici ölkələrdə turizm polisi mövcuddur. Turizm polisi yalnız turistlərin təhlükəsizliyinə deyil, eyni zamanda, hava limanı və ya digər ictimai məkanlara nəzarət edir.
Turzim polisi adıçəkilən sektorda fəaliyyət göstərən şirkətlərə də nəzarət edir. Bəllidir ki, turizm sahəsində qeyri-leqal şirkətlər var. Təbii ki, həmin şirkətlər turizm xidmətləri ilə məşğul olmaq istəyirlər. Ancaq onların fəaliyyəti qanunla tənzimlənmir. Çünki turizm sahəsi ilə məşğul olmaq istəyən şirkətlər rəsmi qeydiyyatdan keçməli və prosedur qaydalarına riayət etməlidirlər”.
Həmsöhbətimiz hesab edir ki, turizm polisinin yaradılmasına ehtiyac olarsa, belə bir qurumu yaratmaq olar.
Günel CƏLİLOVA
