Bu gün istəsək də, istəməsək də, uşaqlarımız kompyuter, mobil telefon istifadəçisinə çevrilib. Bu amil də uşaqlarımızın zərərli informasiya almaq risqini çoxaldır. İnternet istifadəçisi olan uşaqlar bəzən valideyn nəzarətindən kənarda müxtəlif saytlara daxil olur və həmin saytlardan yaş kateqoriyalarına uyğun olmayan informasiyaları əldə edirlər. Bu informasiyalar sırasına zorakılığın və qəddarlığın, hüquqazidd hərəkətlərin təbliği, ailə institutunu nüfuzdan salan, cəmiyyət əleyhinə müxtəlif növ məlumatlar, eləcə də pornoqrafiya və digər neqativ məsələlər daxildir.
Uzun müddətdir cəmiyyətdə, KİV-lərdə uşaqların zərərli informasiyaların təsirindən qorunması yolları ilə bağlı müzakirələr aparılır, təkliflər irəli sürülürdü. Məlum olduğu kimi, bir müddət əvvəl Milli Məclisin müvafiq komitəsində “Uşaqların zərərli informasiyadan qorunması” ilə bağlı qanun layihəsinin müzakirəsi keçirildi.
Artıq Azərbaycan Respublikası Prezidenti İlham Əliyev “Uşaqların zərərli informasiyadan qorunması haqqında” Azərbaycan Respublikasının Qanununu imzalayıb. Sənəd Azərbaycan Respublikasının Konstitusiyasının 94-cü maddəsinin I hissəsinin 1-ci bəndinə uyğun olaraq, uşaqların yaşına uyğun informasiya əldə etmək hüququnun həyata keçirilməsi ilə əlaqədar onların zərərli informasiyadan qorunması tədbirlərini müəyyən edir və bu sahədə yaranan münasibətləri tənzimləyir. Qeyd edək ki, qanun 2020-ci il yanvarın 1-dən qüvvəyə minir.
Tanınmış uşaq yazıçısı Sevinc Nuruqızı bizimlə söhbətində bildirdi ki, Prezident tərəfindən imzalanan qanunun uşaqlarımızın informasiya təhlükəsizliyinin təmin olunması baxımından çox böyük əhəmiyyəti var. S.Nuruqızı hesab edir ki, bu gün uşaqlarımızı zərərli informasiyalardan qoruya bilmirik. Onun sözlərinə görə, bu sənəddə əks olunan bütün maddələr Azərbaycan uşağının əxlaqının, tərbiyəsinin formalaşmasında mühüm rola malikdir. Bütün hallarda, bu qanun hər vətəndaşın, hüquqi və fiziki şəxsin, informasiya yayımı ilə məşğul olan qurumların üzərinə böyük məsuliyyət qoyur. “Uşaqlarımızın zərərli informasiyadan qorunması olduqca vacib bir məsələdir və bu, hər bir valideyni düşündürdüyü kimi, dövləti də düşündürür. Belə olmasaydı, Prezident tərəfindən “Uşaqların zərərli informasiyadan qorunması haqqında” Azərbaycan Respublikasının Qanunu imzalanmazdı. Hesab edirəm ki, bu qanunda əks olunan bütün maddələr, fikirlər uşaqlarımızın həyatında mühüm rol oynayacaq. Bu qanun onların zərərli informasiya almaq imkanlarını tamamilə məhdudlaşdıracaq. Etiraf edək ki, uşaqlar bir sıra hallarda valideyn nəzarətindən yayınan kimi telefon, kompyuter, yaxud da digər alternativ cihazlar vasitəsilə internetə daxil olur və burada zərərli informasiya “cəngəlliyi” ilə qarşılaşırlar. Bu da onların psixologiyasına mənfi təsir göstərir. Odur ki, bəzən uşaqlarda müəyyən neqativ xüsusiyyətlər müşahidə edirik ki, onların bu xüsusiyyətləri haradan götürdüyü barədə düşünürük. Bilirsiniz, internetdə uşaqların yaş kateqoriyalarına uyğun olmayan çeşidli informasiyalar var. Düşünürəm ki, bu qanun bütün yayımçıların üzərinə böyük məsuliyyət qoyur. Bu sənəd uşaqların informasiya təhlükəsizliyinin təmin edilməsi baxımından böyük əhəmiyyətə malikdir. Bu qanun uşaqlarımızın təhlükəsiz gələcəyinin bir qarantıdır” - deyə yazıçı bildirdi.
İradə SARIYEVA
