Elçin Rüstəmov: “Azərbaycanda turizmin inkişafı üçün dövlət səviyyəsində bir sıra işlər görülür”
Məlumdur ki, hər növbəti il ölkəmizə gələn turistlərin sayında artımlar olur. Gələn turistlərin coğrafiyası da genişlənməkdədir. Dünyanın dörd bir yanından turistlər istirahət üçün Azərbaycanı seçirlər.
Açıqlanan statistik rəqəmlərə əsasən, 2018-ci ilin yanvar-oktyabr aylarında Asiya və Yaxın Şərq ölkələrindən gələn səyahətçilərin sayında böyük artım müşahidə olunur. 2018-ci ilin yanvar-oktyabr aylarında Yaxın Şərq ölkələrindən gələn ziyarətçilərin sayı 330 min olub, bununla da ötən ilin eyni dövrü ilə müqayisədə 42% artım baş verib. Bu regiondan daha çox səyahətçi Səudiyyə Ərəbistanı, İsrail və Küveytdən gəlib.
Onu da qeyd edək ki,yanvar-oktyabr ayları ərzində Azərbaycana gələnlər arasında Rusiya vətəndaşları 752 min səyahətçi ilə birinci yerdə dururlar. Rusiyalı səyahətçilər 2017-ci ilin eyni ayları ilə müqayisədə 3,3% artaraq Azərbaycana gələn bütün xarici vətəndaşların 31%-ni təşkil edirlər.
Ən maraqlı fakt Hindistan və Pakistandan gələn səyahətçilərin sayının müvafiq olaraq 183% və 149% artmasıdır.
10 ay ərzində ölkəyə daxil olan səyahətçilərin ümumi artım tempi 6,1% təşkil edib, səyahətçilərin sayı isə 2,277 milyondan 2,416 milyona çatıb.
Ekspertlər son 10 ayda ölkəmizə gələn səyahətçilərin sayının artmasının gözlənilən olduğunu vurğulayırlar. Onların fikrincə, ölkəmizə turist axınının əsas səbəblərindən biri ictimai-siyasi sabitliyin təmin edilməsidir.
"New ERA Travel” şirkətinin direktoru, turizm eksperti Elçin Rüstəmov “Bakı-Xəbər”ə açıqlamasında qeyd etdi ki, turizm qeyri-neft sektorunun əsas sahələrindən biridir. Bu sahənin inkişafı üçün dövlət tərəfindən dəstək göstərilir. Turizmin inkişafı istiqamətində görülən işlər artıq göz qabağındadır. Son illər ölkəmizə turist axını bu sahənin inkişaf etdiyini göstərir.
Həmsöhbətimizin sözlərinə görə, 2016-cı ildə dövlət başçısı tərəfindən Azərbaycan Respublikasında ixtisaslaşmış turizm sənayesinin inkişafına dair “Strateji Yol Xəritəsi” təsdiqləndi. Faktiki olaraq turizmin intensiv inkişaf dövrü həmin vaxtdan hesablanmalıdır.
Ekspert onu da vurğuladı ki, ölkəmizdə keçirilən beynəlxalq əhəmiyyətli yarışlar, tədbirlər, konfranslar turist sayının artmasına təsir göstərir: “Sevindirici haldır ki, ölkəmizə gələn turistlər razı qalırlar. Səyahətçilər burada olan şəraitdən çox razı qaldıqlarını bildirirlər. Onlar öz razılıqlarını ölkələrinə qayıtdıqdan sonra sosial şəbəkə vasitəsilə ictimailəşdirirlər. Beləliklə, ölkəmizə gələn turist sayı artır. Turist sayının artmasının səbəblərindən biri də viza sisteminin sadələşdirilməsidir”.
E.Rüstəmov qeyd etdi ki, Azərbaycanda turizmin inkişafı üçün dövlət səviyyəsində bir sıra işlər görülür və bu sahənin inkişafı üçün onlar da bütün gücü ilə çalışırlar. Təbii ki, ölkəyə turistlərin gəlişi yalnız turizm agentliklərinin deyil, bu və ya digər formada bundan maddi gəlir əldə edən bütün qurum və şəxslərin, daha dəqiq desək, ümumilikdə, dövlətin marağındadır: “Bilirsiniz, turizm hərtərəfli sahə olduğu üçün yalnız bir qurumun fəaliyyəti effektiv olmaya bilər, sadə dillə desək, turist yalnız otelə deyil, ölkəyə, təbiətə, infrastruktura, insanlara, ölkənin mətbəxinə görə gəlir. Buna görə də bütün bu sadalananlar tam bir formada bütövlük təşkil etməlidir ki, gələn turistlərin sayında əsaslı şəkildə artım olsun”.
Günel CƏLİLOVA
