Məlahət Mürşüdlü: “Buna görə də müəllimlərdə məktəbə rəhbərlik etmək üçün böyük maraq var”
Məlum olduğu kimi, 22-24 noyabr tarixlərində dövlət ümumtəhsil müəssisələrinin direktoru vəzifəsinə işə qəbul üzrə müsabiqənin imtahan mərhələsi keçiriləcək. Müsabiqəyə ölkə üzrə 700-ə yaxın vakant yer çıxarılıb. 700-ə yaxın vakant yerə isə direktor olmaq istəyən 2037 müəllimin elektron ərizəsi Təhsil Nazirliyi tərəfindən təsdiq edilib. Həmin müəllimlər məktəb direktorları imtahanında iştirak edəcəklər.
700 vakant direktor yerinə 2000-dən artıq müəllimin iddialı olmasına münasibət bildirən tanınmış təhsil eksperti Məlahət Mürşüdlü bildirdi ki, bu olduqca müsbət göstəricidir. Bu onu göstərir ki, gənc müəllimlər arasında təhsilin idarə edilməsinə maraq çoxalıb. “Bunu çox müsbət hal kimi qiymətləndirmək lazımdır. 700-ə qədər vakant direktor yerinə 2037 müəllimin ərizə verməsi məktəb direktoru müsabiqələrinin obyektiv keçirilməsindən və idarəetmədə yeni innovativ metodlardan istifadə edilməsindən irəli gəlir. Buna görə də müəllimlərdə məktəbə rəhbərlik etmək üçün böyük maraq var. Məktəb direktoru olmaq istəyən müəllimlərin içində məktəb sistemini bilən, öz peşəsinin vurğunu olan, öz bilik və bacarığı ilə müasir tələblərə cavab verən müəllimlər çoxdur. Bu kateqoriyadan olan müəllimlərin sayca üstünlük təşkil etməsi də müsbət haldır. Müəllimlər düşünürlər ki, bəli, onlar bu bilik və bacarıqla orta təhsil sistemi qura bilərlər. İlbəil məktəb direktoru olmaq istəyən müəllimlərin sayının artması direktor seçimində obyektivliyin qorunması ilə əlaqədardır”. M.Mürşüdlü hesab edir ki, məktəb direktoru olmaq istəyən müəllimlər öz bilik və bacarıqlarını tətbiq etmək, təhsilə, tədrisə faydalı olmaq məqsədi güdürlər.
İradə SARIYEVA
