İlqar Hüseynli: “Bununla bağlı mexanizm hazırlanmalı və bu, qanunvericilikdə öz əksini tapmalıdır”
Azərbaycanda yeni tikilən xəstəxanalar, idman kompleksləri var. Onları hansısa formada saxlamaqdansa, istifadə edilməsi üçün sahibkarlara icarəyə verilməlidir. Xəbər verildiyi kimi, bunu Milli Məclisin plenar iclasında parlamentin İctimai birliklər və dini qurumlar komitəsinin sədri, hakim Yeni Azərbaycan Partiyası (YAP) icra katibinin müavini Siyavuş Novruzov deyib.
O qeyd edib ki, bununla da dövlət büdcəsindən onlara ayrılan maliyyə azaldıla bilər: “Bu addım həmin rayonlara sərmayələrin artmasına gətirib çıxara bilər”.
Millət vəkili qeyd edib ki, Azərbaycanda bir sıra rayonlar artıq özləri öz büdcəsini təmin edirlər və o üzdən, həmin rayonları həvəsləndirmək lazımdır.
S.Novruzovun fikrincə, bəzi strukturlar haqqında qərarlar qəbul edilib ki, cərimələr toplayırsa, onun 50 faizi həmin təşkilatların hesabına keçir: “Hesab edirəm ki, əgər rayon öz büdcəsin yerinə yetirirsə, bir az da artıq toplayırsa, ondan da müəyyən faiz rayonun büdcəsində qalsın ki, o qalan büdcədən də sosial xərclərə sərf etsin. Bu çox vacib bir məsələdir. Bizim iri şəhərlərimizin əksəriyyəti öz büdcəsi ilə özün təmin edə bilsə, dövlət büdcəsinə yüngüllük gətirər”.
O da məlumdur ki, ötən illər ərzində dövlət vəsaiti hesabına böyük infrastruktur layihələri həyata keçirilib. Nəticədə yeni idman kompleksləri, xəstəxanalar və digər bu kimi komplekslər tikilib. Həmin komplekslərin saxlanması üçün hər il dövlət büdcəsindən böyük həcmdə vəsaitlər ayrılır. Həmin komplekslər icarəyə verilsə, o zaman dövlət büdcəsinin yükü azalacaq və nəticədə digər sosial-iqtisadi xarakterli işlərin görülməsi üçün imkanlar artacaq. Bu baxımdan, ekspertlər sözügedən təklifi necə dəyərləndirirlər?
Sözügedən məsələni dəyərləndirən ekspert İlqar Hüseynli hesab edir ki, prinsipcə, bu mümkündür və bu istiqamətdə müəyyən addımlar atıla bilər: “Məsələ ondadır ki, sözügedən obyektlərin saxlanmasına böyük həcmdə vəsait ayrılır. Görürsən ki, böyük bir idman kompleksi tikilib, amma ondan istifadə edənlərin sayı kompleksin böyüklüyünə adekvat deyil. Yəni istifadə edənlərin sayı elə də çox deyil. Ancaq həmin kompleksin saxlanmasına hər il dövlət büdcəsindən vəsait ayrılır. Yaxud da tikilən xəstəxanadan tam istifadə edilmir. O mənada ki, görürsən müraciət edənlərin sayı azdır. Bu baxımdan, əlbəttə ki, sözügedən komplekslərin müəyyən hissəsinin icarəyə verilməsi həmin obyektlərin saxlanmasında müsbət rol oynayacaq. Belə ki, daxil olan icarə haqları sözügedən kompleksin saxlanma xərclərini ödəyəcək. Bu həm də rayonlarda yeni iş yerlərinin yaranmasına şərait yarada bilər. Belə ki, sözügedən kompleksləri icarəyə götürən sahibkarlar müəyyən iqtisadi fəaliyyətlə məşğul olacaqlar. Bu zaman investisiya yatırılacaq və bu da məşğulluğun təmin olunmasına öz müsbət təsirini göstərəcək. Bütün bunlarla yanaşı, sözügedən məsələ ilə bağlı mexanizm hazırlanmalı və bu, qanunvericilikdə öz əksini tapmalıdır. Deməyim odur ki, nəcə gəldi həmin obyektləri icarəyə vermək olmaz. İstənilən halda, sözügedən təklif maraqlıdır və bununla bağlı müəyyən addımlar atılmalıdır”.
Vidadi ORDAHALLI
