“... özəl təhsil müəssisələrinə verilmiş lisenziyalar vaxtından əvvəl...” “Qanunvericilikdə həyata keçirilən bu dəyişiklik Azərbaycan təhsilinin dünya təhsil sisteminə inteqrasiyası istiqamətində çox mühüm addımdır”
Bildiyimiz kimi, ölkəmizdə yerli məktəblərlə yanaşı, xeyli sayda xarici məktəb də fəaliyyət göstərir. Nazirlər Kabineti “Təhsil müəssisələrinin akkreditasiyası qaydaları”na dəyişikliklər edib.
Bu qaydaların indiyədək mövcud olan variantına əsasən, təhsil müəssisəsinin akkreditasiyası hər 5 ildə (əcnəbilər və ya vətəndaşlığı olmayan şəxslər, xarici hüquqi şəxslər tərəfindən təsis edilmiş təhsil müəssisələrinin akkreditasiyası 3 ildə) bir dəfə həyata keçirilib. Yeni qaydalarda isə əcnəbilər və ya vətəndaşlığı olmayan şəxslərlə bağlı olan istisna hal aradan qaldırılıb. Bundan sonra bütün təhsil müəssisələrinin akkreditasiyası hər 5 ildə bir dəfə həyata keçiriləcək.
Yeni qaydalarda akkreditasiyanın nəticələrinin təhsil müəssisəsinin fəaliyyətinin 5 il müddətinə uzadılmasına hüquqi təminat yaratması ilə bağlı müddəaya dəyişiklik edilib. Bu müddəada təhsil müəssisəsinin fəaliyyət müddətinin uzadılması üçün müəyyən edilmiş konkret müddət ləğv edilib.
Tanınmış təhsil eksperti Kamran Əsədov bizimlə söhbətində bildirdi ki, bu, ölkəmizdə fəaliyyət göstərən xarici məktəblərin daha keyfiyyətli təhsil verməsinə səbəb olacaq. “İlk növbədə qeyd edim ki, son illər ərzində Azərbaycan təhsil sistemində ciddi islahatlar həyata keçirilir. Bu təkcə kəmiyyətin artmasına xidmət etmir, eyni zamanda, keyfiyyətin də yüksəldilməsi istiqamətində mühüm irəliləyişlər müşahidə olunur.
Məhz ölkədə mövcud olan sabitlik, yaradılan biznes mühiti xarici investorları ölkəmizə cəlb edir. Xarici ölkə vətəndaşlarının diqqətini təhsil sistemi də cəlb edir. Son 5 il ərzində ölkədə xarici ölkə vətəndaşları tərəfindən yaradılan təhsil müəssisələrinin sayında kəskin artım müşahidə olunur ki, onlar tərəfindən yaradılan təhsil ocaqları dizaynı, müasir tələblərə cavab verməsi, infrastruktur və kadr potensialına görə ciddi şəkildə fərqlənir ki, bu da təhsil müəssisələri arasında rəqabətin formalaşmasına gətirib çıxarır.
Hesab edirəm ki, dövlət tərəfindən xarici təhsil müəssisələrinə lisenziyaların verilməsindəki sadələşmələrin qanunvericilik aktlarında da öz əksini tapması müsbət haldır. Belə ki, qüvvədə olan qanunvericilik aktlarına görə, fəaliyyət göstərən təhsil müəssisəsi 5 ildən bir yenidən təkrar proseduru keçirdi ki, bu da müəyyən qədər onların fəaliyyətində ləngimələrə gətirib çıxarırdı. Belə ki, təhsil müəssisəsi həmin ili diqqətini təhsildən yayındırıb ancaq səndləşmə məsələlərinə ayırırdı ki, bu da tədrisdə müəyyən axsamalara gətirib çıxarırdı” - deyə bildirən K.Əsədovun sözlərinə görə, digər tərəfdən də 5 il müddətin tətbiq edilməsi müvafiq dövlət orqanlarının özəl təhsil müəssisələrinin fəaliyyətini yoxlamasına mane olurdu.
“Həyata keçirilən dəyişiklikdən sonra fəaliyyətində hansısa çatışmazlıqlar, qüsur və narazılıqlar olan özəl təhsil müəssisələrinə verilmiş lisenziyalar vaxtından əvvəl ləğv oluna bilər, 5 ildən tez aiddiyyəti dövlət orqanları bu təhsil müəssisəsində müvafiq yoxlamaları həyata keçirə bilərlər. Bu dəyişiklik, eyni zamanda, fəaliyyəti müsbət olan təhsil ocaqlarına da geniş imkanlar açır. Belə ki, onlar daha 5 ildən bir yenidən sənədləşməyə vaxt ayırmayacaqlar. Bundan sonra onlar yalnız keyfiyyətli təhsil xidməti göstərəcəklər ki, vaxtaşırı sənədləşməyə cəlb olunmasınlar. Hesab edirəm ki, qanunvericilikdə həyata keçirilən bu dəyişiklik Azərbaycan təhsilinin dünya təhsil sisteminə inteqrasiyası istiqamətində çox mühüm addımdır” - deyə K.Əsədov bildirdi.
İradə SARIYEVA
