Məlahət Mürşüdlü: “Yaradılacaq sanator tipli məktəbəqədər təhsil müəssisəsində uşaqlar hərtərəfli yetişdiriləcəklər”
Azərbaycanda sanator tipli məktəbəqədər təhsil müəssisəsinin yaradılması reallaşdırılacaq. Baş nazir Novruz Məmmədov tərəfindən imzalanan qərara əsasən, “Məktəbəqədər təhsil müəssisəsinin Nümunəvi Nizamnaməsi”ndə dəyişikliklər edilib.
Dəyişikliyə əsasən, məktəbəqədər təhsil müəssisələrində “Təhsil haqqında” Azərbaycan Respublikasının Qanununa uyğun olaraq, psixoloji xidmət təşkil olunur. Həmçinin, sanator tipli məktəbəqədər təhsil müəssisələri, eyni zamanda, sağlamlıq imkanları məhdud olan uşaqlar üçün xüsusi məktəbəqədər təhsil müəssisələri yaradılacaq.
“Ali təhsil pilləsində tibb təhsilinin əsas təhsili üzrə ixtisasların Təsnifatı”nın təsdiq edilməsi və “Ali təhsilin bakalavriat səviyyəsi ixtisaslarının (proqramlarının) Təsnifatı”nın təsdiq edilməsi haqqında” qərarda edilmiş dəyişikliyə görə, təsisçiləri əcnəbilər və ya vətəndaşlığı olmayan şəxslər, xarici hüquqi şəxslər olan təhsil müəssisələrinin müəllim heyətinin tərkibində Azərbaycan Respublikasının vətəndaşları sayca üstünlük təşkil etməlidirlər. Yerli kadr potensialı buna imkan vermədikdə, say nisbəti dəyişdirilə bilər.
Sanator tipli məktəbəqədər təhsil müəssisəsinin yaradılmasını müsbət addım kimi qiymətləndirən tanınmış təhsil eksperti Məlahət Mürşüdlü hesab edir ki, bu tipli müəssisələrə həqiqətən də ehtiyac var. Onun sözlərinə görə, bu gün müvafiq qurumlar ölkədə inklüziv təhsilin inkişafı, fiziki sağlamlığı məhdud olan uşaqların məktəbəqədər və orta məktəb təhsilinə yönəldilməsi istiqamətində layihələr həyata keçirirlər. M.Mürşüdlünün fikrincə, fiziki sağlamlığı məhdud olan uşaqlarla bağlı sanator tipli müəssisənin yaradılması həm o uşaqların cəmiyyətə rahatlıqla adaptasiya olunmasına, həm də onların məktəbəqədər təhsilə cəlb edilməsinə şərait yaradacaq. “Sanator tipli məktəbəqədər müəssisənin yaradılmasına müsbət yanaşıram. Bilirsiniz ki, məktəbəqədər təhsillə bağlı işlər görülməkdədir. Sağlamlıq imkanları məhdud olan uşaqların bu müəssisələrə cəlb edilməsi müsbət nəticələr verəcək. Birincisi ona görə ki, bu uşaqlar həmin müəssisədə cəmiyyətə yararlı, faydalı şəkildə yetişdiriləcəklər. Digər tərəfdən, onlar burada həm müalicə alacaqlar, həm də təlim və tərbiyə. Sözsüz ki, bu müəssisə o uşaqların cəmiyyətə adaptasiyasında, onların gələcəkdə inklüziv təhsilə cəlb edilməsində böyük rol oynayacaq. Başlıcası isə, yaradılacaq sanator tipli məktəbəqədər təhsil müəssisəsində uşaqlar hərtərəfli yetişdiriləcəklər”.
M,Mürşüdlü hesab edir ki, bu müəssisələrə cəlb ediləcək uşaqlar həm də hazırlıq keçəcəklər və bu da onların 1-ci sinfə daxil olmasına kömək edəcək. O, həmçinin, vurğuladı ki, bu müəssisənin yaradılması həm də fiziki əngəlli uşaqlarla işləyəcək pedaqoqların, kadrların yetişdirilməsi tələbatını gündəmə gətirəcək.
İradə SARIYEVA
