Fatimə Hacıbəyli: “Hesab edirəm ki, uşağın sosial xərcinin qarşılanması üçün…” Əli Əlirzayev: “Demoqrafik tarazlığı saxlamaq üçün müəyyən stimul yaratmaq lazımdır”
“Azərbaycanda 3 yaşına qədər uşaqlara müavinət verilməlidir”. Bunu parlamentin Sosial siyasət komitəsinin sədri Hadı Rəcəbli deyib. O bildirib ki, yeni doğulan uşaqlara təyin edilən birdəfəlik müavinətin həcminin artırılması nəzərdə tutulur: “Təklif edirəm ki, 3 yaşına qədər uşaqlara da müavinət verilsin. Hətta bununla bağlı yeni qanun da hazırlana bilər”.
3 yaşına qədər olan uşaqlara müavinətin verilməsi təklifini ekspertlər də dəstəkləyirlər.
“Vəfa” Sosial İctimai Birliyinin rəhbəri Fatimə Hacıbəyli bizimlə söhbətində qeyd etdi ki, 3 yaşına qədər olan uşaqlara müavinətin verilməsinin tərəfdarıdır: “Nəzərə almaq lazımdır ki, bu müddət ərzində ana işləmir və tək atanın əməkhaqqı ailənin bütün qayğılarına çatmır. Bu səbəbdən də hesab edirəm ki, uşağın sosial xərcinin qarşılanması üçün onlara müavinətin verilməsi düzgün olar. Bəllidir ki, 3 yaşına qədər olan uşağın xərci elə də az məbləğ deyil. Aztəminatlı ailələrə dəstək məqsədilə 3 yaşına qədər uşaqlara müavinət verilə bilər. Biz Qərb təcrübəsinə diqqət etdikdə adətən 1 yaşa qədər uşağa verilən uşaq pulunun çox olduğunu görərik. Növbəti illərdə isə bu məbləğ bir qədər azalır. Azərbaycanda da bu cür - 3 yaşa qədər bir məbləğ, 3 yaşdan 5 yaşa qədər isə bir məbləğ təklif olunur. İlk illərdə uşağa görə daha çox pul verilməlidir ki, valideynlər baha uşaq yeməyini bir qədər qarşılaya bilsinlər”.
İqtisadçı-ekspert Əli Əlirzayev qeyd etdi ki, Azərbaycanda təbii artım azalır, ölənlərin sayı doğulanların sayına yaxınlaşır: “Vaxt vardı ki, hər min nəfərə 30 nəfər doğulurdusa, indi 10 nəfər doğulur, 3 dəfə azalıb. Demoqrafik tarazlığı saxlamaq üçün müəyyən stimul yaratmaq lazımdır. Azərbaycanda çoxuşaqlı ənənəsi olub və buna meyl var. Amma iqtisadi sıxıntı çoxuşaqlıqdan imtina ilə nəticələnir. Çünki çox uşağı saxlamaq olmur. İndi 1-2 uşağı saxlayanda nə qədər əziyyət çəkirsən. Ona görə dövlət hər doğulan uşağa vəsait verməlidir. Ailə var ki, valideynlərin biri, ya ikisi də işləmir, yaxud az maaş alırlar. Burada birdəfəlik yardımdan əlavə müəyyən yaşa qədər, 10 və 18 yaşa qədər aylıq ödəniş verilə bilər. Sovet vaxtında belə ailələr olub, qəhrəman ana, başqa güzəştlər və sairə. Mən çoxuşaqlı ailədə böyümüşəm”.
Günel CƏLİLOVA
