Məlahət Mürşüdlü: “Yaxın illər ərzində Azərbaycan ingilis dilini bilmə səviyyəsinə görə ön sıralarda olacaq, çünki bu sahədə müəyyən işlər aparılır”
Qloballaşan dünyada daha çox aparıcı xarici dillərdə danışığa üstünlük verilir. Daha çox istifadə edilən dil ingilis dilidir. Hazırda ingilis dilinə böyük maraq var. Ölkəmizdə də qeyd olunan xarici dilə böyük üstünlük verilir.
İsveçrənin məşhur "EF Education First" şirkəti 8 ildən bəri hər il ingilis dilinə bələdolma səviyyəsinə görə ölkələrin reytinqini hazırlayıb. Azərbaycan ingilis dilinə bələdolma səviyyəsinə görə dünya ölkələrinin sıralandığı reytinqdə 77-ci yeri tutub. Builki reytinqdə 88 ölkə və region var.
İl başlayandan bəri həmin ölkələrdə şirkətin əməkdaşlarının keçirdikləri testlərdə ingilis dilinin daşıyıcıları olmayan 1,3 milyon nəfər iştirak edib.
Azərbaycanda keçirilmiş testlərin nəticələrinə görə ölkəmizə 45,85 bal verilib. Kişilər arasında orta göstərici 43,65 bal, qadınlar arasında 46,59 olub.
Hesabat müəllifləri Azərbaycanda ingilis dilinə bələdolma səviyyəsini "çox aşağı" dəyərləndiriblər. EF ekspertlərinin yazdığına görə, belə səviyyə insana özü barədə məlumat verməyə, sadə simvolları anlamağa, habelə əcnəbi turistə primitiv məsləhətlər verməyə ancaq kifayət edir.
İngilis dilini bilmə səviyyəsinə görə ölkəmizin nə səbəbdən inkişaf etmədiyini öyrənmək üçün ekspertlərə müraciət etdik.
Azad Müəllimlər Birliyinin rəhbəri Məlahət Mürşüdlü “Bakı-Xəbər”ə açıqlamasında qeyd etdi ki, Azərbaycan müstəqillik qazandıqdan sonra ingilis dilinə daha çox diqqət ayrıldı: “Bəllidir ki, Sovet dönəmində daha çox rus dilinə önəm verilirdi. Müstəqillikdən sonra isə vəziyyət dəyişdi. Dünyaya inteqrasiya etmək üçün mütləq ingilis dilini öyrənmək vacibdir. Nəzərə almaq lazımdır ki, Azərbaycanda ingilis dilinə diqqətin göstərilməsi tarixi qısadır. Qısa müddət ərzində ingilis dilinin öyrənilməsi üçün kurslar açılıb. İngilis dilinin peşəkar şəkildə öyrənilməsi üçün bəzi fondlar var. Müəllimlər həmin fond vasitəsilə ingilis dilini peşəkar şəkildə mənimsəyirlər. Zənnimcə, yaxın illər ərzində Azərbaycan ingilis dilini bilmə səviyyəsinə görə ön sıralarda olacaq. Çünki bu sahədə müəyyən işlər aparılır. İstər orta məktəbdə, istərsə də ali təhsil müəssisələrində ingilis dilinin tədrisinə böyük önəm verilir”.
Günel CƏLİLOVA
