Fatimə Hacıbəyli: “18 yaşında gənc oğlan ailə yükünü çəkə bilməyərək, maddi və mənəvi baxımdan ailəsini təmin etməyə hazır deyil”
Deyirlər "Tez evlənənlə, tez yuxudan oyanan qazanar". Bu ifadəni yaşlıların, valideynlərin, nənə-babaların dilindən tez-tez eşidirik. Bu misalı özlərinə örnək edərək, nəvə-nəticə görmək arzusu ilə yaşayan valideynlər övladlarının tez ailə qurub oğul-uşaq sahibi olmasını istəyirlər. Elə bu səbəbdən bəzi hallarda orta məktəbi yenicə bitirən bəylər evliliyə nə psixoloji, nə iqtisadi, nə də fiziki baxımdan hazır olurlar.
Açıqlanan statistik rəqəmlərə əsasən, ölkədə son 27 ildə 373 nəfər oğlan 18 yaşı tamam olanadək rəsmi nikaha daxil olub. Ötən müddətdə 18 yaşadək ailə həyatı quran oğlanların sayında ən yüksək göstərici 2006-cı ildə qeydə alınıb. Həmin ildə 50 oğlan 18 yaşı tamam olanadək evlənib. Sonrakı yüksək göstəricilər 2005, 1995, 2007-ci illərdə qeydə alınıb. 2005-ci ildə 18 yaşadək nikaha daxil olan oğlanların sayı 48, 1995-ci ildə 44, 2007-ci ildə 36, 2008-ci ildə 35 olub. 1990-cı ildən 2011-ci ilədək olan dövrün qalan illərində isə 18 yaşadək nikaha daxil olanların sayı hər il 11-20 nəfər arasında dəyişib.
18 yaşı tamam olmayan oğlanların rəsmi nikaha daxil olmasının düzgün olmadığını ekspertlər də təsdiqləyirlər.
“Vəfa” Sosial İctimai Birliyinin rəhbəri Fatimə Hacıbəyli “Bakı-Xəbər”ə açıqlamasında qeyd etdi ki, oğlanlar üçün ideal evlilik yaşı 26-28 sayılır. Ancaq bəzi bölgələrdə qızlarla yanaşı, oğlanlar da tez ailə həyatı qururlar: “18 yaşında rəsmi nikaha daxil olan oğlan, əslində, ailənin nə demək olduğunu bilmir. Təbii ki, 18 yaşlı oğlan özündən bir neçə yaş kiçik qızla ailə həyatı quracaq. Bu isə erkən nikah sayılır.
18 yaşında gənc oğlan ailə yükünü çəkə bilməyərək, maddi və mənəvi baxımdan ailəsini təmin etməyə hazır deyil. O ailələr adətən ata-anadan asılı olurlar. Həm maddi, həm də hər hansı qərar verilərkən mütləq ailənin istəyi ilə hərəkət edirlər. Sərbəst düşünə bilmirlər.
İstər oğlan, istərsə də qız bioloji cəhətdən daha tez ana-ata ola bilər, amma psixoloji baxımdan vaxt lazımdır ki, bir insan kimi tam formalaşsınlar. Erkən evliliyə girənlər tam real qərar qəbul edə bilmirlər. Deməli, onların əvəzinə kimsə qərar qəbul edir. Bu cür evlilik qadın üçün dözülməz vəziyyət, kişi üçünsə xoşbəxtliyi çöldə axtarmaq üçün bəhanə olur”.
Günel CƏLİLOVA
