2018-cı il oktyabrın 21-27 tarixlərində Davamlı üzvi çirkləndiricilərin məhv edilməsi üzrə Beynəlxalq Şəbəkə “QURĞUŞUNLA ZƏHƏRLƏNMƏYƏ SON QOYAQ” aksiyalar həftəsi keçirib. “Ruzgar” Ekoloji İctimai Birliyi bu münasibətlə oktaybrın 25-də informasiya mübadiləsi üzrə seminar təşkil edib.
Seminarda elmi işçilər, ekspertlər, kütləvi informasiya vasitələrinin və QHT nümayəndələri iştirak ediblər. Seminarın məqsədi əhali arasında, uşaqların boyaların təsirindən qorunması və boyalarda qurğuşunun miqdarına məhdudiyyət qoyulması sahəsində məlumatlandırma və maarifləndirmə işinin təşkilindən ibarət olub. Seminarı giriş sözü ilə Birliyin sədri professor İslam Mustafayev açıb və qeyd edib ki, dünyanın 90-dan çox ölkəsində istifadə edilən boyalarda qurğuşunun miqdarı təyin olunub və göstərilib ki, bu boyaların 70%-dən çoxunda qurğuşunun miqdarı yol verilən həddən yüksəkdir. Qurğuşunun uşaqların sağlamlığına ciddi mənfi təsirindən bəhs edən ekspertlər bu barədə dünya praktikasından misallar gətiriblər. Uşaq xəstələnmələrinin ölkələrin iqtisadiyyatına vurduğu ziyan BMT Ətraf mühit Proqramının tövsiyə etdiyi metodlarla hesablanıb. Hazırda Ümumdünya Səhiyyə Təşkilatı 2030-cu ildən sonra boyalarda qurğuşunun istifadə edilməsinə qadağa qoymaq haqqında qərar hazırlayıb. Layihə nəticələri geniş əhali kütləsinin bu sahədə məlumatlanma dərəcəsinin artırılması, maarifləndirilməsinə yönəldilib. Maraqlı tərəflərin - boyaları istehsal edənlərin, idxal-ixrac edənlərin və istehlakçıların maarifləndirilməsi də nəzərdə tutulub. Məktəblər, bağçalar, xəstəxanaları idarə edənlər xüsusi diqqət mərkəzində olub. Qərar qəbul edənlərin nəzərinə əsas müddəalar çatdırılıb.
Birlik bu sahədə təbliğat kampaniyasını genişləndirmək niyyətindədir.
Baki-xeber.com
