“Ölkəmizdə Psixoloqlar Şurasının yaradılmasına çox ciddi ehtiyac var. Psixoloqlar Şurası çoxdan təşkil edilməli idi. Artıq bu məsələ “Psixoloji yardım haqqında” qanun layihəsində önə çəkilib. Azərbaycanda Psixoloqlar Şurasının yaradılmasının əhəmiyyəti çox böyükdür. Milli Məclisdə bu məsələ ilə millət vəkili Bəxtiyar Əliyev məşğul olur. Bu şuranın yaradılması və fəaliyyətə başlamasının əhəmiyyəti çox müsbət olacaq. İlk növbədə əhaliyə göstərilən psixoloji xidmət yaxşılaşacaq, psixoloji yardım şəbəkələri formalaşacaq, psixoloji yardımın gücü artacaq”. Bu fikirləri “Bakı-Xəbər”ə Azərbaycanda Psixoloqlar Şurasının yaradılması ilə bağlı məsələyə münasibət bildirərkən tanınmış psixoloq, professor Nadir İsmayılov deyib.
O, həmçinin, vurğulayıb ki, yeni hazırlanan "Psixoloji yardım haqqında” qanun layihəsinin qəbul edilməsinin də əhəmiyyəti böyükdür.
N.İsmayılov hesab edir ki, Azərbaycanda Psixoloqlar Şurasının yaradılması psixoloji xidmət sahəsində mövcud olan problemlərin aradan qaldırılmasına, eləcə də bu sahədə fəaliyyət göstərən təsadüfi adamların sıradan çıxmasına səbəb olacaq. “Respublikamızda mövcud olan psixoloji mərkəzlərin fəliyyətinə də Psixoloqlar Şurası nəzarət edəcək, bu qurumların işləri ümumiləşdiriləcək. Bu gün psixoloji mərkəzlərin çoxu kefləri nə istəyir, onunla məşğul olurlar. Şura fəaliyyətə başlayandan sonra bütün psixoloji mərkəzlərin işlərini tənzimləyəcək, onlara göstərişlər verəcək. Psixoloqlar Şurasının icazəsi olmadan yeni psixoloji xidmət müəssisələri açılmayacaq”-deyə N.İsmayılov bildirdi.
Qeyd edək ki, qanunun 21-ci maddəsinə əsasən, Azərbaycan Psixoloqlar Şurası psixoloji xidmət göstərən mütəxəssislərin fəaliyyətinin əlaqələndirilməsini, onların peşə hüquqlarının qorunmasını, təcrübə mübadiləsinin aparılması və təbliğini, peşəkarlıq səviyyəsinin yüksəldilməsini, əhalinin keyfiyyətli psixoloji xidmətlə təmin edilməsinə və psixoloji xidmət sahəsində elmi tədqiqatların aparılmasına köməklik göstərilməsini və psixoloji yardım standartlarının və etika normalarının işlənib hazırlanmasını tənzimləyəcək.
İradə SARIYEVA
