Rauf Əbdülhüseynoğlu: “Tezliklə Azərbaycanda istehsal edilən milli suvenirləri xarici bazarda da görə biləcəyik” Sevinc Əlizadə: “Bu gün Azərbaycanda istehsal edilən suvenirlərə xarici bazarda tələbat var, sadəcə bunun üzərində işləmək lazımdır”
Bu gün ölkəmizdə qeyri-neft sektorunun inkişafına xüsusi əhəmiyyət verilir. Bu da ölkə iqtisadiyyatının neftdən asılı olmadığını göstərən başlıca amillərdən biridir.
Tarixən Azərbaycanda sənətkarlığın çeşidli qolları inkişaf edib və burada dekorativ tətbiqi sənət, eləcə də keramika sənəti xüsusilə seçilib. Keramika ustalarının yaratdıqları əsərlər hazırda ölkəmizə gələn turistlərin diqqətini cəlb edir. Bundan başqa, artıq ölkəmizdə milli suvenirlərin istehsalına da başlanıb və bunun üçün xüsusi fabrik fəaliyyət göstərir. Əlbəttə, bu gün dekorativ-tətbiqi sənətlə məşğul olan sənətkarlar istəyirlər ki, onların əl işləri, eləcə də milli suvenir fabrikində hazırlanan məhsullar yalnız ölkə bazarında satılmasın, həmçinin, xarici bazarlara da yol açsın.
Onu da vurğulayaq ki, Prezident İlham Əliyev çıxışlarından birində ölkəmizdə milli suvenir istehsalının inkişafı ilə bağlı fikirlər səsləndirmişdi.
Respublikamızda yeni suvenir fabrikinin, istehsalat müəssisələrinin yaranması o deməkdir ki, Azərbaycan xaricə milli suvenirlər də ixrac etməlidir.
Azərbaycan Rəssamlar İttifaqının üzvü, tanınmış keçəçi rəssam Rauf Əbdülhüseynoğlu bizimlə söhbətində Azərbaycanda istehsal edilən milli suvenirlərin xarici ölkələrdə satışının həyata keçirilməsinin əhəmiyyətli ola biləcəyini qeyd etdi. O bu gün Çin istehsalı olan suvenirlərdən yorulub. Bu suvenirlərin keyfiyyətcə aşağı olduğunu qeyd edən R.Əbdülhüseynoğlu hesab edir ki, Azərbaycanda istehsal edilən suvenirlər dünya bazarında maraqla qarşılanar: “Dünyada çoxluq təşkil edən suvenirlər Çinə aiddir. Amma bu suvenirlərin keyfiyyəti o qədər də yaxşı deyil. Azərbaycanda isə suvenirlər əsasən təbii materiallardan hazırlanır. Bizdə həm fabrikdə suvenir istehsal edilir, həm də ayrı-ayrı sənətkarlarımız suvenirlər hazırlayırlar. Hazırda bizim suvenirlər xarici ölkələrə əsasən turistlər vasitəsilə gedir, bir də xaricdə keçirilən tədbirlər çərçivəsində təqdim edilir. Ancaq bu gün onların kütləvi ixracına ehtiyac var. Keramika, o cümlədən dulusçuluq ölkəmizdə sənətkarlıq istehsalının ən qədim sahələrindən biridir və bu gün də öz aktuallığını saxlayır. Onu da deyim ki, Prezident İlham Əliyevin yeni iqtisadi şərait üçün verdiyi sərəncamlar bu sahənin də intensiv inkişafına təkan verib. Bilirsiniz ki, Xırdalan şəhərində ölkəmizdə çini və saxsıdan keramik hədiyyələr istehsal edən fabrik fəaliyyətə başlayıb. Məlumdur ki, keramika sənəti, xüsusilə dulusçuluq xalqımızın ən qədim istinad yerlərindəndir. Yeni texnologiyaların istehsalata tətbiqi və artan tələbat bu sənətin də intensiv inkişafına şərait yaradıb. Ölkəmizdə turizmin inkişafı keramik məmulatlar, xüsusilə milli suvenir istehsalı üçün böyük üfüqlər açıb. Bu gün fabrikdə istehsal edilən suvenir və hədiyyələrə zəngin milli ornamentlər tətbiq olunur. Keyfiyyət və orijinallığı ilə seçilən istehsal məmulatları qısa müddətdə ixrac potensialını ortaya qoya bilib. Ümid edirəm ki, biz tezliklə Azərbaycanda istehsal edilən milli suvenirləri xarici bazarda da görə biləcəyik”.
Rəssam Sevda Əlizadənin fikrincə də bu gün Azərbaycanda istehsal edilən suvenirlərin xarici bazara axını müsbət nəticələr verə bilər. O hesab edir ki, istənilən xalq öz mədəniyyətini, adət-ənənələrini dünyada təbliğ etməkdə aktiv olmalıdır. Onun sözlərinə görə, biz bu günə kimi ölkədə istehsal edilən suvenirləri əsasən turistlər və yerli bazar üçün nəzərdə tuturduq, bundan sonra isə o məhsulların hələlik Türkiyə, Gürcüstan, Rusiya və s. ölkələrə çıxarılması haqqında düşünməliyik: “Bu gün biz müxtəlif mağazalarda, incəsənət mərkəzlərində milli suvenirlər və əl işlərini görürük. Onu da deyim ki, milli suvenirlərə xarici turistlər böyük maraq göstərirlər. Bu gün milli suvenirlərimiz çox çeşidli və maraqlıdır. Ağacdan, keramikadan və s. hazlanan suvenirlər turistləri o qədər valeh edir ki, hətta onlar öz ölkələrinə getdikdən sonra belə internet üzərindən suvenir sifariş verirlər. Sənətkar tanıyıram ki, onun hazırladığı suvenirlər, saxsı qablar xaricilərin marağına səbəb olub. Suvenirlərin hazırlanmasında Azərbaycanın qədim ornamentlərindən istifadə edilir. Düşünürəm ki, milli suvenirlərimiz xarici ölkə bazarlarına çıxarılarsa biz həm qədim sənətimizin çağdaş dövrdə yaşadıldığını nümayiş etdirə bilərik, həm də ölkə büdcəsinə gəlir gətirməyə nail olarıq. Bu gün Azərbaycanda istehsal edilən suvenirlərə xarici bazarda tələbat var, sadəcə bunun üzərində işləmək lazımdır. Biz məhsulumuzu ortaya çıxarmalıyıq ki, onun sifarişçisi də, alıcısı da tapılsın”.
İradə SARIYEVA
