Nəsimi RİH-dən “Bakı Xəbər”ə verilən məlumata görə, iclası giriş sözü ilə açan Nəsimi rayon İcra Hakimiyyətinin başçısı Asif Əsgərov çıxışında bildirib ki, respublikada əldə olunan uğurlar, hər bir bölgədə olduğu kimi, Bakının Nəsimi rayonunun sosial-iqtisadi həyatında da öz əksini tapıb. O deyib ki, son illərdə ölkəmizin hərtərəfli inkişafında əldə olunmuş yüksək dinamikaya uyğun olaraq, paytaxtın mərkəzi rayonlarından olan Nəsimi rayonunda da istehsalın artımında, quruculuq-abadlıq işlərinin genişlənməsində, önəmli sosial layihələrin sürətlə gerçəkləşdirilməsində nəzərəçarpacaq uğurlar qazanılıb.
Prezident İlham Əliyevin Bakı şəhərinin problemlərinin həllini sürətləndirmək, paytaxtın ümumi gözəlliyini və rahatlığını daha da artırmaq yönündə gerçəkləşdirdiyi layihələr, dövlət proqramlarında nəzərdə tutulan məqsədyönlü quruculuq-abadlıq tədbirlərinin ardıcıl yerinə yetirilməsinin Nəsimi rayonunda da sürətli inkişaf və genişmiqyaslı yeniləşməni təmin etdiyini deyən A.Əsgərov cari ilin doqquz ayında rayonun sosial-iqtisadi həyatını əks etdirən makroiqtisadi göstəricilərin əvvəlki ilin müvafiq dövründəkindən xeyli üstün olmasını görülən tədbirlərin nəticəsi adlandırıb.
A.Əsgərov bildirib ki, Prezident İlham Əliyevin göstərişinə əsasən, yararsız və ya qəzalı vəziyyətdə olan binalarda yaşayan sakinlərin mənzil-məişət şəraitinin yaxşılaşdırılması, Nazirlər Kabinetinin mövcud şəhərsalma normalarına cavab verməyən, şəhərin ümumu görünüşünə xələl gətirən yaşayış binalarının, sosial və digər qeyri-yaşayış obyektlərinin sökülərək yenidən qurulması, yeni yaşayış binalarının inşa edilməsi, əlavə iş yerlərinin açılması ilə bağlı qərarı istiqamətində də Nəsimi RİH məqsədyönlü işləri davam etdirir, rayon ərazisində müəyyən edilmiş ünvanlar üzrə 23 layihə üzrə söküntü-tikinti işləri aparılır. Aparılan genişmiqiyaslı abadlıq-quruculuq, yenidənqurma və yaşıllaşdırma işləri üçüncü rübdə də davam etdirilib. Hesabat dövründə rayonun hüquq-mühafizə orqanları ictimai-siyasi sabitliyin, asayişin təmin olunması, insan hüquq və azadlıqlarının qorunması, cinayətlərin qarşısının alınması və açılması sahəsində üzərinə düşən vəzifələri layiqincə yerinə yetirməyə nail olub.
İclasda Nəsimi rayon MKTB-nin rəisi Elman Yahyayev, Nəsimi rayon Sukanal İdarəsinin rəisi Vaqif Cəbrayıllı, Nəsimi RETSİ-nin rəisi Həbib Əzizov, Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondunun Nəsimi rayon şöbəsinin müdiri vəzifəsini icra edən İlham Hüseynov və 1 saylı İstilik Sahəsinin rəisi İlham Bəşirov çıxış edib. Çıxışlarda, əldə olunmuş nailiyyətlərlə yanaşı, həllini gözləyən problemlər, rayonda aparılması nəzərdə tutulan abadlıq işləri, vətəndaşların müraciətləri ilə bağlı görülən işlər də müzakirə olunub, Prezident İlham Əliyevin sədrliyi ilə Nazirlər Kabinetinin 2018-ci ilin doqquz ayının sosial-iqtisadi inkişafının yekunlarına və qarşıda duran vəzifələrə həsr olunmuş iclasındakı nitqindən irəli gələn vəzifələrlə bağlı RİHB yanında Şuranın geniş yığıncağının qərarı qəbul edilib.
Baki-xeber.com
