Fatimə Hacıbəyli: “Qeyri-neft sektorunda, emal sənayesində fəaliyyət göstərən qadınların sayı günü-gündən artır”
Son illər ölkəmizdə qeyri-neft sektoru sürətlə inkişaf edir. Xüsusilə regionlarda qeyri-neft sektorunun inkişafı qadınların məşğulluğunun təmin edilməsinə, hətta onların sahibkara çevrilməsinə şərait yaradıb. Qeyri-neft sektorunun inkişafı qadınların məşğulluğunun təmin olunmasında mühüm rol oynayır.
Bəllidir ki, son bir neçə ildə ölkə başçısı tərəfindən kənd təsərrüfatının, baramaçılığın, çayçılığın inkişafına xidmət edən fərmanların imzalanması bölgələrdə öz müsbət nəticəsini büruzə verir. Sovet dövründə qadınların əsas məşğuliyyətinə çevrilən sahələrin yenidən dirçəlməsi, tütünçülüyün, heyvandarlığın inkişafı nəticəsində bölgələrimizdə xeyli sayda iş yeri yaranıb. Tütünçülük, pambıqçılıq, çayçılıq, çəltik, sitrus meyvələri və baramaçılıq inkişaf etdikcə, regionlarda yeni iş yerləri açılır ki, bu da fabriklərin yenidən işə düşməsinə, istehsal gücünü artırmasına səbəb olur. Məlumdur ku, çay plantasiyalarında işləyənlərin arasında qadınların sayı hər zaman çox olub.
Eynilə xalçaçılığın inkişaf etdirilməsi qadınların iş probleminin həll olunmasında mühüm rol oynayıb.
Araşdırmalara görə, son illər qeyri-neft sektorunda çalışan qadınların sayı artır. Qeyri-neft sektorunda zərif cinsin rolunun artması barədə danışan “Vəfa” Sosial İctimai Birliyinin rəhbəri Fatimə Hacıbəyli “Bakı-Xəbər”ə açıqlamasında qeyd etdi ki, bu gün Azərbaycan qadını iqtisadi, siyasi həyatda çox fəaldır: “Ölkə iqtisadiyyatının inkişafı istiqamətində hər kəs əlində gələni edir. Bu işdə qadınların çəkisinin artması sevindiricidir. Azərbaycan qadını tək təhsil, səhiyyə və digər sahələrdə aparıcı işlərdə deyil, eyni zamanda, qeyri-neft sektoruna aid olan sahələrdə də çalışmalıdır. Sahibkarlığın inkişafı istiqamətində görülən işlər sayəsində qadın sahibkarların sayı artır. Statistik rəqəmlər də qadın sahibkarların sayının artmasını təsdiq edir. Ümumiyyətlə, qadınların sahibkar kimi kənd təsərrüfatına cəlb edilməsi aqrar sahənin inkişafına səbəb olacaq. Sovet vaxtında həmişə qadınları kənd təsərrüfatına cəlb ediblər. Onlar kənd təsərrüfatının müxtəlif sahələrində fəaliyyət göstəriblər. Bu sahədə yetərincə təcrübələri var”.
Həmsöhbətimizin sözlərinə görə, qeyri-neft sektorunda, emal sənayesində fəaliyyət göstərən qadınların sayı günü-gündən artır. Sevindirici haldır ki, Azərbaycanda ipəkçilik, baramaçılıq, xalçaçılıq kimi ənənəvi qadın sənəti yenidən dirçəliş və inkişaf mərhələsinə qədəm qoyur: “Məlumdur ki, vaxtilə bu sahənin dayandırılması nəticəsində çoxlu sayda qadın işsiz qaldı. Ancaq bu sahənin yenidən dirçəlməsi nəticəsində qadınlar yenidən öz sevdikləri sənətlərində çalışmağa başlayıblar. Qadınların ənənəvi məşğul olduğu sahələrdən biri də çayçılıqdır. Cənub bölgəsində çayçılığın inkişafı üçün yaradılan şərait nəticəsində qadınların məşğulluğu təmin olunub. Çəltik və sitrus meyvələri istehsalının inkişafında qadınların rolu xüsusi qeyd olunmalıdır. Eyni zamanda, heyvandarlığın, kənd təsərrüfatının inkişafı sayəsində qadınlar arasında artıq sahibkara çevrilənlər də var”.
Birlik sədri qeyd etdi ki, tütünçülük, pambıqçılıq, baramaçılıq inkişaf etdikcə, regionlarda yeni iş yerləri açılır. Bu, fabriklərin yenidən işə düşməsinə, istehsal gücünü artırmasına səbəb olur: “Baramaçılığın yenidən inkişafı istiqamətində dövlət tərəfindən müəyyən layihələr həyata keçirildi .Bu sahəyə dövlət qayğısı nəticəsində Şəkidə İpək Kombinatı işə düşüb”.
F.Hacıbəyli onu da əlavə etdi ki, qeyri-neft sektorunda çalışacaq qadınların sayının daha da artması üçün onlara dəstək olmaq lazımdır. Sahibkarlıqla məşğul olan zərif cinsin nümayəndələrinə güzəştli şərtlərlə ipoteka krediti vermək lazımdır: “Qeyri-neft sektorunun digər sahələrində çalışan və çalışmaq istəyən qadınlara iş təcrübəsini mənimsəmək üçün pulsuz kurslar təşkil olunmalıdır”.
Günel CƏLİLOVA
