Bakı şəhərinin Səbail rayonunda, Badamdar şosesində (Badamdar-20-ci sahəni birləşdirən yol) torpaq qatı asfaltın üstünə qədər gəlib. Bunu Trend-ə Ekologiya və Təbii Sərvətlər Nazirliyinin mətbuat katibi İradə İbrahimova deyib.
Onun sözlərinə görə, sürüşən torpaq qatının eni 250 metrdən, uzunluğu isə 200 metrdən çoxdur. Sürüşmə qatının hündürlüyü 15 metrdən artıqdır.
İ.İbrahimova sürüşmənin dinamikasında aktivliyin davam etdiyini də açıqlayıb.
İİbrahimova bildirib ki, ETSN Milli Geoloji Kəşfiyyat Xidmətinin geoloji planaalma ekspedisiyasının mütəxəssisləri növbətçilik rejimində Badamdar - 20-ci sahə avtomobil yolunun sağ kənarındakı sürüşmə sahəsində müşahidələri davam etdirirlər.
O, bildirib ki, ən son məlumata görə, sürüşmənin dinamikasında aktivlik davam edir. Sürüşmə kütləsini saxlamaq üçün 2013 cü ildə inşa edilmiş istinad divarı yamac boyu 4-5 metr aşağıya irəliləmiş, həmin istinad divarında hipsometrik olaraq, sürüşmə kütləsi hərəkət edərək avtomobil yoluna tökülüb: "Proses aktiv fazadadır. Sürüşmə ərazisi aidiyyəti qurumların nümayəndələri tərəfindən nəzarətindədir və insanların həyatı üçün təhlükə yoxdur".
ETSN Milli Geoloji Kəşfiyyat Xidmətinin geoloji planlama ekspedisiyasının rəisi Əziz Qaralov deyib ki, Bakının Səbail rayonunda, Badamdar - 20-ci sahə yolunda sürüşmənin baş verdiyi ərazi sürüşməyə meyilli sahə olub. Ə.Qaralovun sözlərinə görə, həmin ərazi hələ bu sürüşmə baş verməmişdən əvvəl ETSN tərəfindən hazırlanmış və Nazirlər Kabineti tərəfindən təsdiqlənmiş “Abşeron rayonunda sürüşməyə meyilli ərazilərin atlası”na daxil edilmişdi. Həmin atlasda sürüşməyə meyilli ərazinin konturları dəqiqliklə qeyd edilmişdi: “Baş vermiş bu sürüşmə prosesi də həmin konturların daxilindədir. Sürüşmə nəticəsində asfaltın bir hissəsi torpaq qatının altında qalıb”.
Hazırda müşahidələrin davam etdirildiyini deyən Ə.Qaralov əlavə edib ki, oktyabrın əvvəlində bu sürüşmə hadisəsi baş verdikdən sonra ekologiya və təbii sərvətlər nazirinin müavini Novruz Quliyevin rəhbərliyi altında qərargah yaradılıb: "Onlar növbətçilik rejimində işləyir, hər saat ərzində müşahidələr aparılır. Bu gün də sürüşmə prosesi baş verdikdə biz onu canlı şəkildə lentə aldıq".
Xatırladaq ki, ötən gün günorta saatlarında Bakının Badamdar qəsəbəsindən 20-ci sahəyə gedən yolun kənarındakı yamacda sürüşmə aktivləşib. Hadisə nəticəsində həmin yolda hərəkət məhdudlaşdırılıb və yamacda yerləşən 8 fərdi yaşayış evinin sahibinə evləri müvəqqəti boşaltmaq tapşırılıb.
