Kamran Əsədov: “… üstünlüklərindən biri odur ki, gənclər artıq təhsil almaq üçün əcnəbi ölkələrə getməyəcək”
"Azərbaycanda daha üç Rusiya universitetinin filialı açılacaq". Bunu Rusiyanın Azərbaycandakı səfiri Mixail Boçarnikov media nümayəndələrinə açıqlamasında deyib. O bildirib ki, bunlar Moskva Dövlət Beynəlxalq Münasibətlər İnstitutunun, Ali İqtisadiyyat Məktəbinin və Rusiya Dövlət Humanitar-İqtisadiyyat Universitetinin filialları olacaq: “Rusiyanın adıçəkilən ali təhsil müəssisələrinin filiallarının Azərbaycanda açılışı iki ölkə prezidentinin razılaşdırdığı “yol xəritəsi” əsasında humanitar əməkdaşlıq çərçivəsində baş tutacaq”.
Məlumat üçün qeyd edək ki, Azərbaycanda iki Rusiya universitetinin - M.V.Lomonosov adına Moskva Dövlət Universiteti və İ.M.Seçenov adına Moskva Dövlət Tibb Universitetinin filialları fəaliyyət göstərir.
Azərbaycanda daha üç Rusiya universitetinin filialının açılmasının vacibliyi barədə danışan təhsil eksperti Kamran Əsədov “Bakı-Xəbər”ə açıqlamasında qeyd etdi ki, hər bir ölkədə ali təhsil müəssisələrinin sayının artıq olması uğurlu addımdır: “Nəzərə almaq lazımdır ki, Azərbaycanda ölkə vətəndaşlarının cəmi 17 faizi ali təhsillidir. Bu isə aşağı rəqəmdir. Ancaq nəzərə almaq lazımdır ki, Azərbaycanda daha çox yerli ali təhsil müəssisələrinə ehtiyac var. Çünki xarici ölkə ali məktəblərinin filialları maliyyə axınına səbəb olur. Eyni zamanda, həmin təhsil müəssisələrində daha çox yerli təhsil qanununa deyil, daha çox filialı olduğu universitetin tədris proqramına üstünlük verilir”.
Həmsöhbətimizin sözlərinə görə, Azərbaycan-Rusiya münasibətlərinin normal olduğu bir məqamda universitetlərin açılması siyasi, iqtisadi, mədəni əlaqələri daha da genişləndirəcək: “Ölkəmizdə xarici ölkə ali təhsil müəssisələrinin filiallarının açılmasının üstünlüklərindən biri odur ki, gənclər artıq təhsil almaq üçün əcnəbi ölkələrə getməyəcək. Məlumat üçün bildirim ki, hər il 10 minə yaxın gənc Rusiyanın universitetlərində təhsil almaq bu ölkəyə yollanır. Ancaq həmin universitetlərin ölkəmizdə filialı açılarsa, ölkədən kənara maliyyə axınının qarşısı alınacaq. Nəzərə almaq lazımdır ki, Prezident İlham Əliyevin təhsilin inkişafı ilə bağlı imzaladığı strategiyanın əsas prioritetlərindən biri də ali təhsilin əlçatanlığıdır”.
K.Əsədov onu da vurğuladı ki, Azərbaycanda Rusiya universitetlərinin filiallarının açılması ölkəmizdə rəqabət mühitinin formalaşmasına səbəb olacaq: “Həmin universitetlər daha yaxşı təhsil verməyə çalışacaqlar ki, digər universitetlərdən seçilsinlər və ora daha çox axın olsun. Məlumdur ki, bu gün ölkədə 54 universitet var. Yeni bir universitetin yaradılması geniş bazara daxil olmaq deməkdir. Yalnız yüksək keyfiyyətli təhsil və aşağı təhsil haqqı ilə tələbələri həmin tədris müəssisələrinə cəlb etmək olar”.
Günel CƏLİLOVA
