Aynurə Həsənova: “Tibbin inkişafı istiqamətində görülən işlər sayəsində Azərbaycan səhiyyəsi bir çox ölkənin səhiyyəsindən irəlidədir”
Məlum olduğu kimi, Azərbaycan Respublikasının Prezidenti İlham Əliyev və birinci xanım Mehriban Əliyeva oktyabrın 11-də Quba Rayon Mərkəzi Xəstəxanasının açılışında iştirak ediblər. Xəstaxana ilə tanış olandan sonra Prezident Azərbaycan səhiyyəsinin inkişaf etməsi barədə məlumat verib.
Ölkə başçısı qeyd edib ki, son 15 il ərzində Azərbaycanda 600-dən çox yeni tibb müəssisəsi tikilib və ya əsaslı şəkildə təmir edilib: “Bu, bizim insanların sağlamlığına verdiyimiz böyük töhfəmizdir. İnsanların sağlamlığı ən vacib məsələdir. Bu gün statistikaya, Dünya Səhiyyə Təşkilatının hesablamalarında Azərbaycanın artan reytinqinə baxdıqda görürük ki, bu sahədə çox yaxşı nəticələr var. Azərbaycanda insanların ömrünün uzunluğu artır, körpə-ana ölümü azalır. Əlbəttə ki, bu istiqamətdə daha da böyük addımlar atılacaq. Amma, prinsipcə, səhiyyə sisteminin maddi bazasının yaradılması prosesi başa çatmaq üzrədir”.
Dünya Səhiyyə Təşkilatının reytinqində Azərbaycan səhiyyəsinin ön sıralarda olması sevindiricidir. Məlumdur ki, son illər tibbi inkişafı istiqamətində müəyyən işlər görülüb, yeni xəstəxanalar istifadəyə verilir, müasir standartlara cavab verən avadanlıqların alınması, peşəkar səhiyyə işçilərinin çalışması ölkə səhiyyəsinin inkişafına səbəb olur.
Dünya Səhiyyə Təşkilatının hesablamalarında Azərbaycan səhiyyəsinin inkişafının yer alması barədə fikir bildirən həkim ekspert Aynurə Həsənova “Bakı-Xəbər”ə açıqlamasında qeyd etdi ki, son zamanlar səhiyyə ilə bağlı mühüm dövlət proqramları həyata keçirilir: “Əhalinin sağlamlığının daha etibarlı şəkildə qorunması, onların yüksək səviyyədə tibbi xidmətlərlə əhatə olunması ilə bağlı görülən işlər davam edir. Tibb müəssisələrinin təmir və bərpası, modern avadanlıqlarla təmin olunması, vətəndaşların pulsuz dərman vasitələri və preparatlarla təchiz olunması, müalicəsi, regionlarda diaqnostika mərkəzlərinin tikilərək istifadəyə verilməsi, uşaqların bütün növ tibbi xidmətlərlə yüksək səviyyədə əhatə olunması səhiyyə sahəsində islahatların ana xəttini təşkil edir. Tibbin inkişafı istiqamətində görülən işlər sayəsində Azərbaycan səhiyyəsi bir çox ölkənin səhiyyəsindən irəlidədir.
Artıq müalicə üçün xarici ölkələrə gedən vətəndaşlarımızın sayı azalır. İnsanlar burada öz həkimlərimizə daha çox etibar edir. Bu kimi amillər Azərbaycan səhiyyəsinin inkişafının xarici ölkə təşkilatlarının tərtib etdiyi reytinq hesabatlarında əks olunur”.
Həmsöhbətimiz onu da vurğuladı ki, Azərbaycan səhiyyəsinin dünya standartları səviyyəsində inkişafının əsas istiqamətlərindən biri tibbi təhsil və kadr islahatıdır. Savadlı və müasir texnologiyalarla işləmək bacarığına yiyələnən gənc həkimlərin hazırlanmasına, onların bilik və peşə qabiliyyətlərinin artırılmasına Səhiyyə Nazirliyi də xüsusi diqqət yetirir: “Hazırlıqlı və peşəkar həkimlər xaricdə təhsil aldıqdan sonra Azərbaycana qayıdıb doğma Vətəndə işləmək istəyirlər. Onların ölkəmizdə çalışmaq istəyi Azərbaycan səhiyyəsinin daha da inkişafına səbəb olur”.
Günel CƏLİLOVA
