Vahid Baxışov: “Hesab edirəm ki, muzey-restoranlar paytaxtımıza gələn turistlərə müsbət təsir göstərməklə yanaşı, həm də onlara tariximizi təlqin edir” “Turistlər ən çox Sovet dövrünü əks etdirən otaqlarla tanış olmaq istəyirlər”
Bu gün insanları müasirliklə maraqlandırmaq çox çətindir, onları ən çox qədim mədəniyyət nümunələri maraqlandırır. İnsanlar dünyanın hansı bucağında yaşamasından asılı olmayaraq, tarixi dəyərlərə, maddi və qeyri-maddi mədəniyyət örnəklərinə tamaşa etməyə xüsusi önəm verirlər.
Öz qədim tarixi ilə dünya turistlərinin diqqətini cəlb edən paytaxtımızda yeni məkanlar yaradılır ki, həmin məkanlarda turistlərin həm istirahət etməsi, həm qidalanması, həm də qədim maddi və qeyri-maddi mədəniyyət nümunələri ilə tanış olması üçün şərait yaradılır. Müasir insanın vaxtı çox azdır və o, zamanını səmərəli keçirmək üçün elə məkanlara üz tutmaq istəyir ki, burada həm qidalansın, həm də mədəni dəyərlərlə, tarixi nümunələrlə tanış olsun. Ümumiyyətlə, bütün dünyada belə bir tendensiya var ki, iri kafelərdə, kinoteatrlarda kitab mağazaları, müxtəlif kiçik muzeylər yaradılır. İnsanlar kafe və resrtoranlarda yeyib-içərkən həm də restoranın içindəki mədəniyyət örnəklərinə tamaşa edirlər.
Bakıda da belə restoranlar qurulmaqdadır, həm İçərişəhərdə, həm də bayır şəhərdə qədim memarlıq abidələrinin içərisində xüsusi muzey-restoranlar fəaliyyət göstərir.
Bakıda fəaliyyət göstərən muzey-restoranlar paytaxtımıza gələn tursitlərə nə kimi müsbət təsir göstərir?
Şəhərimizdə hazırda yerli sakinlərə və xarici turistlərə xidmət göstərən muzey-restoranlardan biri “Şirvanşah”dır ki, bura restoran olsa da, əslində, böyük bir muzeyi xatırladır. Bu muzey-restoranın qeyri-adi cəhətləri çoxdur. Əvvəla burada Azərbaycan tarixinin 2 böyük dövrünü əks etdirən otaqlar var ki, restorana gələn turistlər həmin otaqları böyük maraqla seyr edir, buradakı qeyri-adi mənzərənin şahidi olurlar.
Muzey-restoranda Bakı milyonçularının adına ayrıca otaqlar var. Burada milyonçuların dövründə istifadə edilən məişət əşyaları, geyimlər, onların istifadə etdikləri telefonlar, silahlar diqqəti cəlb etməyə bilmir.
Muzey-restoran əməkdaşları bildirdilər ki, bura əsasən əcnəbi qonaqlar gəlir və burada Azərbaycan tarixinin müxtəlif dönəmləri ilə tanış olurlar. Bu məkanda Azərbaycan tarixi haqqında zəngin məlumatlar verilir. Muzey-restoranda qədim ütü növləri, ilk ixtira olunan fotoaparatlar, dərzi, saatsaz, zərgər otaqları turistlərdə böyük maraq yaradır. Muzey-restoranın əməkdaşlarının qeyd etdiyinə görə, burada Azərbaycanın Sovet dövrünü əks etdirən otaqlar turistlərin daha çox ziyarət etdiyi otaqlardır. Burada Sovet dövrünün restoran, mətbəx mədəniyyəti, eləcə də Sovet tarixinin bütün göstəriciləri incəliklə əks olunub. Lenin, Stalinin, eləcə də digər bolşeviklərin portretlərinin, o dövrə aid əşyaların, dövrü mətbuat örnəklərinin muzey-restoran otaqlarında yer alması turistlər üçün canlı məlumatlardır. Burada ən çox diqqəti cəlb edən otaqlardan biri “Kolxoz sədri” və “Katib” otağıdır ki, burada Sovet dövrü məmurlarının iş həyatı tam olaraq əks olunub. Restoran əməkdaşları bildirdilər ki, turistlər bizim Sovet dövrü tariximizlə daha çox maraqlanırlar. “Muzey-restorana gələnlər yeməkdən əvvəl bütün otaqları gəzirlər. Onlar burada gördükləri qeyri-adi mənzərədən böyük zövq alırlar. Onlar otaqları gəzdikcə bələdçilərimiz onlara tariximizin müxtəlif dövrləri ilə bağlı geniş məlumatlar verirlər. Turistlər ən çox Sovet dövrünü əks etdirən otaqlarla tanış olmaq istəyirlər. Onlar istədikləri otaqda yemək yeyib vaxtlarını səmərəli keçirə bilirlər” - deyə restoran əməkdaşları bildirdilər.
Turzim üzrə mütəxəssis Vahid Baxışov bizimlə söhbətində bildirdi ki, Bakıda analoqu olmayan muzey-restoran paytaxtımıza gələn əcnəbi turistlərin marağına səbəb olur. Onun sözlərinə görə, nəinki Bakıda, hətta bölgələrdə də belə restoran-muzeylər fəaliyyət göstərməlidir ki, yerlərə gələn turistlər həm bizim tariximizlə tanış olsunlar, həm də milli mətbəximizdən dada bilsinlər: “Bütün dünyada insanların müxtəlif vasitələrlə maariflənməsi üçün fərqli işlər görürlər. Bakıda isə tariximizin təbliğatı üçün bu cür unikal muzey-restoranlar yaradılıb. Düzdür, onların hamısının öz fərqliliyi var. Onlardan birində qədim milli geyimlərimiz, atributlarımız, sənətkarlıq nümunələrimiz təqdim edilirsə, başqa birisində mədəni, ictimai, siyasi tariximiz əksini tapır. Hesab edirəm ki, muzey-restoranlar paytaxtımıza gələn turistlərə müsbət təsir göstərməklə yanaşı, həm də onlara tariximizi təlqin edir. Onlar, istər-istəməz, bizim tariximizlə maraqlanırlar. Bu məkanlar yalnız restoran deyil, həmçinin, böyük muzeylərdir ki, burada dulusçuluq, zərgərlik, xalçaçılıq, dəmirçilik, toxuculuq və s. sənət növlərinin nümunələri əks olunur”.
İradə SARIYEVA
