İsmayıl Əhməd: “Dəfnə icazə verilməyən ərazilərdə dəfnlərin həyata keçirilməsi düzgün deyil, kimsə buna qarşı çıxarsa, həmin şəxs qanunvericiliyin tələbinə uyğun olaraq cərimələnəcək”
Azərbaycanda dəfnlə bağlı bir sıra yeni qaydalar təsdiq edilib. Bununla bağlı Milli Məclisin dünən keçirilən iclasında İnzibati Xətalar Məcəlləsinə dəyişikliklər müzakirəyə çıxarılıb. Belə ki, məcəlləyə yeni 516-1 (Qəbiristanlıqların idarə olunması qaydaları haqqında qanunvericiliyin pozulması) maddəsi əlavə olunur.
Maddəyə əsasən, dəfn barədə məlumatın dəfnlərin vahid reyestrində yerləşdirilməməsinə və ya vaxtında yerləşdirilməməsinə görə vəzifəli şəxslər 100 manatdan 300 manatadək məbləğdə cərimə edilirlər.
Qəbir yerlərinin rezervasiyası tələblərinin pozulması, dəfnə icazə verilməyən ərazilərdə dəfnlərin həyata keçirilməsinə görə 500 manatdan 1000 manatadək məbləğdə cərimə tətbiq edilir.
Məcəlləyə əlavə edilən yeni 516-1-ci maddənin 2-ci bəndinə əsasən, qəbiristanlıqların qorunması tələblərinin, habelə dəfnlərin təşkili zamanı sanitariya-gigiyena normalarının pozulmasına görə fiziki şəxslər 20 manatdan 50 manatadək məbləğdə, vəzifəli şəxslər 500 manatdan 1000 manatadək məbləğdə cərimə olunacaqlar.
Dəfnlə bağlı təsdiq olunan yeni qaydalar haqqında fikir bildirən ilahiyyatçı İsmayıl Əhməd “Bakı-Xəbər”ə açıqlamasında qeyd etdi ki, qanunvericiliyə edilən bəzi dəyişikliklər ona maraqlıdır: “Şəxsən mənim özümə vətəndaş olaraq məlum deyil ki, dəfn zamanı sanitariya-gigiyenik qaydaların pozulması nədən ibarətdir? Vəfat edən şəxsin dəfni zamanı gigiyenik qaydalara necə əməl olunduğu sual doğurur.
Qanun təsdiq olunmazdan öncə əhalini bu barədə maarifləndirmək lazımdır. Dəfn zamanı sanitariya qaydalarına necə riayət olunması əhaliyə bildirilməlidir”.
Həmsöhbətimiz onu da əlavə etdi ki, dəfnə icazə verilməyən ərazilərdə dəfnlərin həyata keçirilməsi düzgün deyil. Kimsə buna qarşı çıxarsa, həmin şəxs qanunvericiliyin tələbinə uyğun olaraq cərimələnəcək: “Eyni zamanda, qəbiristanlıqların qorunması məsələsi də qanunvericilikdə əks olunub. Bəllidir ki, qəbiristanlıqlarda mühafizə sistemi yoxdur. Bəzi hallarda qəbiristanlıqlarda qəbir daşları dağıdılır. Bu kimi halların qarşının alınması üçün qəbiristanlıqlara zərər yetirən şəxslərin müəyyən məbləğdə cərimələnməsi düzgün qərardır”.
Günel CƏLİLOVA
