Azər Allahverənov: “… təhlükəsiz şəraitdə mənzil başına çatmasına səbəb olacaq”
Bakıda çəkisi 5 tondan çox olan yük avtomobillərinin gündüz vaxtı hərəkətinə məhdudiyyət qoyulub. Bu barədə Baş Dövlət Yol Polisi İdarəsinin şöbə rəisi, polkovnik-leytenant Rüfət Quliyev məlumat verib. O, açıqlamasında qeyd edib ki, bu, Nazirlər Kabinetinin Yol Hərəkəti Təhlükəsizliyi Komissiyasının Bakıda nəqliyyatın hərəkətinin təkmilləşdirilməsi üzrə 2015-ci il 30 iyun tarixli qərarından sonra edilib.
Qərarda deyilir ki, paytaxtda sıxlığın azaldılması məqsədilə xüsusi təyinatlı, qəza-bərpa, xilasedici və kənd təsərrüfatı məhsullarını daşıyan hər növ nəqliyyat vasitələri istisna olmaqla, icazə verilən maksimum kütləsi 5 tondan artıq olan yük avtomobillərinin gündüz vaxtı Bakıda hərəkəti məhdudlaşdırılıb. Oktyabrın 1-dən mayın 1-dək yük avtomobillərinin sürücüləri səhər saat 7:30-dan axşam saat 20:00-dək Bakıya daxil ola bilməyəcəklər.
Baş Dövlət Yol Polisi İdarəsi idarə, müəssisə və fiziki şəxslərə məxsus, kütləsi 5 tondan artıq olan yük avtomobillərinin sürücülərinə tövsiyə edir ki, yollarda hər hansı problemlə üzləşməmək üçün qeyd olunan vaxt rejiminə əməl etsinlər.
Günorta saatlarında çəkisi 5 tondan artıq olan yük avtomobillərinin paytaxtda hərəkət etməsinin qadağan olunması ekspertlər tərəfindən də müsbət dəyərləndirilir. Onların fikrincə, bu qərar həm tıxacın qarşısını alacaq, həm də yolların tez bir zamanda sıradan çıxmamasına səbəb olacaq.
Nəqliyyat sahəsi üzrə ekspert Azər Allahverənov “Bakı-Xəbər”ə açıqlamasında qeyd etdi ki, ağırtonnajlı yük maşınlarının günorta saatlarında şəhərdə hərəkət etməsi müəyyən gərginliyə səbəb olur: “Bu qərar tıxacın qarşısını almaqla yanaşı, eyni zamanda, minik vasitələrinin təhlükəsiz şəraitdə mənzil başına çatmasına səbəb olacaq. Danılmaz faktdır ki, bəzi yük avtomibilləri tikinti materialları daşıyır. Bu materiallar daşınan zaman ətrafa səpələnir. Hətta bu günlərdə özüm şəxsən müşahidə etdim ki, beton qarışdıran avtomobil yolda hərəkətdə olan zaman çəndən yola beton tökülürdü. Bu kimi hadisələr yollarda qəza hadisələrinin baş verməsinə səbəb olur”.
Həmsöhbətimizin sözlərinə görə, dar küçələrdən istifadə edən yük maşınları müəyyən mübahisələrə səbəb olur. Yol dar olduğu üçün həmin yük avtomobili o ərazini tam olaraq tutur. Belə olan halda, digər avtomobillərin hərəkətinə mane olur: “Hətta qısa müddətdə bir neçə sürücünün iştirakı ilə qalmaqal yaşanır. Darısqal yolu keçəndə yük maşını sürücüsü yanında olmayan başqa bir minik avtomobilini zədələyib keçir. Bu kimi hallar dəfələrlə yaşanır. Bu səbəbdən də hesab edirəm ki, günorta saatlarında tək Bakı şəhərinin mərkəzi yollarında deyil, eyni zamanda, bütün küçə və prospektlərdə iritonnlajlı maşınların hərəkəti yolverilməzdir. Bəzi hallarda çəkisi 5 tondan artıq olan yük avtomobillərinin sürücüləri yüksək sürətlə həmin nəqliyyat vasitəsini idarə edirlər. Ağırtonnlajlı avtomobillərin yüksək sürətlə hərəkət etməsi yolverilməzdir”.
A.Allahverənov hesab edir ki, iri yük avtomobillərinin günorta saatlarında hərəkətinin məhdudlaşdırılması xoşagəlməz hadisələrin qarşısını alacaq.
Günel CƏLİLOVA
