Vaqif Əsədov: “Son illər bu istiqamətdə keçirilən tədbirlər və görüşlər öz müsbət nəticəsini verir”
Respublikamızın ümumtəhsil məktəblərində yeni dərs ilinin başlanması ilə əlaqədar uşaq və yeniyetmələrin iştirakı ilə yol-nəqliyyat hadisələrinin qarşısının alınması və ümumtəhsil məktəblərində şagirdlərə təhlükəsiz davranış vərdişlərinin aşılanması məqsədilə Daxili İşlər Nazirliyinin müvafiq göstərişinə əsasən, 2018-ci ilin sentyabr ayının 15-dən oktyabrın 15-dək respublika ərazisində “Diqqət, uşaqlar!” adı altında hərəkətin təhlükəsizliyi aylığı keçirilir.
Tədbirin keçirilməsində əsas məqsəd piyadaların iştirakı ilə yol-nəqliyyat hadisələrinin qarşısının alınması və ümumtəhsil məktəblərində şagirdlərə təhlükəsiz davranış qaydalarının aşılanmasıdır. Aylıq dövründə uşaq və yeniyetmələrin iştirakı ilə baş vermiş yol-nəqliyyat hadisələrinin təhlili aparılaraq, onların başvermə səbəblərinin aradan qaldırılması üzrə konkret profilaktiki tədbirlərin görülməsi nəzərdə tutulub. Təhsil müəssisələrinin yerləşdiyi ərazilərdə, uşaq və yeniyetmələrin toplaşdığı yerlərdə yol nişanlarının qoyulması və digər zəruri tədbirlər həyata keçiriləcək.
“Diqqət, uşaqlar!” adı altında hərəkətin təhlükəsizliyi aylığının gedişini öyrənmək məqsədilə Bakı Şəhər Baş Polis İdarəsi Dövlət Yol Polisi İdarəsinin Yol hərəkəti təhlükəsizliyinin təbliği və ictimai qurumlarla əlaqə bölməsinin rəisi, polis polkovniki Vaqif Əsədova müraciət etdik. O, “Bakı-Xəbər”ə açıqlamasında qeyd etdi ki, “Diqqət, uşaqlar!” adı altında hərəkətin təhlükəsizliyi aylığı 15 oktyabradək davam edəcək: “Təhlükəsizlik ayı ilə bağlı olaraq Bakı Şəhər Dövlət Yol Polisi İdarəsi və 1 saylı Uşaq Gənclər İnkişaf Mərkəzi fəaliyyət proqramı tərtib edib. Həmin proqrama əsasən, gündəlik tədbirlər keçirilir. Məsələn, mütəmadi olaraq məktəblərdə məlum mövzu ilə bağlı maarifləndirici xarakterli tədbirlər həyata keçirilir. Növbəti tədbir Nizami rayonunda olan 10 saylı orta məktəbdə keçiriləcək. Bu ay çərçivəsində çalışırıq ki, azyaşlı uşaqlar yol hərəkəti haqqında mükəmməl bilik əldə etsinlər. Sonda da uşaqlar öyrəndiklərini bizə göstərirlər. KİV vasitəsilə məktəblilər yol hərəkətinə riayət olunması ilə bağlı müraciət yayırlar. Həmin müraciətdə yol-nəqliyyat hadisələrinin azalmasının vacibliyi qeyd olunur. Uşaqlar böyüklərə yol hərəkəti qaydalarına riayət etməyə çağırış edirlər”.
V.Əsədov onu da vurğuladı ki, rəhbərliyin göstərişi ilə orta məktəblərdə bu cür maarifləndirmə tədbirləri mütəmadi olaraq keçirilir. Görüşlərdə iştirak edən şagirdlərin yol hərəkəti qaydaları üzrə bilik və bacarıqları artırılır: “Son illər bu istiqamətdə keçirilən tədbirlər və görüşlər öz müsbət nəticəsini verir. Hazırlıqlı uşaqların sayı artır və bu da polis əməkdaşlarını ürəkdən sevindirir”.
Günel CƏLİLOVA
