İlqar Hüseynli: “Bakının kanalizasiya sistemi tamamilə yenilənməlidir”
Son 120 ilin statistik göstəricilərinə əsasən, Bakı əhalisinin sayı bu ilin əvvəlində ən yüksək həddə çatıb. Belə ki, 2018-ci ilin əvvəlində Bakının 2 milyon 262 min 600 nəfər əhalisi olub ki, bu da paytaxt üçün son 120 ilin ən yüksək göstəricisi sayılır.
Yalnız 1990-91-ci illər istisna olmaqla, demək olar ki, paytaxt əhalisinin sayında hər il artım müşahidə edilib. Son dövrlərdə il ərzindəki artım göstəricisinin əvvəlki dövrlərlə müqayisədə bir qədər azalmasına baxmayaraq, əhalinin ümumi sayında yenə də hissediləcək artım var.
1999-cu ildən sonra Bakıda əhalinin il ərzindəki artımı 1-2 faiz civarında olsa da, 2016-cı ildə bu göstərici 0,9 faiz (20 000 nəfər), 2017-ci ildə isə 0,7 faiz (16 800 nəfər) olub.
Ümumilikdə götürdükdə son illər ərzində paytaxtda əhalinin sayı il ərzində 20-30 min nəfər artır. Son 17 ildə Bakıda əhalinin sayında ən yüksək illik artım 2008-ci ildə müşahidə edilib. Həmin il paytaxt əhalisinin sayı 2 faiz, başqa sözlə, 40 min 200 nəfər artıb.
Paytaxt Bakıda son zamanlar daha çox sıxlıq müşahidə olunmasının bir sıra səbəbləri var. Məsələ ondadır ki, 90-cı illərdə Ermənistanın Azərbaycan ərazilərini işğal etməsi, yerlərdə kəskin iqtisadi və sosial tənəzzülün başlaması, işsizliyin kəskin artması əhalinin mərkəzə axın etməsinə səbəb olub. Bölgələrdən paytaxta xeyli sayda vətəndaş köçüb. Digər tərəfdən, ölkənin maliyyə, administrativ qurumlarının, əyləncə mərkəzlərinin, ali təhsil ocaqlarının, hökumət və parlamentin burada yerləşməsi sıxlığın artmasında müəyyən rol oynayır. Məlumdur ki, əksər universitet və kolleclər paytaxtda yerləşir.
Bütün bunların fonunda, hər il paytaxt əhalisinin 20-30 min nəfər artdığını nəzərə alsaq, Bakının sosial infrastrukturu ilə bağlı vacib hansı işlər görülməlidir?
Məsələyə münasibət bildirən ekspert İlqar Hüseynlinin sözlərinə görə, bununla bağlı bir sıra kompleks işlərin görülməsinə ehtiyac var: “Bura sosial infrastrukturun artımından və yeni iş yerlərinin açılmasından tutmuş, bir sıra məsələlər daxildir. Ona görə də bununla bağlı bir sıra işlər görülməlidir. Nəzərə almaq lazımdır ki, paytaxt Bakıya böyük axın var. İnsanların bir çoxu maddi təminatını qurmaqdan ötrü Bakı şəhərinə gəlməkdə maraqlıdırlar. Bu mənada hesab edirəm ki, yeni infrastrukturların qurulmasına xüsusi önəm verilməlidir. Yeni-yeni orta məktəblər, xəstəxanalar və digər sosial obyektlər tikilməlidir. Bakının kanalizasiya sistemi tamamilə yenilənməlidir. Çünki şəhər ilbəil yükləndiyi üçün, bu bir sıra problemlərə gətirib çıxarır. Bu günlərdə yağan intensiv yağışlar nəticəsində bunu bir daha gördük. O cümlədən, yeni iş yerlərinin açılması məsələsi öz həllini tapmalıdır. Ancaq bütün bunlar elə bir formada həyata keçirilməlidir ki, yalnız paytaxtda deyil, regionlarda da bu işlər görülsün. Bu minvalla əhalinin bölgələrdən paytaxta axınının intensivliyi azalsın. Bakının mərkəzində infrastruktur imkanlarının artırılması üçün yetərli təminat yoxdur. Ona görə də bununla bağlı paytaxtın ətrafında işlər görülməlidir. Eyni zamanda, sosial xidmətlərin yerinə yetirilməsi istiqamətində fəaliyyətlər intensivləşdirilməlidir. Məsələn, “ASAN xidmət”lərin sayı daha da artırılmalıdır. Bunların sayəsində xeyli sayda gənc işlə təmin olunur. Hesab edirəm ki, bu tip layihələrin həyata keçirilməsində dövlət maraqlı olmalıdır. Bir sözlə, infrastrukturun həm Bakıda, həm də regionlarda inkişaf etdirilməsinə xüsusi önəm verilməlidir”.
Vidadi ORDAHALLI
