Azər Allahverənov: “Təəssüflər olsun ki, bu kimi məsələlər bəzi sərnişindaşıma ilə məşğul olan şirkət rəhbərləri tərəfindən nəzarətdə saxlanılmır”
Məlum olduğu kimi, Xəzər rayonunun Binə qəsəbəsində 160 saylı marşrutla hərəkət edən 10 TG 106 dövlət nömrə nişanlı sərnişin avtobusu ilə qatar toqquşub. Nəticədə 34 nəfər xəsarət alıb, iki nəfər ölüb. Qəzaya uğrayan yük qatarı Dübəndiyə gedirmiş, onun qoşqusunda 12 boş çən olub.
Bu arada o da məlum olub ki, sözügedən qəza zamanı sürücü də xəsarət alıb. Müayinə zamanı onun narkotik istifadəçisi olduğu müəyyən edilib. Bakı şəhər DYP-nin sözçüsü, polkovnik Vaqif Əsədov mətbuata açıqlamasında bildirib ki, avtobusun sürücüsü, 1986-cı il təvəllüdlü Şıxəliyev Əlixan Əlibaba oğlu bu hadisədən öncə də ölümlə nəticələnən yol qəzası törətdiyinə görə həbs edilib. May ayında azadlığa çıxdıqdan sonra yenidən sürücü kimi fəaliyyətə başlayıb: "Hadisədən sonra o yoxlanılıb və müəyyən edilib ki, həmin şəxs narkotik istifadəçisidir. Yəni qanında narkotik vasitə aşkar edilib".
V.Əsədovun sözlərinə görə, cinayət işi Dəmiryolunda Baş Polis İdarəsində açılıb: "Hadisə zamanı sərnişinlər müxtəlif xəsarət alıblar. Bir neçə il əvvəl Lökbatan ərazisində də belə bir hadisə baş vermişdi. “Yol hərəkəti haqqında” Qanunun tələblərinə görə, dəmir yolu ilə avtomobil yolunun kəsişməsində konkret tələblər var. Onları mütləq şəkildə yerinə yetirmək lazımdır. Əgər orada şlaqbaum olubsa, yol bağlı olubsa, sürücü dayanmalı idi. Şlaqbaum yox idisə, sürücü sayrışan işıqları nəzərə almalı idi. Hər bir halda, avtobus sürücüsü diqqətli olmalı idi. Belə hesab edirəm ki, istintaq zamanı bütün detallar nəzərə alınacaq və tezliklə hadisəyə hüquqi qiymət veriləcək”.
O da bir faktdır ki, bəzən sürücülük vəsiqəsi olmayanlar qanunsuz olaraq ictimai nəqliyyatı idarə edirlər. Təəssüf doğuran məqam həm də odur ki, həmin sürücü məlum hadisədən əvvəl də ölümlə nəticələnən yol qəzası törədib. Buna görə o cəzalandırılıb. Belə olan halda, o cür sürücüyə yenidən ictimai nəqliyyatdan istifadə etmək icazəsi verilməməli idi. Ümumiyyətlə, belə nöqsana yol verən sürücüyə məhz ictimai nəqliyyatdan istifadə hüququnun verilməsi nə dərəcədə doğrudur? Sözügedən məsələ ilə bağlı fikirlərini “Bakı-Xəbər”lə bölüşən nəqliyyat sahəsi üzrə ekspert Azər Allahverənovun sözlərinə görə, o cür nöqsanlara yol verən sürücüyə ictimai nəqliyyatı etibar etmək olmaz: “Onu işə götürən aidiyyəti qurumlar bu məsələyə xüsusi nəzarət etməli idilər. Necə deyərlər, buna həssaslıqla yanaşmalı idilər. Elə nöqsanlara yol verən sürücünün təcrübəsi olsa belə, onu ictimai nəqliyyatın idarə edilməsinə buraxmaq olmaz. Ancaq onun təcrübəsindən nəqliyyat sektorunda başqa formada yararlanmaq olar. Məsələn, o cür sürücülər qarajda usta kimi işləyə bilərlər. Hansısa bir formada avtomexanik fəaliyyəti ilə məşğul ola bilərlər. Bunun nəticəsində həmin sürücünün təcrübəsindən istifadə olunar, amma ona nisbətən daha təhlükəli fəaliyyət növləri həvalə olunmaz. Faktiki olaraq ictimai nəqliyyat kifayət qədər həssas bir sahədir və burada çalışan insanların hazırlığı, peşəkarlığı yüksək səviyyədə olmalıdır. Ona görə ki, onlar bu minvalla, təhlükəsiz şəkildə ictimai nəqliyyatı idarə etsinlər. Gün ərzində yüzlərlə insanın daşınmasını daha təhlükəsiz şəraitdə həyata keçirsinlər. Təəssüflər olsun ki, bu kimi məsələlər bəzi sərnişindaşıma ilə məşğul olan şirkət rəhbərləri tərəfindən nəzarətdə saxlanılmır. Bilərəkdən və yaxud da bilməyərəkdən gözdən qaçırılır. Nəticədə bu cür faciəli hadisələr yaşanır. Ümid edək ki, bundan sonra sərnişindaşıma ilə məşğul olan şirkətlər işə götürdükləri sürücülərin keçmiş təcrübəsini nəzərdən keçirərkən, məhz bu kimi məqamlara daha həssas və məsuliyyətli yanaşacaqlar”.
Vidadi ORDAHALLI
