Eyyub Hüseynov: “Əhali bu cür təxribatçılara deyil, Qida Təhlükəsizliyi Agentliyinin məlumatlarına inanmalıdır”
Bu gün dünya insanını ən çox narahat edən məsələlərdən biri də qida təhlükəsizliyi ilə bağlıdır. Elə dövlətlərin özləri də bu sahədə ciddi narahatlıq keçirirlər və vətəndaşlarını daha keyfiyyətli qidalarla təmin etməyə çalışırlar.
Qida təhlükəsizliyi problemi dünyada aktuallaşdıqca, insanların əndişəsi də artır. İnsanların narahatlığını hiss edən bəzi neqativ qüvvələr hərəkətə keçir və müxtəlif şirkətlərin istehsal etdiyi və insanların gündəlik qida rasionuna daxil olan məhsullarla bağlı qorxulu, həyəcanlı ismarıclar, mesajlar ötürürlər, anonim adlar altında təbliğat aparırlar. Cəmiyyətdə böyük ajiotaj yaradan bu hadisə insanlara qida təhlükəsizliyi ilə bağlı böyük həyəcan, əndişə yaşatmaqdadır. Məlum olduğu kimi, vətəndaşlara sosial şəbəkələr vasitəsilə müxtəlif anonim mesajlar göndərilir və onlara bir sıra məhsullardan imtina etmək təlqin edilir. Bu mesajların kimlər tərəfindən təşkil edildiyini, dəqiqliyini öyrənməkdə imkansız olan vətəndaşlar naçar vəziyyətə düşürlər.
Sosial şəbəkələr vasitəsilə yayılan təxribat dolu mesajlarla bağlı artıq rəsmi münasibət bildirilib. Azərbaycan Respublikasının Qida Təhlükəsizliyi Agentliyi “WhatsApp” vasitəsilə yayılan səs yazısını təxribat adlandırıb. Agentlik “WhatsApp” mobil əlavəsində bir sıra qida məhsullarının keyfiyyətsiz və insan sağlamlığı üçün təhlükəli olması barədə yayılan məlumatların həqiqətə uyğun olmadığını bildirib: “Faktlara əsaslanmayan bu tip məsuliyyətsiz məlumatlar insanlar arasında təşviş və çaşqınlığa səbəb olur. QTA bildirir ki, hazırda idxal olunan və ölkədə istehsal edilən qida məhsullarına qurum tərəfindən nəzarət həyata keçirilir və aparılan nəzarət tədbirləri çərçivəsində hər hansı nöqsan aşkar olunarsa, bununla bağlı dərhal müvafiq tədbirlər görülür.
Agentlikdən onu da deyiblər ki, insanlar arasında çaşqınlıq və təşviş yaradan bu tip əsassız məlumatları yayan şəxslər barəsində qanunda nəzərdə tutulmuş qaydada ciddi tədbirlər həyata keçiriləcək.
Qeyd edək ki, mütəxəssislərin bildirdiyinə görə, o qidalar zərərli və insan orqanizmi üçün təhlükəli olsaydı, bu barardə əlaqədar qurumlar özləri əhaliyə rəsmi xəbərdarlıqlar edərdilər. Ekspertlərin dediyinə görə, aidiyyəti dövlət qurumları mütəmadi olaraq qida istehsalı ilə məşğul olan şirkətlərdə araşdırmalar aparır, onların istehsal etdikləri məhsulların laborator müayinəsini keçirirlər.
Azad İstehlakçılar Birliyinin rəhbəri Eyyub Hüseynov “Bakı-Xəbər”ə açıqlamasında əhalini bu cür təxribatlara uymamağa çağırdı. E.Hüseynov bildirdi ki, sözügedən məhsulların keyfiyyətsiz və zərərli olması haqqında göndərilən səs yazısı ölkəmizin qida təhlükəsizliyinə qarşı təxribatdan başqa bir şey deyil: “Bu mesajların göndərilməsi anormal haldır və Azad İshtehlakçılar Birliyi də bundan çox ciddi narahatlıq keçirir. Bu mesajla, səs yazısı ilə bağlı vətəndaşlar tərəfindən mənə saysız müraciət edilib. Onlar bu səs yazısının nə dərəcədə həqiqətəuyğun olması ilə maraqlanırlar. Deyim ki, naməlum şəxsin yaydığı səs yazısı insanları əməlli-başlı əndişələndirib. Mən müraciət edənlərə bildirdim ki, narahat olmasınlar. Məncə, yayılan səs yazısının kimə(lərə) məxsus olması ilə bağlı hüquq-mühafizə orqanları araşdırmaya başlayıb. Bu səs yazısı anormal vəziyyət yaradır. Bu səs yazısı haradan qaynaqlanır? Bu səs yazısının meydana çıxması, ola bilsin, bu gün bazarda bir-birilə rəqabət aparan qüvvələrin işidir. Bəzən də işlədiyi şirkət tərəfindən işdən çıxarılan adamlar olur ki, vaxtilə çalışdığı şirkətdən heyif çıxmaq üçün bu cür neqativ işlərə əl atırlar. Bütün hallarda, bir sıra qidaların təhlükəli olması ilə bağlı yayılan səs yazısındakı fikirlər dezinformasiyadır və bunun qarşısı aidiyyəti qurumlar tərəfindən alınmalıdır. Eyni zamanda da Qida Təhlükəsizliyi Agentliyi bu işlə ciddi məşğul olmalıdır. Əhali bu cür təxribatçılara deyil, Qida Təhlükəsizliyi Agentliyinin məlumatlarına inanmalıdır”.
İradə SARIYEVA
