Bahadur Bilalov: “Turizmin inkişafı ilə bağlı görülən və görüləcək işlər sayəsində Azərbaycan turistlərin səyahət etmək istədiyi ilk beş ölkə arasında olacaq”
Turizm dünya iqtisadiyyatında ən gəlirli sahələrdən biri hesab edilir. Neft, tibb, maşınqayırma sahəsindən sonra dördüncü ən gəlirli sahələrdən biridir. Buna görə də Azərbaycan Respublikası müstəqilliyini əldə etdikdən sonra bu sahəni inkişaf etdirməyi qarşına məqsəd qoydu.
Azərbaycanda bu sahənin inkişafına ciddi diqqət göstərilməkdədir. Ölkə başçısı İlham Əliyev bu sahəyə xüsusi qayğı ilə yanaşır.
Məlumdur ki, Azərbaycanın turizm sahəsi böyük perspektivlərə malikdir. Ölkəmizdə turizmin əksər növlərinin (kənd, müalicə-sağlamlıq, ekoloji, mədəni, sosial, kommersiya, idman, dini və s.) inkişafı üçün geniş imkanlar mövcuddur. Turizmin müxtəlif sahələrinin inkişafı üçün lazımi şərait yaradılıb. Görülən işlər artıq müsbət nəticəsini büruzə verir. Son illər ölkəmizə müxtəlif ölkələrdən turistlər gəlir. Ölkəmiz turistlərin səfər etdiyi ölkələr arasında ən arzuolunandır. Bu, beynəlxalq təşkilatların tərtib etdiyi reytinq sorğularında da əks olunur.
Məlumat üçün bildirək ki, Azərbaycan sürətlə populyarlaşan turizm istiqamətləri siyahısında yeddinci yerdə qərarlaşıb. “Bloomberg” Top-10 istiqamətləri reytinqini BMT Ümumdünya Turizm Təşkilatının məlumatlarına əsasən tərtib edib. Qeyd olunur ki, Azərbaycanda dünyanın ən iri turizm şirkətlərindən biri - "Intrepid Travel" xətti ilə otel bronlama 322 faiz artıb.
Sürətlə inkişaf edən turizm istiqamətlərinə Türkiyə, Gürcüstan. Makedoniya, İslandiya və digər ölkələr də daxil olub.
Qeyd edək ki, 2018-ci ilin yanvar-iyun aylarında Azərbaycana 189 ölkədən 1,325 milyon nəfər səfər edib. Bu, 2017-ci ilin eyni dövrü ilə müqayisədə 10,2 faiz çoxdur.
Azərbaycanın sürətlə populyarlaşan turizm istiqamətləri arasında olduğunu ekspertlər də təsdiqləyirlər.
Turizm sahəsi üzrə ekspert Bahadur Bilalov “Bakı-Xəbər”ə açıqlamasında qeyd etdi ki, son zamanlar ölkədə aparılan məqsədyönlü turizm siyasətinin nəticəsi artıq özünü göstərir: “Uzun illərdir Azərbaycan müxtəlif ölkələrdə keçirilən beynəlxalq sərgilərdə iştirak edir. Həmçinin, dünyanın aparıcı telekanallarında Azərbaycanın turizm imkanları geniş şəkildə reklam olunur. Turizm təbliği ilə məşğul olan ixtisaslaşmış qurum yaradılıb. Əksər xarici ölkələrdə Azərbaycanın turizm nümayəndəliyi yaradılıb. Bu ilin əvvəlində turizmin daha da sürətlə idarə olunmasını həyata keçirmək üçün Dövlət Turizm Agentliyi yaradılıb. Bütün görülən işlər artıq öz bəhrəsini verməyə başlayıb. Ölkə Prezidentinin bu sahəyə xüsusi qayğısı xüsusi olaraq vurğulanmalıdır. Çünki son illər Prezident turizmin inkişafına yönələn saysız-hesabsız sənədə imza atıb. Keçirilən əksər müşavirə və toplantılarda turizmin inkişafı məsələsi müzakirə olunur”.
Həmsöhbətimizin sözlərinə görə, beynəlxalq reytinq sorğularında Azərbaycanın ön sıralarda olması gözlənilən idi. Turizmin inkişafı ilə bağlı görülən və görüləcək işlər sayəsində Azərbaycan turistlərin səyahət etmək istədiyi ilk beş ölkə arasında olacaq.
Günel CƏLİLOVA
