Azərbaycanda məhərrəmlik, Aşura mərasimləri tarixən qeyd olunub, bu gün də keçirilir. Hətta Sovet hakimiyyəti illərində də bunun keçirilməsini tam əngəlləmək mümkün olmayıb.
Azərbaycan nadir ölkələrdəndir ki, burada unikal dövlət-din münasibətləri modeli var və o, daim müsbət məcrada inkişaf edir. Ölkəmizdə dövlətin dinə diqqət və qayğısı var, burada dini tolerantlıq, vicdan azadlığı təmin olunur, məscidlərin, məbədlərin dövlət tərəfindən bərpa və təmir edilməsi həyata keçirilir. Aşura mərasimlərini də dini qurumlar dövlət qurumları ilə birgə əməkdaşlıq şəklində həyata keçirirlər. Bunlar nümunəvi tədbirlərdir.
Qeyd edək ki, bu il ilk dəfə olaraq Aşura münasibətilə Təzə Pir məscidində keçirilən qanvermə aksiyasında Azərbaycanda fəaliyyət göstərən başqa dini konfessiyaların nümayəndələri də iştirak edib. Qafqaz Müsəlmanları İdarəsinin sədri Şeyxülislam Allahşükür Paşazadə media nümayəndələrinə açıqlamasında qeyd edib ki, artıq ənənə halını alan qanvermə aksiyasının keçirilməsi simvolik anlam daşıyır: “Azərbaycanda Aşura mərasimlərinin keçirilməsi üçün hər bir şərait yaradılıb. Bütün tədbirlər Qafqaz Müsəlmanları İdarəsinin qəbul etdiyi fətvaya uyğun keçirilməlidir. Aşura günü qanvermə aksiyalarının keçirilməsi artıq islam dünyasında nümunə kimi qəbul edilir. Dini konfessiya rəhbərlərinin aksiyada iştirakı Azərbaycan cəmiyyətində birliyin və müxtəlif dinlərə göstərilən münasibətin nümayişidir”.
Sentybarın 20-də keçirilən Aşura mərasimində müsəlmanlarla yanaşı digər dini konfessiya rəhbərlərinin də qanvermə aksiyasında iştirakının əhəmiyyəti barədə danışan ilahiyyatçı Seyid Camal Əzimbəyli “Bakı-Xəbər”ə açıqlamasında qeyd etdi ki, Aşura günü Azərbaycanda çox yüksək səviyyədə qeyd olundu: “İstər yerli dini nümayəndələr, istərsə də qeyri-ənənəci dini nümayəndələr Aşura mərasimində iştirak etdilər. Dini Qurumlarla İş üzrə Dövlət Komitəsi, Qafqaz Müsəlmanları İdarəsi və hüquq-mühafizə orqanlarının birgə səyi nəticəsində mərasim sivil qaydada yekunlaşdı. Hər hansı bir xoşagəlməz hal qeydə alınmadı”.
S.C.Əzimbəylinin sözlərinə görə, Aşura mərasimi zamanı keçirilən qanvermə aksiyasında qeyri-islam konfessiya rəhbərlərinin iştirak etməsi Azərbaycanda tolerantlığın, birlik və bərabərliyin nümayiş olunduğunu bütün dünyaya göstərdi: “Qanvermə aksiyasında digər dinlərdən olan şəxslərin iştirak etməsi Azərbaycanın tolerant ölkə olduğunu əyani olaraq dünyaya nümayiş etdirdi. Bu, Azərbaycanın uğurudur.
Məlumat üçün bildirim ki, Aşura mərasimi zamanı ölkəmizdə yaşayan Rusiya vətəndaşı ehsan süfrəsi açdı. Və məni ailəmlə birlikdə həmin ehsan süfrəsinə dəvət etdi. Artıq bu onu göstərir ki, ölkəmizdə yaşayan digər dinlərin nümayəndələri İslam dininə hörmətlə yanaşır”.
Cəmilə QARAYEVA
