İsmayıl Əhməd: “Məhərrəmlik ayında bədənindən qan çıxarmaq istəyənlər QMİ-nin hər il təşəbbüs göstərdiyi kampaniyaya qoşula bilərlər”
Sentyabrın 20-si Hicri-Qəməri təqvimi ilə Məhərrəm ayının 10-cu günü – Aşura qeyd olunub. 1370 il öncə Məhərrəm ayının 10-cu günündə Məhəmməd Peyğəmbərin (s) nəvəsi, İmam Əlinin (ə) oğlu İmam Hüseyn (ə) İraqın Kərbəla çölündə 71 tərəfdarı ilə birlikdə şəhid olub, Yezid ibn Müaviyyənin 30 minlik ordusu tərəfindən qətlə yetirilib.
Dünyanın bir çox müsəlman ölkələrində o gün İmam Hüseyn və onun tərəfdarları yad edilir. Dünya müsəlmanları o vaxtdan Məhərrəm ayını matəm ayı kimi qeyd edirlər.
Qafqaz Müsəlmanları İdarəsinin və Səhiyyə Nazirliyinin təşəbüssü ilə ənənəvi qanvermə aksiyası keçirilib. Bu il qanvermə aksiyası ölkənin bir sıra məscidlərində həyata keçirilib. Bu il keçirilən qanvermə aksiyasında 5089 nəfər iştirak edib.
Aşura günü qana ehtiyacı olan xəstələrə yardım məqsədilə könüllü qanvermə aksiyasında minlərlə insan iştirak edib. Məlumat üçün bildirək ki, könüllü olaraq qan verən şəxslərdən 1435 litr qan tədarük olunub. Qeyd edək ki, ötən illərlə müqayisədə Aşura günü qan verənlərin sayı artıb.
İlahiyyatçı İsmayıl Əhməd bizimlə söhbətində bildirdi ki, Aşura günündə bədəndən qan çıxarmaq əvəzinə, ehtiyacı olan xəstələr üçün qan yardımı etmək özünə əzab verməkdən dəfələrlə savab işdir: "Yaxşı olar ki, sağlamlığı imkan verən bütün müsəlmanlar bu günlərdə qanvermə aksiyalarında iştirak etsinlər.
Biz bu ayda Kərbəla şəhidləri ilə yanaşı, öz şəhidlərimizi də yad etməli, Azərbaycanın ərazi bütövlüyü və müstəqilliyi uğrundan canlarından keçmiş insanları da unutmamalı, gənclərimizi vətənpərvər ruhda tərbiyə etməliyik".
Həmsöhbətimizin sözlərinə görə, Aşura günündə qan verənlərin sayının artması sevindiricidir: “Bu ayda bədənindən qan çıxarmaq istəyənlər QMİ-nin hər il təşəbbüs göstərdiyi kampaniyaya qoşula bilərlər. Bədəndən, başdan qan çıxarmaq istəyənlər öz qanını sivil şəkildə ehtiyacı olan insanlara verə bilərlər. İmam Hüseynin haqq mübarizəsində müxtəlif irqlərin, millətlərin nümayəndələri də olub. Bu onu göstərir ki, bu mübarizə ümumbəşəri mübarizədir. QMİ-nin keçirdiyi bu aksiya, göstərdiyi bu təşəbbüs bütün möminlərə, dindarlara aiddir. Bir insana qan vermək ona həyat vermək deməkdir. İstərdim ki, QMİ-nin təşəbbüs göstərdiyi bu kampaniyaya bütün qan vermək istəyən insanlar, kollektivlər qoşulsun. Bu çox mütərəqqi və savab bir addım olar.
Ümumiyyətlə, Aşurada baş yarmaq, sinə döymək, qan çıxarmaq, uşaqların başını yarmaq kimi şəriətə zidd əməllər göstərilmir, təbliğ olunmur. Dinimiz belə şeyləri qadağan edir. Xüsusən Quran ayəsində haram aylarda özünə zülm etmək, müharibə etmək qadağandır. Haram ayların içində Məhərrəm də var. Məhərrəm ayında günahlardan çəkinmək, savab işlər görmək, insanlara yaxşılıq etmək, oruc tutmaq və s. işlər görmək daha məqsədəuyğundur”.
Günel CƏLİLOVA
