Azər Allahverənov: “Bu, regionların inkişafına müsbət təsir göstərəcək”
“Ölkəmizdə yol tikintisi geniş vüsət alıb. Bu il Dövlət İnvestisiya Proqramında ən azı 600 kəndin yolunun əsaslı təmir olunması nəzərdə tutulub. O cümlədən magistral yolların salınması, onların ən yüksək standartlara çatdırılması prosesi də gedir”. Bu sözləri Prezident İlham Əliyev Biləsuvara səfəri çərçivəsində rayon ictimaiyyətinin nümayəndələri ilə görüşdə deyib.
Dövlət başçısı qeyd edib ki, ölkə əhəmiyyətli Bakı-Astara yolunun açılışı oldu: “Bu, çox gözəl yoldur. Deyə bilərəm ki, dünyanın ən yüksək standartlarına cavab verir, çox rahat, təhlükəsiz bir yoldur. Onu da qeyd etməliyəm ki, bu yol Bakıdan Astaraya olan məsafəni 40 kilometr qısaldır, çünki yolun məcrası dəyişib. Beləliklə, vətəndaşlar daha rahat gedib-gələ biləcəklər”.
Ümumilikdə reallıq ondan ibarətdir ki, Azərbaycanda dövlət büdcəsi hesabına ən müasir yol infrastrukturu qurulur, bununla bağlı irimiqyaslı layihələr icra olunur. İndi istər paytaxt Bakıda, istərsə də bölgələrdə uzanan müasir yollar ümumilikdə ölkə əhalisinin təhlükəsizliyini və rahatlığını təmin etməklə yanaşı, regionların sosial-iqtisadi inkişafına da müsbət təsir göstərir. Prezidentin sərəncam və göstərişlərinə əsasən, ölkənin hər yerində, eləcə də regionlarda kənd və qəsəbələri birləşdirən yolların, həmçinin, yaşayış məntəqələrinin daxili yollarının təmirinə və yenidən qurulmasına ayrılan diqqətin nəticəsidir ki, avtomobil yol şəbəkəsi genişlənir, infrastruktur təzələnir və müasirləşir. Bu baxımdan ən azı 600 kəndin yolunun əsaslı təmir olunmasının nəzərdə tutulmasını ekspertlər necə şərh edirlər?
Məsələyə münasibət bildirən nəqliyyat sahəsi üzrə ekspert Azər Allahverənovun sözlərinə görə, çoxsaylı kənd yollarının təmir edilməsinin nəzərdə tutulması müsbət haldır: “Ümumilikdə yeni yolların salınması, köhnə yolların təmir edilməsi daim hökumətin diqqət mərkəzindədir. Nəticə etibarilə hər il bu və ya digər sahələrə, o cümlədən yol infrastrukturunun qurulmasına büdcədən vəsait ayrılır. Əlbəttə ki, vacib olan məsələlərdən biri də kənd yollarının yenilənməsidir. Çünki bu sahədə bir sıra böyük layihələr həyata keçirilsə də, görüləsi işlər çoxdur. Sevindirici haldır ki, kənd yollarının əsaslı təmirinə ilbəil diqqət artır. Bu, regionların inkişafına müsbət təsir göstərəcək. Yol infrastrukturuna yatırılan vəsaitin təyinatı və bundan irəli gələn indikatorları biz əyani olaraq gördük. Nəzərə almaq lazımdır ki, nüfuzlu beynəlxalq təşkilatlar bu və ya digər müstəvidə zaman-zaman hesabatlar hazırlayırlar. Sözügedən hesabatlarda hətta yolların keyfiyyəti ilə bağlı məqamlar öz əksini tapır. Görünən odur ki, sözügedən hesabatlarda Azərbaycan MDB məkanında ən yaxşı yolları olan ölkələr siyahısındadır. Avropa ölkələri arasında da çox yaxşı yerdə qərarlaşıb. Yükdaşıma ilə bağlı hesabatlarda da Azərbaycan yaxşı mövqedədir. Azərbaycan inkişaf templəri yüksək olan dövlətlər sırasında yer alıb. Bütün bunlar bir daha onu göstərir ki, dövlətin yol infrastrukturuna yatırdığı sərmayələr öz müsbət effektini verir. Yaxşı yol infrastrukturunun olması ölkə iqtisadiyyatının inkişafından irəli gəlir. Bu sahəyə yatırılan sərmayələr güclü iqtisadiyyatın qurulması ilə yanaşı, həm də ölkənin siyasi nüfuzunu artırır. Biz də bütün bunların şahidiyik”.
Vidadi ORDAHALLI
