Kamran Əsədov: “… müəllimlərin işə qəbul prosesində məktəblərin də iştirak etməsi nəzərdə tutulur”
Xəbər verildiyi kimi, Milli Məclisin Elm və təhsil komitəsi bu il “Orta ümumtəhsil məktəbləri haqqında” qanun layihəsi hazırlayacaq. Bu barədə Milli Məclisin Elm və təhsil komitəsinin sədri, Azərbaycan Milli Elmlər Akademiyasının vitse-prezidenti İsa Həbibbəyli bir müddət öncə mediaya açıqlamasında məlumat verib.
O bildirib ki, Elm və təhsil komitəsi artıq "Peşə təhsili haqqında" qanun layihəsi üzərində işi tam başa çatdırıb: "Bu layihə bir neçə dəfə beynəlxalq ekspertlərin iştirakı ilə də müzakirə edilərək təkmilləşdirilib. Layihə artıq MM-in plenar iclasına tövsiyə edilib. "Peşə təhsili haqqında" qanun layihəsi deputatların müzakirəsinə veriləcək. “Ümumi təhsil haqqında” yeni qanun layihəsi oktyabr ayının ikinci yarısından sonra Milli Məclisin iclasında müzakirəyə təqdim olunacaq.
Yeni qanun layihəsində orta ümumtəhsil məktəblərinin statusu müəyyənləşəcək. Azərbayacanda gimnaziya, özəl, dövlət orta ümumtəhsil məktəbləri fəaliyyət göstərir. Yeni qanun layihəsində isə bunların statusu müəyyənləşəcək. Bu sənəddə, həmçinin, müəllim-şagird, müəllim-cəmiyyət münasibətləri öz əksini tapacaq. Bundan əlavə, yeni qanun layihəsində özəl ümumtəhsil məktəbləri barədə xüsusi müddəalar olacaq”.
Orta ümumtəhsil məktəbləri haqqında hazırlanacaq yeni qanunun əhəmiyyəti barədə danışan təhsil eksperti Kamran Əsədov bizimlə söhbətində qeyd etdi ki, bu gün ölkədə 4472 orta ümumtəhsil məktəbi var: “Onların hər biri büdcədən maliyyələşir. Məktəblərdə hər hansı bir tədbir icazə və xəbərdarlıqla keçirilir. Bu gün orta məktəblərin heç birinin muxtariyyəti yoxdur. Təklif edirəm ki, hazırlanacaq qanun layihəsində orta məktəblərə həm idarəçilik, həm də maliyyə muxtariyyətinin verilməsi nəzərdə tutulsun. Belə olarsa, orta məktəblər publik hüquqi şəxs qismində fəaliyyət göstərərək gəlir əldə edəcəklər”.
Həmsöhbətimizin sözlərinə görə, orta ümumtəhsil məktəbləri haqqında qanun layihəsinə əsasən, məktəbləri idarə edən şəxsin menecer olması da qeyd olunur. İdarəçilər idarəçiliklə yanaşı, orta məktəbləri xarici dövlətlərdə və tədbirlərdə təmsil etmək hüququna malik olacaqlar.
K.Əsədovun sözlərinə görə, ümumtəhsil məktəbləri haqqında qanun layihəsində müəllimlərin işə qəbul prosesində məktəblərin də iştirak etməsi nəzərdə tutulur.
Günel CƏLİLOVA
